Од ЕВН Македонија – КЕЦ Струмица информираат дека утре (четврток, 9 јули), од 09:00 до 15:00 часот без електрична енергија ќе бидат корисниците во Индустриска зона Василево: Салон за мебел „HOME by Almak“ и околни објекти, „Тритерол“, „Електроелемент“ и „Елкоинг“.

Прекинот е поради реализација на известиоциони зафати за подобрување на квалитетот во снабдувањето со електрична енергија.

Од ЈПКД „Комуналец“ Струмица информираат дека поради настанат дефект на водоводна цефка, во моментот без вода за пиење се жителите на населените места Баница и Водоча.

Екипи на ова комунално претпријатие се на терен и работат на отстранување на дефектот. Нормализирање на водоснабдувањето се очекува денеска до 15:00 часот.

Шест од 83 избирачки места во општина Струмица ќе бидат преместени на новии локации, бидејќи не ги исполнуваат условите за заштита од Ковид-19 при гласање за претстојните Праламентарни избори закажани на 15 јули, информираше претседателот на Општинската изборна комисија, Томислав Андреев.

Станува збор за избирачките места: 1718 (Детска градинка), ќе се гласа во ОО на Црвен крст, 1738 (Четврта месна заедница) ќе се гласа во СОУ „Јане Сандански“, 1741 (Петта месна заедница) ќе се гласа во ООУ „Сандо Масев“, двете избирачки места од Седма месна заедница ќе се гласа во ООУ „Видое Подгорец“ и 1753 (Осма месна заедница) ќе се гласа во истото училиште „Видое Подгорец“.

Андреев информираше дека гласањето на 15 јули (среда), од 07:00 до 21:00 часот ќе се реализира според протоколите за заштита од Ковид-19. Задолжително е носење на заштита маска за секој граѓанин кој ќе дојде да гласа, одржување на растојание од 1,5 до 2 метри надвор од гласачкото место, додека се чека ред, а внатре на гласачкото место ќе се пуштат до двајца граѓани за гласање. При влез и излез ќе има средства за дезинфекција на рацете.

Лицата во самоизолација и заразени со коронавирус ќе гласат во понеделник, 13 јули, додека хронично болни и немоќни лица ќе гласат во вторник, 14 јули. Овие лица за гласање треба да се пријават најдоцна до вечерва до полноќ (среда, 8 јули, 23:59 часот).

Државната изборна комисија изработи посебна интернет страница преку која лицата кои се во домашен карантин или на кои им е одредена мерка за самоизолација поради коронавирусот можат да се регистрираат за гласање на претстојните Парламентарни избори.

Граѓаните регистрирањето можат да го направат целосно електронски, а при пријавувањето од нив ќе биде барано електронски да достават копија од личната карта и копија од решението за карантин или самоизолација, издадено од Државен санитарен и здравствен инспекторат.  За полесно прикачување на бараните документи, од ДИК препорачуваат веб апликацијата граѓаните да ја користат од нивниот мобилен уред, со кој при пополнувањето на податоците на едноставен начин, преку сликање на копиите од документите, ќе може да се прикачат.

Комисијата за заразни болести утрово одржа состанок на кој донесе одлука да достави предлог до Владата на Република Северна Македонија од утре при влез во нашата земја за сите граѓани од Србија, Косово, Босна и Херцеговина и Црна Гора да биде задолжително да достават ПСР тест не постар од 72 часа.

Препораката на Комисијата е донесена по разгледување на актуелната епидемиолошка состојба во наведените земји и согласно информациите добиени од медицинските власти во овие земји. Оваа препорака Комисијата за зарaзни болести ќе ја поднесе до Владата за понатамошно постапување.

Деновиве започнаа активностите за дополнително уредување на просторот околу Габровскиот водопад.

Се проширува патеката до третиот водопад во должина од 740 метри, а ширина 1,5 метри во карпестиот дел и истата ќе биде покриена со камен. Патеката ќе биде оградена, ќе има два моста и платформа на третиот водопад, а ќе се уредат и постоечките летниковци со маси и клупи – информираат од Општина Струмица.

