Утрово во болницата во Лудвигзбург, Германија по долго боледување почина македонската фолк ѕвезда, струмичанецот Васил Атанасов, пејачот кој ги испеа најдобрите македонски новосоздадени песни меѓу кои и безвременскиот фолк хит од Фолк Фест „Валандово 1993“ - „Кој не раздели“.

Васил Атанасов потекнува од струмичкото село Дабиле. По завршувањето на средното музичко училиште во Штип беше член на повеќе музички групи. Во меѓувреме работел и како наставник по музичко во повеќе основни училишта, а неговите ученици го паметат како „распеаниот наставник“.

Васил во 1995 година ја напушта Струмица и Македонија и заминува во Германија, каде работеше и живееше до неговата смрт, која настанала утрово во 05:00 часот во болницата во градот Лудвигзбург.

Васил редовно настапуваше на музичкиот фестивал на новосоздадени песни Фолк Фест „Валандово“, а во 1993 година со песната „Кој не раздели“ ја освои втората награда од публиката... Следната година песната беше прогласена за најслушана помеѓу два фестивали, која и денес е една од познатите фолк хитови од деведесеттите години.