Според „Трансфермаркт“, официјалниот сајт каде се вреднуваат фудбалерите по нивните настапи, Љупче Дориев од ФК „Академија Пандев“ од Струмица е еден од најскапите фудбалери во македонското прволигашко фудбалско првенство.

Според овој сајт, цената на 23-годишниот Дориев за евентуален тренсфер би чинела околу 700.000 евра, што во однос на лани овој период е речиси двојно повеќе, пишува www.drnka.mk, повикувајќи се на овој специјализран сајт за вредноста на фудбалерите.

Освен Дориев во групата најскапи фудбалери во домашното првенство влегуваат и фудбалерите на ФК „Шкендија“, Агим Ибраими и Хуан Фелипе. Освен за Дориев, Стоилов, Илиев, како што пишува „Дрнка.мк“, расте вредноста и за новото засилување на „пандевци“, Марко Рајковиќ, но и за 21-годишниот Горан Томовски.

Од 21:00 часот започнува втората финална вечер од 8-то издание на „Струмица ОПЕН фестивал“. Прв ќе настапи Дарио со едночасовен концерт, а по него во 22:15 часот се Бени и „Нон Стоп“. Тие ќе пејат и свират до настапот на балканската ѕвезда Северина, која на опенфестовската сцена треба да се појави во 23:30 часот. Таа е веќе во Струмица, а нејзиниот бенд ја има генералната проба на плоштадот во Струмица. Ноќта ќе ја затворат „Tightbeats & Tommy Tassev, кои стартуваат во 01:45 часот.

Балканската мега ѕвезда од Хрватска, Северина Вучковиќ пристигна во Скопје. Облечена во црвена латино сукња и ретро кошула од 50-тите, црно-бела комбинација, од аеродромот се смести во еден од скопските хотели, а доцна попладне ќе тргне кон Струмица.

Неофицијално, таа треба да се релаксира во хотелот „Сириус“ до својот настап кој е закажан во 23:30 часот на плоштадот „Гоце Делчев“. Северина по втор пат е на „Струмица ОПЕН фестивал“, во 2013-та година одржа концерт на Струмичкиот плоштад.

Вчера во 15:30 часот се случила сообраќајна незгода во Струмица на крстосницата од булеварот „Гоце Делчев“ и улицата „Климент Охридски“, помеѓу патничко моторно возило „Мерцедес“ со бугарски регистарски ознаки, управувано од Б.С.(49) од село Рич, и мопед „Јијинг“ со струмички регистарски ознаки, управуван од А.К. (27) од село Дабиле – информира СВР Струмица.

Во незгодата со тешки телесни повреди се здобила А.К., која е пренесена во Струмичката болница. Увид на местото на настанот извршила увидна екипа од СВР Струмица за утврдување на причините на сообраќајната незгода.

Се отвора големата опенфестовска сцена на плоштадот во Струмица. По концертите на малата сцена кај чешмичката, вечерва кулминација на годинашното 8-мо издание на „Струмица ОПЕН фестивал“.

Перо Христов со концерт по повод 50-годишниот јубилеј како естраден уметник на македонската сцена ќе ја отвори првата ноќ на концерти и забави на Струмичкиот плоштад. Почетокот е во 21:00 часот, а по него во 22:00 часот ќе настапат Ленче, Горан и Иван Кукиќ со „Јупитер“, како и гостите од балканското шоу „Никад није касно“, Мирзан Перваниќ Мигос, Марко Жигмановиќ, Даниела Костиќ, а со својата гајда ќе ги придружува Јане Крстев. Во 23:45 часот е настапот на балканската ѕвезда Жељко Самарџиќ, кој повторно ќе пее на оваа сцена, а по него е бугарката Гери Никол од 01:30 часот. Првата ноќ ќе заврши со настапот на Brass Brothers од 02:15 часот.

Утревечер, според програмата ќе настапат Дарио од 21:00 часот, Бени и „Нон Стоп“ од 22:15 часот, Северина од 23:30 часот, која по втор пат настапува на „Струмица ОПЕН фестивал“ и за крај од 01:45 часот ќе настапат Tightbeats& Tommy Tassev.

Во недела на големата сцена на Струмичкиот плоштад ќе настапат: „2 Бона” од 21:00 часот, Мирза Селимовиќ од 22:30 часот, а точно на полноќ на сцената ќе се појават Бијело Дугме со Горан Бреговиќ, Младен Војичиќ Тифа и Ален Исламовиќ.

Од почетокот на фестивалот, кој трае повеќе од два месеци, се одржаа 27 настани на 13 локации во Струмица, а според организаторите годинашното издание е во знакот на спортот, културата, уметноста и музиката.