Со овие зафати љубителите на природата ќе можат уште повеќе да уживаат во убавините на овој водопад.

„СДСМ три години во континуитет покажува што значи вистинска грижа за сите граѓани подеднакво. ВМРО-ДПМНЕ во континуитет покажува грижа само за Груевски и неговите криминални соработници“, кажа на денешната прес конференција Костадин Костадинов, кандидат за пратеник во ИЕ4 од Коалицијата „Можеме“, предводена од СДСМ.

11 години ВМРО-ДПМНЕ манипилураше со социјалната помош, ја држеше на недостоинствен минимум, ја злоупотребуваше во партиски цели пред избори, а примателите на социјална помош ги игнорираше.

За три години, СДСМ донесе социјална реформа со која социјалната помош ја зголеми за 300 отсто, воведе детски и образовен додаток.

Го решивме проблемот со стечајците кои ВМРО-ДПМНЕ ги игнорираше. 12.000 стечајни работници добиваат по 8.000 денари месечено, а наскоро добиваат и домашна платежна картичка од 9.000 денари.

И во време на криза со коронавирусот продолживме со концептот парите назад кај граѓаните.

28 милиони евра враќаме назад кај преку 324.000 граѓани преку домашната платежна картичка и ваучерот за туризам.

Дополнително го зголемуваме опфатот на домашната платежна картичка. Покрај стечајците, картичка со 9.000 денари ќе добијат и пензионерите со пензија до 15.000 денари, самохраните родители, како и невработените кои не се активни баратели на работа.

Продолжуваме да се грижиме уште повеќе и уште подобро. Во новиот мандат обезбедуваме повисока социјална помош за 34.000 домаќинства и детски додаток за 65.000 деца!

Затоа, на 15 јули граѓаните ќе гласаат за концептот кој обезбедува повеќе пари во нивните буџети. Обнова на криминалот, обнова на режимот нема да има.

Владата на Република Северна Македонија на денешната 74-та седница, донесе заклучок со кој 15 јули се определува за неработен ден заради непречено спроведување на изборниот процес за предвремените парламентарни избори и истиот нема да се одработува.

На оваа своја седница, Владата го прифати предлогот на Комисијата за заразни болести, со кој од категориите на лица кои се ослободени од работа и работни активности - родителите на деца до 10-годишна возраст, во овој период да се вратат на работните места само родителите на децата кои се вклучени во воспитно-образовниот процес во училиштата, имајќи предвид дека учебната 2019/2020 година е завршена.

Дополнително, институциите кои за време на претстојните предвремени избори за пратеници во Собранието на Република Северна Македонија имаат зголемен обем на работа во делокругот на нивната надлежност поврзана со изборниот процес, како на пример Основниот и Вишиот управен суд, Државната изборна комисија и други, да ги вратат во редовен работен процес вработените лица во овие институции кои по различни основи се опфатени и ослободени од работни активности со мерките и препораките на Владата со  цел непречено извршување на редовните законски надлежности поврзани со активностите во изборниот период.

На денешната седница Владата го утврди Протоколот за работа на Дневните центри за деца и лица со попреченост во услови на епидемија на заразната болест КОВИД-19.

Министерството за труд и социјална политика, како надлежно во делот на дневно згрижување на деца и лица со попреченост, го подготви протоколот кој се заснова на одлуките, препораките, одредбите, протоколите и останатите пишани документи издадени од Владата на Република Северна Македонија, Министерството за здравство, Државниот санитарен и здравствен инспекторат, по укинување на вонредната состојба и со започнувањето со работа на дневните центри.

На оваа седница се усвоени и измени и дополнувања на Протоколот за начинот и условите за организација на настани исклучиво на отворен простор.

„Факт е дека жителите во населбата Софилар, имаат проблеми, но факт е и дека Општина Струмица прави се истиот да го реши“, велат од Општина Струмица како реакција на денешната прес конференција на Александар Николоски, потпретседател на ВМРО-ДПМНЕ.

