Денеска околу 14:00 часот на магистралниот пат Струмица - Граничен премин „Ново Село“, во близина на раскрсницата кон селото Сачево, се случила сообраќајна незгода помеѓу два автомобили во која се повредени четири лица, информираат од ТППЕ Струмица.

Руинираниот Дом на културата во селото Куклиш, кај Струмица, кој изгоре во мај 2013-та година, денеска повторно гореше. Околу 13:00 часот се запали отпаден материјал во една од просториите на овој објект.

Противпожарната единица на Струмица интервенираше со четири пожарникари и едно противпожарно возило. Пожарот е целосно ликвидиран, информираат од ТППЕ Струмица.

СВР Струмица поднесе кривична пријава против полициските службеници П.П. (31) од Василево и А.М. (25) од Струмица поради кривично дело малтретирање во вршење на службата, казниво по член 143 од Кривичниот законик.

Вчера, пријавените, постапувајќи по наредба за вршење служба, околу 09:45 часот, додека биле во КПУ „Затвор Струмица“, со цел да извршат достава на пресуда од Основниот суд Скопје 1 на осуденикот Ј. А. од Струмица, постапиле несовесно за време на вршење на службата.

Маж на годината за 2020 година отиде во рацете на човекот кој успеа да донесе радост на целата нација – Горан Пандев. Човекот кој успеа да ја однесе македонската фудбалска репрезентација на едно големо натпреварување.

Горан Пандев е официјално „Маж на годината“ на годинешното издание за избор на Мажи на годината во земјава, кое го организираат „Фрајдеј комуникации“ и првиот „онлајн“ магазин за мажи „Џентлмен Магазин“, преку кој и се избираат најдобри машки личности во повеќе области кои со своето дејствување дале белег и придонес во ова година.

Денеска околу 08:00 часот во Хамзали, ТППЕ Струмица со три противпожарни возила и 8 пожарникари интервенираше на гаснење на запален објект, кој бил користен како помошни простории, информираат од Противпожарната единица на Струмица.

Пожарот избувнал во објект кој се наоѓа во кругот на АД „Оранжерии Хамзали“ и е целосно изгаснат во 10:15 часот.

Поради позитивни играчи на ковид-19 кај гостинската екипа, одложено е дербито кое денеска требаше да се одигра помеѓу ОК „ЏИО Струмица“ и ОК „Универзитет Тетово“ во Првата одбојкарска лига за мажи.

Натпреварот кој требаше да се одигра во 17:00 часот во Спортската сала „Парк“, и да го одреди најдобриот тим по есенскиот дел од најквалитетната машка одбојкарска лига кај нас, ќе почека нов термин. Според правилата за натпреварување сезонава, ако некој клуб има повеќе од тројца позитивни одбојкари, може да побара одложување, а тетовци го сторија тоа, па ОФМ ќе го закаже тој натпревар во некој друг термин.

Секторот за внатрешни работи - Струмица преку Отсекот за превенција и Полициската станица за безбедност во патниот сообраќај, во партнерство со РСБСП, вчера во населените места Куклиш, Муртино, Моноспитово и Босилово, реализира превентивни активности по проект „Управувај безбедно со земјоделски машини” и делење летоци насловени: „Биди подготвен за безбедно патување во зима“.

Секторот за внатрешни работи - Струмица преку Отсекот за превенција и ПС за БПС Струмица во партнерство со РСБСП во текот на неделата до основните општински училишта „Гоце Делчев” Василево, „Гоце Делчев” Босилово, „Сандо Масев” Струмица, „Св.Кирил и Методиј”, Дабиље, „Маршал Тито” Муртино, „Герас Цунев” Просениково и „Гоце Делчев” во Вељуса, дистрибуираа околу 300 примероци едукативен материјал за првачињата, Боенки, заштитна маска со слоганот: „Јас внимавам во сообраќајот”, хартиено ленирче со аплицирани сообраќајни знаци и распоред за часовите, информираше началникот на Отсекот за превенција, Хризантема Рендевска.

Синоќа во 22:20 часот, полициски службеници од СВР Скопје на подрачјето на општина Центар, Скопје, го лишиле од слобода В.В. (36) од Струмица, затоа што при извршен преглед кај него била пронајдена марихуана. По документирање на случајот, против него ќе биде поднесен соодветен поднесок, информираат од МВР.

На денешната редовна 25-та седница Владата го усвои предлогот на Управувачкиот комитет за координација и управување во системот за управување со кризи и го утврди текстот на Предлог – одлуката за одобрување на продолжување на рокот за постоење на кризна состојба на територијата на Република Северна Македонија.

Со оваа предлог-одлука се предлага на Собранието на Република Северна Македонија да одобри продолжување на рокот за постоење на кризна состојба до 30 јуни 2021 година - стои во соопштението од Владата.

