Во првото коло на Втората лига – Исток, вчера на стадионот „Младост“ во Струмица „Беласица“ ја победи екипата на „КИТ-ГО“ со 3:0.

Сино-белите победата ја почнаа во првото полувреме кога Александар Милушев од пенал го даде првиот гол. Мартин Мирчевски зголеми на 2:0, а третиот гол го постигна Дарко Размоски во судиското надополнување.

Капитенот на ОК „Наковски Волеј“ од Струмица, младата Ана Фасулева се сели во Словачка. Таа потпиша едногодишен договор со словачкиот женски одбојкарски супер лигаш „Купеле Брусно“ – објави www.drnka.mk

Ана Фасулева беше дел од ОК „Наковски Волеј“ од самото формирање. Носител на играта, а беше дел од младинските погони на овој Струмички клуб кој се закити и со титули.

Триесет мигранти биле пронајдени во комбе паркиран на магистралниот пат Струмица - Радовиш.

Полицијата вчера во 12:30 часот кај клучката за селото Воиславци, пронашла паркирано комбе „Мерцедес“ со скопски регистарски ознаки.

Според информацијата од СВР Струмица, при преглед во возилото биле пронајдени 30 мигранти. Од нив 24 од Пакистан, тројца од Ирак, двајца од Сирија и еден од Судан.

Полицијата го бара возачот...

Струмичката полиција вчера во раните утрински часов иго приведе Д.Ѓ. (23 години) од селото Куклиш, кај Струмица, за кого била распишана потерница од „Затвор Прилеп“. Лицето било предадено во Казнено-поправната установа - Затвор Прилеп, пишува во денешниот билтен на МВР.

Две лица се повредени во сообраќајна незгода која се случила синоќа околу 22:30 часот на магистралниот пат СтрумицаНово Село, на крстосница за Зубово и Ново Село – информираат од СВР Струмица.

Според полицијата се судриле „Ауди А6“ со струмички регистарски ознаки, управувано од А.Ј. (51) од Ново Село и „Опел зафира“ со струмички регистарски ознаки, управувано од К.К. (54) од село Зубово.

Во незгодата со тешки телесни повреди се здобил К.К., додека А.Ј. со телесни повреди. На двајцата им била укажана помош во болницата во Струмица. Увид на местото на настанот извршила екипа на СВР Струмица.

Русалиите, жив споменик на егзодусот на Македонците од Егејска Македонија, во пресрет на празникот Голема Богородица повторно ќе се соберат во Секирник, општина Босилово, на 10-тата меѓународна „Средба на Русалии 2019“, единствените играорци во земјата што ја негуваат и презентираат изворната традиционална игра на Македонците - бегалци од Кукуш и кукушко, поткрепени со звукот на тапанот и писокот на зурлата.

Покрај ансамблите од Македонија, ќе настапат и две русалиски фолклорни групи од соседна Бугарија, „Центар“ и „Пољаните“ од Петрич. Фестивалот на 27 август во 20:00 часот ќе го отворат домаќините, КУД „Русалии“ од Секирник, а тука се и КУД „Танец“ од Миравци, гевгелиско, Ансамбл „Македонија“, ФА „Мегдан“ од Богданци“, ФА „Копачка“ од Драмче, делчевско и женската фолклорна група при КУД „Русалии“ од Секирник.

Четириесеттина млади музичари од неколку градови од Македонија, Србија, Бугарија, Црна Гора и Хрватска од синоќа се во Струмица на петдневниот интернационален летен музички камп „Струмица 2019“.

Овој летен музички камп кој по 9-ти пат се одржува, беше отворен во Центарот за култура „Антон Панов“ со свечен концерт на кој настапија младите музичари Стефан Илиев на труба, Валентина Димитријевиќ, Јана Каевска, Пандорка Јанаќиева и Ангела Димитровска на флејта, како и струмичанецот Георги Трајков на гитара.

Младите музичари од денеска ќе учествуваат на целодневната работилница во неколку категории на инструменти, флејта, труба, хорна и камерна музика, а предавачи се реномирани професори од Факултетот за музичка уметност - Скопје. Координатор е Марија Јакимовска, а пијано соработник, Билјана Петровска.

Како што не информира професорот Александар Гошев, организатор на музичкиот камп, во вечерните часови, односно од 20:00 часот ќе се одржуваат концерти. Вечерва на програмата е Концерт на камерна музика пред платото на Центарот за култура, утревечер Концерт на класна хорна, а на 26 август ќе се одржат два концерти во истиот термин, едниот во фоајето на Центарот за култура, Детски концерт, а другиот концерт – класа флејта во црквата „Свети Петнаесет“ во Струмица. Завршниот концерт е на 27 август во 20:00 часот во НУЦК „Антон Панов“.