Уште во декември 2017 година се одржа средба со жителите со цел да се забрза процесот со урбанизацијата на бесправно изградените објекти, односно, доставувањето на елаборатите за да може да се донесе деталниот урбанистички план и потоа да се изгради целокупната инфраструктура која ќе им обезбеди подобри услови за живот.

Иако доставувањето на елаборатите не се одвиваше според договореното, сепак легализацијата на бесправно изградените објекти е веќе завршена, по што е завршена и постапката за носење на Деталниот урбанистички план за блоковите 39 и 40.

Направена е нова ажурирана подлога со снимање на сите изградени објекти, планската програма е усвоена и за десетина дена планот ќе биде изложен на јавна презентација.

Во меѓувреме, Општината работи на изготвување на проект за инфраструктура и основен проект за изведба на патната инфраструктура во оваа населба.

Со изработка на алатката Урбана Ревизија во која се одредени реалните потреби на граѓаните по населени места, каде како „приградска населба“ се одделуваше токму населбата Софилар, Општина Струмица аплицираше и обезбеди грант од Светска банка за реализација на планираните проекти за оваа населба.

Ова значи дека во изминатите 2,5 години Општина Струмица не ги игнорираше жителите од Софилар и нивните проблеми, напротив, работеше на целосното завршување на започнатата постапка за легализација на бесправно изградените објекти и донесувањето на Деталниот урбанистички план, што е единствен услов за изградба на целокупната инфраструктура којашто ќе им обезбеди подобри услови за живот – стои во писмената реакција на Општина Струмица.

Носителот на листа на пратеници во Изборна единица 4 од Коалицијата „Обнова на Македонија“, предводена од ВМРО-ДПМНЕ, и потпретседател на ова партија, денеска одржа прес конференција во близина на населбата Суфилар во Струмица.

„Од утрово стартувавме, во текот на попладневните часови ќе имаме средба со граѓани во централното градско подрачје на Струмица како и во околните населби, ќе одиме во Банско, ќе одиме во Куклиш, вечерта ќе ја завршиме со една трибина посветена на меѓународната политика заедно со младите луѓе тука од Струмица. Причината зошто се наоѓаме токму во оваа населба Цветан Димов е затоа што сакаме да потенцираме на кој начин за жал градот не се развива, имаме други ветувања во изминатиот период, многу луѓе ни се пожалија дека инфраструктурно не им се решени проблемите, дека се уште нема донесено детален урбанистички план, ниту се соодветно решени инфраструктурните прашања како што е изградба на улици, канализации, одвод“ - кажа Николовски.

Тој апелираше, тоа да се реши во следниот период, а, како што рече,  ќе се заложи владата на ВМРО-ДПМНЕ после 15 јули во соработка со општината тука за овие прашања да бидат надминати.

„За мене најзначајниот, најбитниот проект кој што ќе го обележи четири годишниот мандат 2020 – 2024 година е целосна дигитализација на македонското општество кое што треба да овозможи неколку работи. Прво силен удар на корупцијата затоа што преку 500 услуги кои во моментот се добиваат од разни државни институции и зависат од човечки фактор ќе бидат целосно дигитализирани за да се тргне човечкиот фактор од истите и да нема дискреционо одлучување на било кого“ - рече тој.

Најави комплетна дигитализација на основното и средното образование, со цел младите, новите генерации да фатат чекор со најмодерните светски држави и да можат да бидат конкурентни на европскиот и на светскиот пазар.

„Ќе стимулираме и помагаме доедукација и дообука за сите млади кои што ќе сакаат да се пренасочат во овој сектор, обуките ќе бидат бесплатни, односно ќе ги плаќа државата се со цел да имаме што поконкурентен број на млади луѓе кои што можат да се занимаваат со оваа работа. И втората работа исклучителна значајна поврзана со екологијата. За жал Струмица е еден од најзагадените градови во Македонија. Тоа е така од неколку причини, прво од начинот на греење на огрев, и второ начинот на загревање на оранжериите тука во струмичко, за жал се користи огромна дрвна маса а дрвата се најголем производител на ПМ 5 и ПМ10 честички“ – истакна Николоски.

