Првата специјализирана продавница за здрава и органска храна во Струмица - „ВИОНА“, која се наоѓа во зградата до Основниот суд, утре ја одбележува 6-тата годишнина од отворањето на оваа специјализирана продавница. Својата дејност од пред две години ја прошири и со отворање на сопствена работилница за производство на слатки и солени производи од органски состојки, а од неодамна „ВИОНА“ на уште една локација, на самиот плоштад во Струмица.

По повод 6-от роденден на специјализирана продавница за здрава и органска храна „ВИОНА“, разговаравме со сопственичката, Виолета Врешкова Накова.

СтрумицаНет: Како се роди идејата за Виона?

Виолета: Се започна во јануари 2013 година, само што ја напуштив мојата претходна работа и немав никаква намера да започнам сопствен бизнис. Во тој период моја најдобра другарка се бореше со една од најтешките болести. Бев со неа секојдневно, бев сведок колку таа имаше желба да се избори, колку помош и поддршка имаше од семејството. Сите сакавме да помогнеме, таа веруваше во алтернативно лекување, во здрава исхрана. Ме убиваше мислата дека не можам да и помогнам па почнав да пишувам книга, да купувам литература за природно лекување, разговарав со секој што може на било кој начин да помогне. Така од ден на ден се повеќе верував дека храната е клучна за нашето здравје. Почнав да ја менувам исхраната на моето семејство, но се соочував со недостаток на намирници што сакав секојдневно да ги користам, а немаше од каде да ги набавам во Струмица, па нарачував од Скопје, а тоа не беше баш толку едноставно. Во еден момент станав свесна дека имам толку многу информации кои сакам да ги споделам со некој, да помогнам некому, да се промени размислувањето за храната. Така, дојдов до идејата за продавница за здрава храна, идејата ја прифати моето семејство, а најголема поддршка имав од мојот сопруг. Почнавме со истражување на пазарот, се беше толку сложено, да се одберат производи, да се најдат добавувачи, да се најде простор, да собереме информации за бенефитите од производите. Но, ништо не можеше да ме поколеба, некоја внатрешна сила ме водеше напред, да направам нешто корисно за сите. Уште поголем поттик ми беше што мојата другарка, иако веќе ја губеше битката со болеста, ме поддржуваше и ја радуваше сознанието што токму таа ми беше инспирација за почеток на оваа работа. За жал мојата Ели почина само три дена по отворањето на продавницата.

СтрумицаНет: Што следуваше понатаму, дали работите се одвиваа како што сте очекувале?

Виолета: Искрено да ви кажам, баш ништо не очекував, најважно ни беше да се започне со работа, а тоа значеше бескрајни разговори, објаснувања за производите, мелење семиња, мерење, пакување… Интерес имаше голем, бројни посети, прашања многу, и сфативме набргу дека еден човек не може сам, па се приклучи и сопругот.

СтрумицаНет: Дали бевте задоволни?

Виолета: Да, задоволни од сознанието дека многу од нашите сограѓани станаа наши редовни посетители и потрошувачи. Најважно беше што кај нас не се продаваа само производите, несебично се делеа совети за користење на производите, бенефити, рецепти… Сите оние кои ќе се сетат на тој период знаат колку беше убава атмосферата во „Виона“, колкави интересни дискусии се водеа, секогаш беше полно со позитивни луѓе.

СтрумицаНет: Што следуваше понатаму?

Виолета: Умеат луѓето да препознаат кога нешто се работи со љубов, кога сакаш да им помогнеш без да гледаш финансиски интерес, па почнаа да се доверуваат со здравствени проблеми, заеднички да бараме начин како да се помогне преку исхраната.

СтрумицаНет: Дали имаше резултати?

Виолета: Фалба би било, а тоа не го сакам, но мора да кажам, голема е бројката на луѓе кои слушајќи ги нашите совети надминаа здравствени проблеми. Со многу од нив станавме пријатели за цел живот. Како што се ширеа добрите вести за нашето работење ,така и нашите потрошувачи стануваа се побројни. Асортиманот на производи беше се поголем: Органски производи, безглутенски производи, супер храни, семиња, апетисани, брашна, житарки, чаеви, додатоци во исхраната, органска козметика, сите со проверен квалитет.

СтрумицаНет: После „Виона“ се отворија уште неколку пордавници за здрава храна кои набргу се затворија. Што мислите, зошто се случува тоа?

Виолета: Работата со храна сама по себе е многу одговорна, а уште посложено е кога се работи со здрава храна. Се уште има луѓе кои сметаат дека здравата храна е за болни луѓе, па сметајќи се себе за здрави, не сакаат ни да погледнат, не пак да купат „здрава храна“. Затоа, сметам дека ако се нема посебна љубов за тој тип на работа тешко е да се издржи на пазар од храна кој е преплавен со разни, не толку здрави производи, но толку добро пакувани што привлекуваат да бидат одбрани од луѓе на кои не им е многу важно што јадат.