„Тоше проески Трибјут“ беше насловен концертот, кој во рамките на „Струмица ОПЕН фестивал 2019“ го направија младите пејачи Александра Јанева, Васил Гарванлиев и Марко Логаут на малата сцена кај чешмичката. Со овие три моќни вокали кои не потсетија на убавите песни од Тоше, пееше и публиката.

ФОТОГАЛЕРИЈА

Добро познатиот струмички бренд на маркети со над 30-годишна традиција „Црвена Ружа“, во среда, 21 август во 15:00 часот, го отвора својот 10-ти маркет со површина од над 600 метри квадратни.

Новиот маркет на „Црвена Ружа“ се наоѓа во новата населба, поранешната касарна во Струмица – „Карпош“, односно на улицата „Мајка Тереза“ број 2.

-30 години работење и опстојување во трговијата, значи дека ја имаме довербата на потрошувачите. Затоа ја прошируваме нашата мрежа на маркети, овој пат во реонот на комплексот со новоизградените згради во населбата „Карпош“ во Струмица. И тука ќе ја држиме нашата определба за квалитетни и ниски цени на производи во маркетите на „Црвена Ружа“ – вели Анета Манчева од овој Струмички бренд на маркети.

Од „Црвена Ружа“ по повод отворањето на новиот маркет во среда, најавуваат акциски цени на сите артикли, наградни игри за потрошувачите и изненадување за посетителите кои ќе присуствуваат на отворањето на 10-от маркет на „Црвена Ружа“.

„Црвена Ружа“ за струмичани важи за маркет со најниски цени, не само во период на акциски цени, туку во текот на целата година.

Од ЈПКД „Комуналец“ информираат дека од 13:00 часот се без вода жителите кои живеат во дел од високата зона на градот Струмица, односно на потегот од улиците „Бетовенова“, „Бошко Буха“, „Братство“, „Пљачковица“ и дел од улицата „Славчо Стојменски”.

Екипи на струмичкото комунално претпријатие се на терен и работат на што поскоро отстранување на дефектот и нормализирање на водоснабдувањето во овој дел од градот.

62-годишниот Александар Мицев од Струмица е лицето кое е пронајдено во резервоар за гориво во водите на браната Турија на 5-ти август, убиецот е истиот што го убил и 57-годишниот Ристо Илјашев од Струмица, М.В. (54) од Добрејци, а ги извршил и двете убиства на идентичен начин.

Според портпаролот на СВР Струмица, Хризантема Рендевска, Александар Мицев бил убиен уште на 9 октомври 2018 година во деловна просторија на убиецот со огнено оружје со калибар 5,6 мм, а потоа го ставил телото во метален камионски резервоар за гориво и го потопил во водите на брана Турија на место викано „Рајанци“.

Против М.В., СВР Струмица, поднесе кривична пријава поради постоење основано сомнение дека пријавениот сторил кривично дело „Убиство“,  по  член 123 ст.2т.1 од КЗ на РСМ извршено од користољубие на подмолен начин врз А.М (62) од Струмица.

„Утврдено е дека на 09.10.2018, покојниот А.М. остварил телефонски контакт со пријавениот, по што се сретнале и заедно отишле во адвокатска канцеларија во Струмица, каде бил изготвен писмен меѓусебен договор за купопродажба на недвижен имот помеѓу А.М. како продавач и пријавениот како купувач, за цена од 18.200 евра. Договорената сума на пари за купопродажба на имотот не била исплатена во адвокатската канцеларија, а од страна на адвокатот пријавениот бил предупреден дека треба парите да ги исплати на трансакциска сметка“ – рече Рендевска.

По наредба на судија на претходна постапка при Основен суд Струмица пријавениот се наоѓа во притвор поради основано сомнение дека е сторител на кривично дело „Убиство“.

Градоначалникот на Струмица, Коста Јаневски и министерката за надворешни работи на Бугарија, Екатерина Захариева, заедно со заменикот министер за надворешни работи Андреј Жерновски и амбасадорот на Бугарија во нашата земја, Ангел Ангелов, го отворија повеќенаменскиот социјален центар во општина Струмица.

Центарот е во една од зградите на поранешната касарна во Струмица, и е реализиран со финансиска помош од Владата на Република Бугарија преку бугарската амбасада, во висина од околу 138.000 евра, а ќе биде наменет за самостојно делување и реализација на програмските активности на здруженијата од социјалната сфера.

Според министерката Захариева, овој проект е најголем кој го реализира бугарската Влада оваа година.