Николовски најави дека се планира спроведување масовни проекти во екологијата, конкретно тука во Струмица и струмичко, овозможување на топла вода, односно топла вода да стигне до секоја нива и до секоја оранжерија каде што за таа работа има можност.

„Понатаму секоја година 20 милиони евра, за четири години 80 милиони евра во делот на наводнување каде што ќе се возобноват постојни каналски мрежи, ќе се изградат нови каналски мрежи и ќе се градат акумулации и таа вода ќе може дел да се користи за наводнување, но дел исто така ќе може да се користи и за загревање во комбинација со сончевата енергија“ - рече Николовски.

Третата работа, рече, целосна гасификација вклучително и најбитно и за струмичкото поле за истата да се одбегне греењето со дрво и Струмица да е далеку почиста и помалку загадена од ова што е сега.

Полициски патроли низ градот Струмица бараат група мигранти, откако во 11:50 часот на раскрсницата од улиците „Младинска“ и „Браќа Минкови“, жолто комбе со кочански регистарски ознаки, во кое биле мигрантите, се движело со голема брзина по „Младинска“ и предизвикало сообраќајна незгода удирајќи во три автомобили.

Мигрантите се разбегале низ градот, а според очевидци ги имало повеќе од 20 луѓе. Тројца се фатени на самото место. Има и неколку повредени луѓе.

Портпаролот на СВР Струмица, Хризантема Рендевска, само го потврди настанот, бидејќи сè уште се прави увид на самото место и нема подетални информации, ниту за бројот на мигрантите, ниту од каде се.

Вчера околу 18:30 часот во Струмица на улицата „Балканска“, Н.Ѓ. (49) од село Рич, струмичко, управувајќи патничко возило „Опел Зафира“, со бугарски национални ознаки, удрило во велосипед, управуван од А.Г. (19) од Струмица – информираат од СВР Струмица.

Во незгодата, велосипедистот се здобил со тешки телесни повреди, констатирани во Струмичката болница, каде што бил пренесен за укажување на лекарска помош.

Извршен бил увид на местото на настанот од увидна екипа од СВР Струмица.

„Во изборната програма на ВМРО-ДПМНЕ граѓаните на Иловица и Штука ќе најдат дека тие ќе одлучуваат што ќе се случува со рудниците овде. Вие сте тие што ќе одлучувате за рудникот Иловица-Штука, кажа лидерот на ВМРО-ДПМНЕ, Христијан Мицкоски на средбата со жителите на Иловица, општина Босилово.

Пред жителите на Иловица ја презентираше програмата на неговата партија за претстојните избори, потенцирајќи дека во неа можат да се најдат многу проекти кои грижливо се подготвени и ги нудат на граѓаните.

Мицкоски вели дека последна победа на СДСМ била пред 18 години, а и до наредната ќе чекале уште четири години.

Коалицијата за „Обнова на Македонија“ предводена од ВМРО-ДПМНЕ синоќа имаше средби и со жители во неколку населени места во општините Босилово, Ново Село и Василево, каде говореше и носителот во Изборната единица 4 од ова Коалиција, Александар Николоски, како и кандидатот за пратеник од струмичкиот регион, Дејанчо Ефтимов.

Од ЕВН Македонија – КЕЦ Струмица информираат дека денеска (вторник, 7 јули), од 08:00 до 14:00 часот без електрична енергија ќе биде населеното место Водоча, Манастирот „Свети Леонтиј“ во Водоча и компанијата „Агроконсалтинг“.

Во изминатите три години реализиравме голем број на мерки и политики со кои ја зголемивме понудата на работни места и го олеснивме патот до прво вработување на младиот човек, кажа на денешната прес конференција, кандидатот за пратеник во ИЕ4 од Коалицијата „Можеме“, предводена од СДСМ, Костадин Костадинов.