Во последните 24 часа од направените 3012 тестирања, регистрирани се 1069 нови случаи на ковид-19 од кои 30 евидентирани преку Центарот за јавно здравје во Струмица

Починале 29 пациенти, двајца од Струмица на возраст од 63 и 77 години.

Денеска Институтот за јавно здравје регистрира 65 оздравени пациенти од Струмица, од вкупно 1242 во цела држава.

Од ЕВН Македонија - КЕЦ Струмица информираат дека поради реализација на инвестициони зафати за подобрување на квалитетот во снабдувањето со електрична енергија, утре (среда, 2 декември), од 09:00 до 12:30 часот без електрична енергија ќе останат корисниците на објектите во околината на „Мултихем“ и магацин на „Терзи компани“, Булевар „Гоце Делчев“ бр. 130, во Егејската маала во Струмица.

„Од срцето на Македонија испраќаме силна порака. Решивме да застанеме на патот на предавството, нема да дозволиме да го скршат македонскиот народ, да го избришат македонскиот јазик, да го избришат македонскиот идентитет“, порача новиот претседател на ОК на ВМРО-ДПМНЕ во Струмица, Жан Дрвошанов од протестот кој со автомобили се одржуваше низ улиците на Струмица, а пред општинската зграда се обрати Дрвошанов.

„Ни замеруваат за протестите и не обвинуваат дека ние сме виновни за пандемијата која е излезена од контрола на власта из ема за жал се поголем замав. Меѓутоа и покрај се, и покрај сите притисоци кои ги врз нас, врз граѓаните, се зголемува бројот на луѓето кои се охрабрени да излезат на протест и да кажат НЕ на бришењето на се што е македонско. Нема да го дозвоиме тоа, нема да дозволиме да се избришат нашите корени, затоа ги повикувам сите, сите граѓани да бидиме сплотени во овој момент, да бидиме единствени и да си ја зачуваме Македонија. Помина времето на страв, отвораме нова страница на отпор на македонскиот народ. Протест сега за да не биде предоцна. Оставка на Заев, слобода на народот“ – кажа Дрвошанов.

Tројца жители на Струмица, на возраст од 63, 70 и 78 години починаа како последица на коронавирусот. Во изминатите 24 часа во цела држава починале 41 лице.

Преку Центарот за јавно здравје во Струмица се евидентирани 26 новозаразени лица од вкупно 1022 во Македонија, а направени се 3127 тестирања.

Денеска се евидентирани и 19 оздравени пациенти од Струмица од вкупно 680 во цела држава.

Од ЕВН Македонија - КЕЦ Струмица информираат дека поради реализација на инвестициони зафати за подобрување на квалитетот во снабдувањето со електрична енергија, утре (сабота, 28 ноември), од 08:30 до 14:00 часот без  електрична енергија ќе останат корисниците  на старата чаршија, односно улицата „Маршал Тито“, дел од улиците „Херој Карпош“, „Светозар Марковиќ“, „Боро Џони“, зграда на Општина Струмица, „Геос-консалтинг“, кафе бар „Ќоше“, пицерија „Бонџорно“, кафеана „Фабрика“, ТА „Сафари“ и други.

Денеска на 78 години почина Кирил Лазаров од Струмица, еден од најплодните композитори на македонски забавни и новосоздадени песни.

Кирил Лазаров е роден на 27 септември 1942 година во Струмица. Завршил Музичка академија во Белград. Беше професор во Музичкото училиште „Боро Џони“ во Струмица и негов директор од 1972 до 1980 година. Беше член на Здружението на естрадни уметници на Македонија. Автор е на книгата „Основи на музичката теорија“ (издадена 1993 година), како и на две Монографии за Музичкото училиште во Струмица.

Компонираше музика за театарски претстави: „Смеа низ сокаците“, „Трамвајот наречен желба“, „Смртта на Тарелкин“ и други претстави. Компонирал хорска музика и музички композиции со кои учествуваше на повеќе фестивали во земјава и странство.

Автор е на повеќе од 100 композиции, забавни и новосоздадени, меѓу кои и на познати евергрини, „Старо купувам“, „Една љубов во Струмица“, „Сокриј ме“, „Песна за армасаните“, „Писмо судено“, „Барам место на естрада“, „Помниш ли ги двата бреста“ и многу други. На поголем дел од неговите композиции свои авторски текстови напишале неговите најблиски соработници - текстописци, Натка Анчева и Ѓорги Калајџиев.

Кирил Лазаров е добитник на повеќе награди на музички фестивали. Прво место за најдобра чекорница, Прва награда и статуетка „Пиринка“ на „Пирин Фолк фест“ во Сандански, Бугарија, Орден на трудот со сребрен венец, Златна плакета од Здружението на естрадни уметници на Македонија и други награди и признанија.

Погребот со останките во вечното почивалиште на композиторот Кирил Лазаров ќе биде извршено утре на Градските гробишта во Струмица.