ФОТОГАЛЕРИЈА

Денеска во Домот на АРМ, Општина Струмица и „Натура Нова“ организираа завршна работилница, каде беа презентирани резултатите и брендираните производи од проектот „Заштита на биодиверзитетот и брендирање на шумските плодови на Беласица“.

Петнаесет самоникнати шумски производи ќе имаат заштитен географски назив „Беласица – природен производ“, меѓу кои се, питом костен, боровинка, вргањ, чаеви и други шумски производи.

На планината Беласица шумските плодови скапуваат и стојат неискористени, жителите од подбеласичкиот регион велат дека нема кој да ги собира, младите заминаа по европските земји, некои не се заинтересирани. Оние што ги собираат, повозрасните, ги користат за домашни потреби.

Панче Николов, тим-лидер на проектот „Заштита на биодиверзитетот и брендирање на шумските плодови на Беласица“, вели дека токму овој проект е со цел да се даде поттик за развој на локалната економија, односно „зелената“ локална економија, а основен двигател ќе биде промоцијата и продажбата.

„Ние знаеме дека секоја производ во непреработена форма има една цена, додека преработката е четири пати поскапа. Едноставно економскиот интерес на собирачите ќе ги активира сите можни ресурси на локално ниво, за таа работа да може да се искористи во поголем обем. Ние велиме дека имаме многу, многу природни производи самониканти од Беласица, меѓутоа само еден мал дел до сега сме ги среќавале, ако одиме на Смоларски водопад. Сега ќе може да се најдат и во маркетите низ целата држава, може да се промовираат, па дури и да се претставуваме меѓународно токму со овие висококвалитетни производи“ – вели Николов.

Општината Струмица е прва во Македонија која поведе постапка за заштита на природата со одржливо користење на самоникнати шумски производи во својот регион. Инаку, целата постапка за регистрација на производите со заштитено географско потекло и назив е веќе завршена во Државниот завод за индустриско потекло.

„Најважно од се, секако е заштитената палета производи и нивни преработки од 15 видови други шумски производи од планината Беласица, а тука се и креираните мапи со хабитати на шумски производи, пилот системот за одржлива употреба и контрола на биодиверзитетот на Беласица, како и обуката на регистрирани собирачи и обработувачи на шумски производи и персонал за контрола на пилот-системот и негово соодветно промовирање“ – рече во своето обраќање на денешната промоција, градоначалникот на Струмица, Коста Јаневски.

Полициски службеници од СВР Струмица, заедно со DJ Димитар и DJ Мишко Боневи, денеска беа со младите кои се забавуваа и пливаа во базенот на хотелот „Сириус“ кај Струмица.

Станува збор за едукативна активност на Отсекот за превенција при СВР Струмица со која ги советуваат младите, им делеа флаери со едукативна содржина како да се однесуваат и внимаваат кога возат мотори.

„Пренесовме сет превентивни пораки, кои очекуваме да бидат прифатени со цел почитување на позитивните законски прописи при управување со моторно возило, мопед и велосипед. Пораките ги пренесуваме преку музика и се надеваме дека така нашите пораки за безбедноста на младите ќе допрат до поголем број од нив“ – вели Хризантема Рендевска, портпарол на СВР Струмица.

На прашањето дали младите „моторџии“ ги прифаќаат советите, ги почитуваат правилата за безбедност во сообраќајот, Рендевска вели се се уште кај младите свеста за нивната безбедност е на многу ниско ниво и покрај тоа што се преземаат најразлични превентивни кампањи и се применуват репресивни мерки. Токму затоа, вели, е организирана и денешната за да се влијае на подигнување на свеста кај младите за нивната безбедност.

Никола Секулов, фудбалерот кој настапуваше за Македонија, но реши да ја промени репрезентацијата, отвори ново поглавје во својата кариера и потпиша професионален договор со италијанскиот калчолигаш „Јувентус“ – пишува www.gol.mk

17-годишниот Никола Секулов, роден во Пјаченца, Италија, кој е по потекло од Струмица, важеше за голема иднина на мак-фудбалот, но поради несогласувања со Фудбалската федерација на Македонија (ФФМ) реши да го искористи правото да игра за Италија, земја во која е роден.

Младиот фудбалер од средиот ред со неверојатна техника и визија за фудбалот настапуваше за младинските категории на Јувентус, а сега направи голем чекор напред во кариерата, па потпиша професионален договор со „бјанконерите“.

Дваесеттината вработени во Здружението на возачи – Центар за возила од Струмица и денеска со краткотрајна блокада на патниот правец од објектот на Здружението кон Просениково го искажаа своето незадоволство од добивањето решение за забрана за вршење технички преглед на возилата.

Тие се револтирани на решението од МВР со кое по 50 години работа на истата локација им забрануваат да регистрираат возила со образложение дека постојниот патен правец Струмица - Просениково, го немало во Генералниот урбанистички план на општина Струмица.