СтрумицаНет: Значи ли тоа дека љубовта кон работата е клучот за успех на „Виона“?

Виолета: Мора да ви потенцирам, „Виона“ е семеен бизнис, цело семејство сме вклучени, посветено работиме деноноќно и веруваме во тоа што го работиме. Не секогаш финансиската надокнада е адекватна на нашиот вложен труд, но во тешки моменти ќе ви повторам дека само љубовта кон работата е пресудна да продолжиме.

СтрумицаНет: Имате сопствено производство, што опфаќа тоа?

Виолета: Од февруари 2016 година започнавме со сопствено производство. Тоа беше моментот кога сфативме дека време е и практично да покажеме колку прекрасни и вкусни производи може да се прават со здрави намирници. Имаме сопствена работилница со стандардизирани услови за работа во која се прават производи од одбрани, квалитетни суровини без бели брашна, бел шеќер, без конзерванси, адитиви, бои и без подобрувачи на вкусови. Започнавме со неколку производи, а сега имаме преку 30 производи од сопствена рецептура.

СтрумицаНет: Дали се има потрошувачи за вакви производи?

Виолета: Мора да признаам дека се поголем е интересот за нашите производи. Сите оние кои сакаат здрав и вкусен доручок знаат каде да го побарат.

СтрумицаНет: Отворивте уше една продавница оваа година, што ќе кажете за неа?

Виолета: „Viona Healthy Food To Go“ е отворена со друг концепт, да одговори на брзиот ритам на живот. Производите да им бидат достапни на нашите потрошувачи на уште една локација, на најубавото место во градот, на плоштадот во Струмица. Овде освен за јадење, може да добиете свежо цедени сокови, топло чоколадо, органско какао, чаеви, квалитетно кафе од италијанскиот бренд Oro Cafe со 25-годишна традиција. Се на се замислено ни е како едно топло катче каде што секој кој сака може да проба нешто вкусно и здраво или да си го понесе за дома или на работа.

СтрумицаНет: Дали здравите производи се поскапи во однос на белите пецива?

Виолета: Ние за нашите производи секогаш се стремиме да имаме прифатливи цени. Само оние луѓе кои дома си имаат подготвувано слични производи знаат дека цените на нашите производи се многу реални, а не се ни повисоки од цените на белите пецива чија цена на чинење е далеку пониска.

СтрумицаНет: Како конкуренцијата на пазарот влијае на вашето работење?

Виолета: Конкуренцијата е голема, бидејќи во секој голем маркет има дел со здрава храна што не беше случај пред некоја година. Разликата е што таму нема некој што е заинтересиран и обучен да даде објаснување за производите, за што служат, како се приготвуваат, користат и слично. Додека, во нашата продавница освен производот ќе добиете информации за се што ве интересира околу него. Тоа е за конкуренцијата во трговскиот дел, што се однесува за производите што сами ги подготвуваме нескромно ќе ви кажам - немаме вистинска конкуренција. Би можеле да зборуваме за вистинска конкуренција ако сите работиме со исти квалитетни суровини со исти набавни цени. Тие суровини ние што ги користиме барем кај нас во Струмица, никој не ги користи. Ние во производствениот процес користиме хелдино, спелтино брашно, мед, рогач, цејлонски цимет, хималајска сол, киноа, просо, лешници, бадеми, ореви, маслиново масло, кокосово масло, какаово масло, кокосов шеќер. Секој што ги знае цените на овие продукти знае какви се трошоците и цената чинење на нашите производи. Не е исто да пробате производи од брашно кое чини 20 денари од килограм и брашно од 220 денари колиграм. Голема е разлигата, нели. Не е само во цената, уште поголема е разликата во квалитетот и бенефитот по здравјето на оној кој користи такви производи, но сепак секој сам одлучува за иста цена каков производ ќе одбере да јаде. Мене лично најмногу ме радуваше коментарот на луѓе кои доаѓаат од други градови, па и од други држави. Кога ќе слушнеме дека таков асортиман на здрави производи со таков состав нема ни во поголемите градови, знаеме дека сме на вистинскиот пат.

СтрумицаНет: А дали струмичани сакаат повеќе бели или здрави пецива?

Виолета: По мое мислење повеќето се љубители на бели пецива, но се повеќе ги има тие што предност дават на здравите производи. Јас лично немам некакви предрасуди околу тоа кој како се храни. Во мојот дом бел шеќер, бело брашно, бел ориз, бела сол, маргарин, паштети не се користат, но тоа не значи дека ако некаде на гости ме понудат со домашна кифличка од бело брашно ќе одбијам, сепак тоа е ретко.

СтрумицаНет: Што ќе им порачате на струмичани?

