Фудбалерите на ФК „Академија Пандев“ денеска против ФК „Македонија ЃП“ го игра првото КУП финале во својата историја. Натпреварот се игра на Националната арена „Тодор Проески“ во Скопје со почеток во 18:30 часот, каде „пандевци“ ќе се обидат да го донесат првиот фудбалски трофеј во Струмица.

„Македонија ЃП“ денеска ќе се обиде да го освои својот втор трофеј, „Академија Пандев“ ќе слави прво одличје, откако е во елитата и тоа за кус период.

Ракометната репрезентација на Македонија одново ќе игра натпревар надвор од Скопје. Како што е објавено на официјалната страна „ЕХФ“ Македонија натпреварот против Грција, место во Скопје ќе го игра во Струмица.

Претходно иако беше објавено дека последниот натпревар од квалификациите за Европското првенство во 2020 година ќе се игра во Скопје, сепак на крајот одлуката е промената и одлучено е тој да се одигра во Струмица.

Во првиот натпревар од овој квалификациски циклус портив Грција, изненадувачки бевме поразени на гости во Кожани.

Кога во прашање се натпреварите на ракометната репрезентација во Струмица, Македонија последниот натпревар во Струмица го одигра 2013-та година, како пријателски натпревар против Црна Гора.

Натпреварот помеѓу Македонија и Грција е закажана за 16-ти јуни во 18:00 часот.

17-годишниот струмичанец Митко Ников, ученик во трета година при СОУ „Јане Сандански“ во Струмица го освои првото место на средношколскиот натпревар за програмирање „CodeCup“ во Битола.

Во конкуренција на 30-тина ученици, Ников, под менторство на професорката Славица Милева Ефтимова, првото место го освои со проектот – веб платформата „SchoolNet“, за подобра интерактивна настава.

„SchoolNet“ претставува социјална мрежа, веб платформа преку која се овозможува хостирање на едукативни онлајн игри во вистинско време и истата е наменета за користење во училишната настава. „SchoolNet“ се базира на најновите технологии со почитување на синтаксичките стандарди на Google, и е со отворен извор на код, така што секој може да го модифицира и надоградува“ – вели Митко Ников, кој на платформата работел околу три месеци.

Натпреварот CodeCup е организиран од Факултетот за информатички и комуникациски технологии, а годинава негови спонзори се битолските IT компании Netcetera и Interworks.

Општинското основно музичко училиште „Боро Џони“ од Струмица, синоќа го одржа својот Годишен концерт, во чест на својот патрон - 75 години од убиството на Боро Џони.

„Вечерашниот повод е чествување на животот и делото на нашиот патрон, кој го величиме со Годишниот концерт на нашето музичко училиште „Боро Џони“. Задоволството од реализацијата на овој Годишен концерт е уште поголемо кога се знае дека ставаме точка на една исклучително успешна учебна година“ - вели директорката на ОМУ „Боро Џони“, Клара Патарова.

На големата сцена беа претставени учениците кои освоија прво, второ и трето место на домашни и меѓународни натпревари. На шестмина успешни ученици, Димитар Филев, Васја Стојанов, Јован Филев, Андреј Филев, Мартина Пачоова и Славица Томова, семејството на Боро Џони, Џонови, им ја додели традиционалната парична награда, а полматурантката Славица Томова покрај оваа награда доби и плакета за исклучителен талент и успеси.

Најдобрите ученици пред струмичката публика во големата сала на Центарот за култура „Антон Панов“, се претставија со дела на познати светски композитори, како и традиционална македонска изворна музика.

Публиката беше воодушевена од настапите на младите струмички таленти. Професорите беа со своите ученици и ги бодреа, а некои и настапија со нив.

ФОТОГАЛЕРИЈА

За зголемување на безбедноста на сите учесници во сообраќајот, Јавното претпријатие „Паркиралишта Струмица“ ја обновува хоризонталната сигнализација во градот Струмица.

И оваа година предност имаат пешачките премини пред основните и средните училишта и клоновите на градинката „Детска радост“.

Според директорот на претпријатието, Митко Бујуклиев, досега се обележани 1.200 метри квадратни, а оваа пролетна акција ќе продолжи на сите локации на кои што од безбедносни причини е потребно обновување на хоризонталната сигнализација.

Пречистителната станица за отпадни води кај Сачево, во близина на Струмица, од денеска изгледа како бајка од сликовниците. Животински свет, куќички во вода, ликови од цртани филмови, ги красат базените со отпадни води на оваа Пречистителна станица на ЈПКД „Комуналец“.

Станува збор за културно-уметнички проект „Уметност и вода - магија на животот“, имплементиран од Здружение за третман на води, а финансиран од Европската Унија.

Муралите и илустрациите на објектите ги создадоа уметниците Ване Костуранов, Драган-Драш Китановски, Марјан Димиќ, Филип Конески и Блаже Атанасков.

