На иницијатива и во организација на Координативното тело на музичките здруженија од цела Македонија на 28 Септември во хотелот „Александар Палас“ во Скопје се одржа прво основачко Собрание за формирање на КОМОРА НА МУЗИЧАРИ И МУЗИЧКИ ДЕЈНОСТИ на Македонија.

На Собранието учествуваа 52 претставници на правни субјекти од областа музиката и музичката индустрија во својство на делегати меѓу кои беа голем дел од истакнати уметници, позначајни музички здруженија, продукции, диџеи...

Ова Собрание е од големо значение и прв обид на оваа стопанска гранка во поновата историја на Македонија, за организирање на музичарите и музичките дејности на највисоко институционално ниво.

„Со основањето на оваа Комора се надеваме дека ќе го регулираме и подигнеме нивото на нашата професија - музиката од која ќе има бенефит целата држава и генерациите кои доаѓаат“ – велат од Координативното тело.

Собранието го водеше работно претседателство чиј претседавач беше Венко Пашовски - претседател на здружение Охридски Музички Еснаф.

Според законски утврдениот дневен ред едногласно беше прифатен предлог Статутот на комората и беа избрани извршните органи и тоа: Управен одбор составен од 9 членови и Надзорен одбор составен од тројца членови.

За прв претседател на Комората едногласно беше избран Горјан Стојановски.