Стапката на невработеност кај младите лица денес изнесува 35,3% што е многу пониска од 2016 кога беше 48,6%, а до 2024 година ќе ја донесеме под 17%.

Оперативниот план за активни програми и мерки за вработување продолжува со рекорден буџет за 2020 година од 1,3 милијарди денари.

Директна поддршка на младинското и женското претприемништво, преку грантови во висина од 5.000 до 15.000 евра.

Обезбедуваме поврат на персонален данок за сите нововработени до 29 години во првите две години од работењето.

Во поранешното „Македонско село“ формираме „Старт-ап село“ („Start-Up Village“) кое ќе нуди физички простор за живеење и работа на млади луѓе со започнат или бизнис во подготовка.

Продолжува мерката за 3.000 денари месечен младински додаток во производството за вработени млади лица до 23 години со завршено најмалку средно образование.

Изборот на 15 јули е помеѓу силна економија – шанса за младите или шанса за ново богатење на ВМРО-ДПМНЕ и бркање на младите од државата.

На 15 јули граѓаните, младите, одбираат нова развојна економија, одбираат парите уште повеќе да завршуваат во нивните буџети, за да биде уште подобро за сите.

На македонската забавна музичка сцена се појавува ново име, 19-годишната струмичанка Сања Димова. Иако уште од мало дете е со музиката, живее во музичко семејство, ќерка е на познатите фолкери, брачниот пар Билјана и Борис Димови, Сања сега ја сними својата прва песна, насловена „Знам да кажам не“.

„Знам да кажам не“ ја напишаа Димитар Симонов и Зоки Зоц, а аранжманот го направи Дејан Стојановиќ. Направен е и видео спот на песната, снимен во „Luna Park Silver“.

Сања се гледа во поп-фолк музиката, сака добар ритам, лесен и певлив текст. Ова година сака да сними уште една песна, ќе ја гради својата кариера, но истовреме и ќе продолжи на Музичката академија во Скопје, по прекинот на факултет по музика во Италија, каде студираше соло пеење, но поради ситуацијата со коронавирусот се врати во Македонија.

Слушнете ја првата песна со прекрасниот глас на Сања Димова и уживајте во видеото со ова младо музичко име на македонската естрада.

Еден час, со транспарент во раката, со залепена уста, на плоштадот во Струмица, познатиот актер и еден од најгласните говорници против отворањето на рудникот за злато и бакар „Иловица-Штука“, Стојан Велков Трн, го изрази својот револт поради ситуацијата со рудникот или како што напиша тој на Фејсбук, нефункционалноста на сите чинители во овој процес.

Ова лично незадоволство, како што најави Велков, ќе го прави секој ден од 20:00 до 21:00 часот на струмичкиот плоштад со различен слоган во раце. Во својата објава на Фејсбук тој напиша дека овој чин е негов личен крик против како што вели, нерешавањето на прашањето со рудникот. Тој порача дека неговата акција нема политички цели и кампањи.

„Ова ќе биде мој личен бунт против сите чворови кои ги ствараат политичките чинители кои, и покрај сите правни и еколошки недоследности за сулудиот потенцијален проект рудникот за злато и бакар „Иловица - Штука“, не најдоа за сходно да стават точка и да го решат еднаш засекогаш тоа прашање“, напиша Велков. 

Нему му се приклучија уште неколку активисти кои дојдоа со свои транспаренти, меѓу кои и неговата колешка, актерката Оливера Аризанова Мансбарт.

Инаку, од Еколошкото здружение „Здрава котлина“ побараа објаснување од државата зошто се уште ја нема обжалено пресудата на Управниот суд во врска со рудникот. Со неа, се поништува решението на Второстепената комисија за одлуката на Министерството за економија за одбивање на издавање на дозвола за експлоатација на концесионерот „Еуромакс Ресурси“. Тие се сомневаат дека никој досега не направил жалба, ниту пак планира да достави жалба до Виш управен суд.