На денешната свеченост и презентирањето на оваа уметничко дело, покрај голем број гости присуствуваше и амбасадорот на Европската унија во земјава, Самуел Жбогар, истакнувајќи дека водата треба да се користи внимателно во време кога ја има се помалку во светот.

„За да ја издвоиме оваа фабрика од обичните одлучивме да ги обоиме ѕидовите. Овие прекрасни илустрации покажуваат што прави фабриката и колку е важно да ја одржуваме околината чиста. Од се срце сакам да им се заблагодарам на петте извонредни уметници, кои ни помогнаа да ја раскажеме оваа приказна“ - истакна евроамбасадорот Жбогар, најавувајќи дека приказната на ЕУ за заштита на животната средина продолжува овие денови со нова кампања наречена „За чисто како дома исто“.

Градоначалникот на Струмица, Коста Јаневски обраќајки се на свеченоста, рече дека општината е горда на Пречистителната станица, која е изградена со средства од ИПА фондовите и е прва во државата, со која што општина Струмица го решава проблемот со отпадните води.

„Како општина на која што заштитата на животната средина во овој современ начин на живеење и е приоритет, без двоумење ја прифативме партнерската понуда на Здружението за третман на води на Северна Македонија за реализација на културно-уметничкиот проект „Уметност и вода - магија на животот“, финансиран од Европската Унија. И денеска сме навистина горди на делата од овој проект“ - рече градоначалникот Јаневски.

На денешната свеченост беа и голем број ученици од основните училишта во Струмица, тие таму направија своја изложба на цртежи што ги создадоа по повод Светскиот ден на водата 20 март, а на тема „Нацртај ја водата“.

Во саботата вечер околу 21:45 часот избувнал пожар во дворно место на „Терзи Компани“ на улица „Гоце Делчев“ во Струмица. Опожарени биле автомобил марка „Мерцедес Спринт“ и барака сопственост на „Фриком“ ДОО во која биле сместени инвентар и книговодствен материјал – информираат од СВР Струмица.

Од страна на Противпожарната единица на Струмица пожарот е изгаснат, направена е голема материјална штета, а увид на местото на настанот извршила екипа од СВР Струмица.

Вечерва во Кичево, ОК „ЏИО Струмица“ со победа го стартуваше првиот натпревар во разигрувањето за шампионската титула со екипата на ОК „Шутова“ со резултат од 3:0 во сетови (25:19, 25:17, 25:21).

Струмичани како првопласирани во регуларниот дел од одбојкарското првенство го стартуваа овој циклус со предност од 1-0 во победи, што значи дека со денешната победа нашите одбојкари широко ја отвораат вратата за новата шампионска титула.

Вториот натпревар помеѓу ОК „ЏИО Струмица“ и ОК „Шутова“ е во четврток (23 мај), во Спортската сала „Парк“ во Струмица со почеток во 19:00 часот.

Со почесен круг и вклучени сирени низ улиците на Струмица, демострација на показна вежба со нова опрема за побрзо извлекување на заглавени во возило по сообраќајна несреќа, вредна 25.000 евра, донација од Владата на Република Северна Македонија и Дирекцијата за заштита и спасување, припадниците на Противпожарната единица на Струмица, денеска го одбележаа Денот на пожарникарите 20-ти мај.

„Целиот град гледа во вас, вие сте идоли на многу млади и стари генерации. Сакам да имате добро здравје и да бидете во добра форма, нашата безбедност во голем дел зависи од вас и јас ви ја изразувам цела моја благодарност за вашата несебична посветеност во чувањето на безбедноста на нашиот град од несакани пожари“ – им рече градоначалникот Коста Јаневски на струмичките пожарникари.

Струмичките пожарникари со години работат со дотраена опрема и лоша опрема за лична заштита, ги ризикуваат своите животи, а им се кратат платите и не им се плаќат во целост дотациите што им следуваат, добиваат многу помали надоместоци, за разлика од нивните колеги од другите градови.

Градоначалникот Јаневски им рече дека во Општина Струмица имат соработник, дека тие се нивни партнери и заеднички треба да се изборат за сите нивни права.

„Ве поддржувам во вашите акции, желби и настојувања и ќе се обидеме со сите можни сили да ја подобриме и опремата и вашата подготвеност за да одговорите на сите предизвици кои што претстојат пред вас“ – додаде Јаневски.

Командирот на ТППЕ Струмица, Александар Гудев, во своето обраќање ја потенцираше подготвеноста на единицата за сите видови интервенции.

„За илустрација на нашиот секојдневен ангажман зборува и бројката од 670 интервенции во периодот од 20 мај лани до денеска. Сето тоа ни дава за право да кажам дека ние сме подоготвени во секој момент да одговориме на задачите и успешно да ја извршуваме нашата мисија“ - рече комадирот Гудев, кој на локални и државни институции им додели плакети за успешна соработка. Плакети добија и пожарникари кои 30 години непрекинато работат во ТППЕ Струмица.

