Македонската радио телевизија објави дека Васил Гарванлиев повторно ќе ја претставува Македонија на Евровизија.

„Според јасно утврдените правила од страна на ЕБУ кои ги обврзуваат националните радиодифузери да селектираат нова песна за Евровизија 2021, а самите да донесат одлука дали минатогодишниот претставник ќе остане истиот и годинава, Македонската Радио Телевизија одлучи задачата да ја претстави Северна Македонија на Евровизија 2021, да остане во рацете на Васил Гарванлиев“ - се вели во соопштението од МРТ.

Струмичанецот Васил Гарванлиев минатата година беше избран за наш претставник на Евровизија, но за жал настанот не се одржа поради пандемијата со коронавирусот.

Годинешниот избор за најдобра песна се предвидува да се одржи со две полуфинални вечери на 18 и 20 мај и една финална вечер на 22 мај повторно во Ротердам, Холандија.

Веста на социјалните мрежи ја потврди и самиот Васил:

„Во животот ретко добиваме не една, туку ТРИ шанси за исполнување на нашиот сон. Во 2019 година, гордо стоев покрај Тамара, во 2020 година посветив се на песната „YOU“ – но ковид-19 рече не! Во 2021 година ќе го искористам моето лично искуство и приказна, ќе го ставам моето срце во вашите раце преку мојот глас“ - напиша Васил.