Новогодишен базар ќе го разубавува плоштадот во Струмица. По примерот на светските метрополи, во срцето на градот се организира „Новогодишен базар Струмица 2022“, кој треба да ја донесе празничната магија и да ја збогати новогодишната понуда во градот.

Локална граѓанска иницијатива спроведена од неколку ентузијастички настроени млади лица со идејата да се организира креативен настан преточен во форма на мини базар со дрвени куќички и голема елка во средината, кои симболично, преку поврзување на повеќе брендови, уметници и изведувачи од Струмица, ја промовираат потребата од поголема соработка и сплотеност помеѓу сите нас.

Позитивни вибрации во форма на музички и мирисни ноти ќе се шират во духот на празниците преку богатата понуда на вкусна храна и пијалаци по сечиј вкус, креативни украси и ракотворби за најубавите празнични подароци и квалитетна музичка програма за сите генерации.

Овој несекојдневен празничен хепенинг кој е поддржан и од страна на градоначалникот на општина Струмица и локалната самоуправа започнува на 24 декември 2021 и ќе трае се до 8 јануари 2022 година.