ФОТОГАЛЕРИЈА

ФК „Беласица“ следната сезона ќе се врати во Втората фудбалска лига. На стадионот „Младост“ во Струмица, струмичките сино-бели не успееја да извлечат поволен резултат со „Работнички“ за да си ги задржи шансите за прволигашки статус. Претрпеа пораз од 1:0 кој ги оддалечи од надежта дека во последното коло со победа против „Силекс“ во Кратово ќе се зграпчи 8-то место кое дава можност преку Бараж да се остане во фудбалската елита.

„Беласица“ и да слави во Кратово против Силекс во последното коло, нема да им донесе Бараж. Во меѓусебните дуели со „Силекс“, струмичките сино-бели со победа би имале скор од 1-1-2, односно една победа, едно реми и два пораза што ги исфрла кратовчани подобри во меѓусебните дуели за позицијата која носи Бараж за опстанок.

„Беласица“ доколку против Работнички денеска на „Младост“ освоеше бод или три, тогаш работите ќе беа поинакви. Но, не успеа да ги освојат „роматичарите“, кои со голот на Ацковски славеа и си заминаа со три бода. Струмичките сино-бели денеска не беа на висината на задачата, иако имаа шанса преку Мирчевски да направат нешто.

Под мотото „Љубовта, почитта и разбирањето се нашите вредности“, вчера во големата сала на Домот на АРМ се одржа завршен настан на заедничките активности во проектот „Јакнење на мултиетничката соработка во општините“.

Активностите беа реализирани во рамките на секциите: млади креативци, драмска и спортска секција, а во кои беа вклучени ученици од основните училишта „Маршал Тито“ и „Никола Вапцаров“ од Струмица и „Маршал Тито“ од Муртино.

Проектот „Јакнење на мултиетничката соработка во општините“ е финансиран од Детската Фондација Песталоци, кој го реализира од Македонскиот центар за граѓанско образование од Скопје со финансиска поддршка на Детската фондација Песталоци, а во соработка со Бирото за развој на образованието и Општина Струмица.

ФОТОГАЛЕРИЈА

Б.К. (66) од село Зубово, струмичко, вчера починал работејќи со трактор на нивата.

Додека работел под пластеници со трактор, една метална шипка од пластеникот се откачила и го удрила во задниот дел на главата, по што починал – информираат од СВР Струмица.

Лекар од Итна медицинска помош констатирал смрт, а увид на местото извршила екипа од СВР Струмица. Со согласност на јавен обвинител, телото на починатиот било дадено на семејството за погреб. 

Премиерот Зоран Заев не можеше да ја сокрие својата среќа за ќерката Александра, која синоќа беше матурантка, ученичка на генерацијата 2016/2019 во гимназијата „Јане Сандански“ во Струмица. Премиерот на социјалните мрежи објави заеднички фотографии и напиша „Среќен татко“!

Денеска околу 12:30 часот на Булеварот „Маршал Тито“ во Струмица, во близина на ТЦ „Глобал“ се случи сообраќајна незгода помеѓу „Ауди“ и „Форд Ескорт“.

Според информациите, има повредени шест лица кои биле во двете возила, меѓу кои и една бремена жена. Со возила на Итната медицинска помош се пренесени во Струмичката болница, констатирани се лесни телесни повреди.

Полицијата направи увид на местото на незгодата за утврдување на причините за сообраќајката.

Денеска околу 10:45 часот пред влезот на селото Босилово, автомобил марка „Фиат Брава“, од засега непознати причини излетал од патот и удрил во дрво.

Од силниот удар, како што дознаваме, возачот на автомобилот на возраст од околу 60 години починал на самото место.

Пожарникари го извлекоа телото од автомобилот, кој е целосно уништен. Полициски службеници од СВР Струмица во моментот вршат увид за утврдување за причините на сообраќајката.

Претставници на светски познатата компанија за производство на напредна медицинска опрема „Nuga Medical“ од Сеул, Јужна Кореја, предводени од претседателот за Европа, Јанг Чун Мо, кои се во посета на Струмица, остварија средба со струмичкиот градоначалник, Коста Јаневски.

Тие го запознаа градоначалникот Јаневски со нивната дејност, активностите и плановите на компанијата, која неодамна отвори свој центар и во Струмица од вкупно 5500-те кои ги има низ целиот свет, истакнувајќи го своето задоволство од огромниот интерес на струмичани за Центарот „Нуга Бест“ во Струмица и позитивните ефекти кај нив.

Јанг Чун Мо го поканија градоначалникот Коста Јаневски, заедно со претставниците на „Нуга Бест“ за Македонија да ја посетат компанијата „Nuga Medical“ во Сеул, Јужна Кореја.

Струмица и Скопје се градовите што ја имат таа привилегија за користење на сите производи од „Нуга Бест“, како една култура за здраво живеење.

Инаку, претставниците на „Nuga Medical“, претходно во „Нуга Бест“ центарот во Струмица имаа презентација пред струмичани, а одговараа и на прашања за можностите што ги нудат нивните производи.