„Целта на овој проект е граѓанскиот сектор кој работи во областа на социјалата да има тука канцеларии, место за обуки и место од кое ќе можат да им помагаат на граѓаните“ - рече министерката Захариева, потенцирајќи дека за оваа година бугарската Влада помага во реализација на проекти во Република Северна Македонија со околу еден милион лева.

Градононачалникот Јаневски изрази благодарност до Владата и амбасадата на Република Бугарија за финансиската помош за реализација на овој проект.

„Повеќенаменскиот социјален центар ќе претставува простор за самостојно делување и реализација на програмските активности и проекти во рамките на целните групи, создавање можности за полесна и побрза интеграција во општеството и социјална инклузивност, создавање можности за меѓусебна вмреженост и делување на здруженијата од социјалната сфера, како и на организации од други општествени сфери“ - рече градоначалникот Јаневски.

По промотивниот настан, гостите со домаќините присуствуваа на настапот на бугарски и македонски музички артисти, во рамките на концертната турнеја „One Love Tour“, кој што се одржа во Градскиот парк во Струмица, а друштво на Захариева и правеше и сопругата на премиерот, Зорица Заева.

На овие активности им претходеше куса средба во зградата на општината Струмица на која градоначалникот Јаневски и министерката Захариева ги разгледаа можностите за продлабочување на соработката.

Од ЕВН Македонија - КЕЦ Струмица информираат дека поради реализација на инвестициони зафати за подобрување на квалитетот во снабдувањето со електрична енергија, утре (петок, 16 август), од 09:00 до 11:00 часот без електрична енергија ќе останат улиците: „Атанас Нивичански“, дел од „Охридска“, дел од „Маршал Тито“, дел од „Трајчо Делиџаков“, „Ристо Ќурчиев“, „Елка Јанкова“, „Мара Минанова“, „Димитар Цветинов“ и дел од „Вардарска“, додека од 09:00 до 15:00 часот дел од населеното место Василево (на влезот од село Добрејци), и од 08:30 до 11:00 часот дел од селото Ново Коњарево.

Проект кампањата „Еко Фронт“ со мотото „Чиста да ни е“ во организација на Општина Струмица и ЈПКД „Комуналец“ ќе се погрижат да се одржи хигиената во градот за време на фестивалските збиднувања.

Работни единици од одделенијата „Градско зеленило“ и „Комунална хигиена“ се на терен на сите настани на СОФ 2019.

Од „Комуналец“ и општината апелираат до граѓаните за совесно однесување кон јавните добра, со висока еколошка свест да се ужива во програмата на годинашното издание на „Струмица ОПЕН фестивал“.

Патувачкиот караван на фестивалот „One Love Tour“ низ Македонија и Бугарија, вечерва е во Струмица во рамките на „Струмица ОПЕН фестивал“.

Музичари од Македонија и од Бугарија ќе настапат на сцената кај чешмичката во големиот Градски парк. Од македонска страна ќе пејат и свират Љубојна, Слаткаристика, Џамбо Агушеви оркестар и јутјуберите ЏП и Стефонатор, а од Бугарија ќе настапат Михаела Филева и Графа.

Концертот започнува од 21:00 часот со настапот на ѕвездите од „ЈО-ЈО“ фестивалот.

Од ЕВН Македонија – КЕЦ Струмица информираат дека утре (четврток, 15 август), од 09:00 до 11:00 часот ќе има прекин на електричната енергија кај корисниците од улиците „11-ти Септември“, „Епименонда Поп-Андонов“, „Вардарска“, „Дунавска“, дел од „Крушевска Република“, „Елка Јанкова“ и „Охридска“ во градот Струмица, а од 09:00 до 15:00 часот корисниците од улицата „Мирче Ацев“, позади Центарот за култура „Антон Панов“ во Струмица.

Утревечер Народниот театар „Антон Панов“ од Струмица премиерно ќе ја изведе претставата „Шепоти од вода“ од Горјан Милошевски, а во режија на Срѓан Јанаќијевиќ.

Во драмската претстава играт актерите: Јулија Милкова, Анкица Бенинова, Јасмина Вучкова, Коста Ангов, Игор Тодоров, Стојан Велков-Трн и Бранко Бенинов.

Вицепремиерот и министер за надворешни работи на Бугарија, Екатерина Захариева, утре доаѓа во еднодневна посета на Струмица, соопшти бугарското МНР.

Захариева заедно со шефот на дипломатијата на Македонија, Никола Димитров, ќе присуствуваат на фестивалот „One Love Tour“, кој во рамките на „Струмица ОПЕН фестивал 2019“ ќе се одржи утре (четврток, 15 август) од 21:00 часот.

На настанот што е поддржан од УНЕСКО ќе бидат преставени традициите на двете земји и ќе настапат македонски и бугарски музичари.