Протестите продолжуваат секој ден од 08:00 до 09:00 часот, бараат средба со надлежните, а за овој проблем правдата ќе ја барат и преку судските институции, бидејќи како што велат, не по нивна вина добиле решение за забрана за технички преглед, кој не оди во прилог ниту на возачите, ниту пак на фирмата, ниту пак на општината и државата.

СВР Струмица информира дека вчера во периодот од 18:00 до 24:00 часот на подрачјето на СВР Струмица е спроведена акциска контрола за откривање на прекршоци кои ги прават возачи на мопеди и мотоцикли.

Во контролата откриени се вкупно 14 прекршоци, од кои управување без возачка дозвола, нерегистрирани мотоцикли, управување без соодветен заштитен шлем.

Од СВР Струмица потенцираат дека вакви превентивно-контролни активности полицијата ќе ги прави и во наредниот период, а акцент ќе биде ставен на најчестите прекршоци, управување без дозвола и заштитна кацига.

Неколку дена по завршувањето на осмото издание на „Струмица ОПЕН фестивал 2019“, организаторот „Културен забавен живот“ го најавува следното издание на фестивалот. На СОФ 2019 се одржаа вкупно 27 настани во 10 недели и важи за најдолгото и најмасовно издание на манифестацијата.

„Во 2020-та ќе понудиме модифициран фестивалски концепт со кој веруваме дека ќе продолжиме да ја збогатуваме спортската и културно-уметничката програма во Струмица. Нови отворени сцени, едукативни настани, спортски натпревари, забава и незаборавни доживувања“ – велат од КЗЖ.

Од „Културен забавен живот“ упатија благодарност до Општина Струмица и сите општински и безбедносни служби за успешната соработка и овозможените услови за мирни фестивалски денови. Благодарност и до сите општествено одговорни компании кои се наши долгогодишни соработници, како и до волонтерскиот тим кој е препознатлив белег на манифестацијата.

Погледнете го видеото со најдобрите моменти од #ритамотнаградот снимени од Ѓорги Вацев, Наташа Величковска и Митко Ников.

Струмички бренд на маркети со над 30-годишна традиција „Црвена Ружа“, кој меѓу струмичани важи за маркет со најниски цени, од вчера го отвори својот 10-ти маркет во новата населба, поранешната касарна во Струмица – „Карпош“, односно на улицата „Мајка Тереза“ број 2.

Новиот маркет е со површина од 600 метри квадратни и претставува еден од најмодерно опремени маркети на оваа компанија, а располага со широк асортиман на производи со примамливи и прифатливи цени за потрошувачите.

Потрошувачите кои вчера го посетија новиот маркет на „Црвена Ружа“ ја искористија можноста да купат производи по многу ниски цени кои беа поставени по повод отворањето, а меѓу производите имаа можност и да си земат леб од „Жито Лукс“ за 0 денари. Акциските цени на одредени производи ќе важат и во наредните денови.

Паралелно, како што најавуваат од менаџментот на „Црвена Ружа“ за сегашните и потенцијални потрошувачи се подготвуваат многу изненадувања, попусти, а пред се квалитет и квалитетна услуга на персоналот.

ФОТОГАЛЕРИЈА

Синоќа околу 21:00 часот од слобода бил лишен Т.К. (49) од село Добрејци поради тоа што на влезот во Струмица, од правец на село Дабиље, физички нападнал полициски службеник кој извршувал службени дејствија.

Како што информираат од СВР Струмица, тој бил приведен во Полициската станица Струмица и по целосно документирање на случајот против него ќе биде поднесена соодветна пријава.

Утрово околу 8 часот вработените во Здружението на возачи – Центар за возила во Струмица, еден час го блокираа патот од објектот на Здружението кон селото Просениково.

Тие го изразија својот револт по добиеното решение од Министерството за внатрешни работи за забрана на вршење технички преглед на возила. 

МВР издаде решени за забрана, бидејќи според нивното образложение немале режим на сообраќај, кој пак Здружението, кое постои повеќе од 50 години, не може да го добие, затоа што нема нов Детален урбанистички план.

Според Лидија Булинг Николова, раководител на Центарот за возила, сообраќајниот режим го има на терен, но го нема на хартија.

„МВР бара режим на сообраќај кој ние нема да може да го добиеме бидејќи надлежните институции се уште немат донесено измени на генералниот, но и нов детелен урбанистички план за ова област, каде ние со години опстојуваме. Како правно лице со околу 20 вработени и над десетици илјади наши клиенти, бараме од надлежните да се донесе детален урбаниситчки план, кој би го регулирал ова прашање за да може да поднесеме барање и добиме режим на сообраќај, кој на терен постои, но го нема на хартија“ - истакна Лидија Булинг Николова.