Виолета: Прво би сакала да им се заблагодарам од се срце на сите оние што се секојдневно со нас, на сите оние што веруваат во нас и нашето работење, што ги сакаат нашите производи. Верувајте, без нив и нивната поддршка немаше да издржиме, само тие ни дават поттик и желба уште повеќе да се трудиме и нема да ги изневериме, им ветувам. Би им препорачала на сите да внимаваат повеќе на здравјето. Можеби се раѓаме со добро здравје, но ако не се грижиме доволно за него ќе се соочиме со здравствени проблеми, кои не се пријатни и не секогаш завршуваат добро. Сакам да кажам дека здравата исхрана не е моден тренд кој ќе помине, здравата исхрана е стил на живеење, се гради постепено, но тоа е единствен начин да бидеме здрави, да мислиме и делуваме позитивно, а со тоа и бидеме среќни, бидејќи само здрав човек е среќен човек.

Од ЈПКД „Комуналец“ информираат дека поради настанат дефект на водоводна цефка, од утрово во прекин е водоснабдувањето на улицата „Елка Јанкова“ до потег со улицата „Маршал Тито“, како и улицата „Епименонда Поп Андонов“ до потег со улицата „Ристоман Попчевски“ во градот Струмица.

Екипи на јавното комунално претпријатие се на терен и работат на отстранување на дефектот. Нормализирање на водоснабдувањето се очекува денеска до 12:00 часот.

Ученици од струмичките средни училишта оваа недела по трет пат ја претставуваа Македонија на финалето од Светскиот ученички куп, кој се одржува на Универзитетот Јеил во Њујорк, САД.

Струмичките средношколци во конкуренција на околу 60.000 ученици од целиот свет, освоија 5 златни и 3 сребрени медали на оваа натпреварување, кое се одржува на англиски јазик, а кој бара пишување на есеи, познавања за општи теми, дебатирање и добри ораторски способности.

Од Струмица годинава на финалето заминаа пет ученици од трите средни општински училишта, Сара Заева и Светлана Иванова од СОУ „Јане Сандански“, Симона Крстева и Лилјана Бокан од СОУУД „Димитар Влахов“ и Михаил Шумаров од СОУ „Никола Карев“. Тие беа придружувани од професорката Верица Јанкова од СОУ „Јане Сандански“.

Инаку, струмичките средношколци овој турнир минатата година успееја да го донесат и во својот град, така што во месец април од страна на СОУ „Јане Сандански“ беше организирана локална рунда за турнирот, која беше посетена од околу 400 ученици, а преку која најдобрите се пласираа на глобалната рунда во Барселона, Шпанија.

Средношколци, професори по македонски јазик и новинари од Струмица на синоќешната интерактивна средба се запознаа со идните активности кои ќе бидат клучни за имплементација на проектот „Јутјуберска платформа за медиумска реформа“.

За лажните вести кои секојдневно ги среќаваме во медиумите, особено на „онлајн“ медиуми, како тие да се препознаат, говореа новинарите Ване Трајков и Сузана Мицева.

Во наредните шест месеци ќе бидат спроведени обуки во средните училишта од југоистокот, ќе се анкетираат околу 600 ученици на основа медиумска писменост, а од нив само 30 ученици ќе бидат дел од реализаторите на 30-те „јутјуб“ видеа чија содржина ќе биде медиумската писменост.

Како што кажа Стојне Митева, претседател на Здружението „Скај Плус“, основната цел на проектот е, заедно со средношколците да изградат платформа која ќе ги направи видеата достапни за нив, а ќе се однесуваат токму за медиумската писменост и како полесно да откријат лажни вести. Се надеваат дека ќе има видливи резултати кои преку видеата ќе овозможат полесен пристап до медиумско описменување на сите граѓани.

На овој настан, некои од средношколците имаа можност да бидат во улога на новинари, а новинарите нивни соговорници на кои им поставуваа прашања со микрофон пред камера.

Здружението на граѓани „Скај Плус“ од Струмица овој проект го доби како суб-грантист на проектот „Со критичко мислење до граѓани со медиумска писменост“, финансиран од Европската унија, а спроведен во земјава од Фондација Метаморфозис и Еуротинк - Центар за Европски стратегии.

Традиционално во дворот на Струмичката болница, лекарите и медицинскиот персонал го одбележуваат празникот Св. Козма и Дамјан - вечните лекари на болните и сиромашните.

Денеска на празникот на овие светци, пред темелите на малата црква која со години чека да се изгради, во кругот на ЈЗУ „Општа Болница“ во Струмица, се одржа празнична литургија за здравје на сите.

Годинашното, по осми пат одбележување, го организираше персоналот на Интерното одделение при оваа здравствена установа, предавајќи го кумството - славата на вработените во Одделението за неврологија и психијатрија, односно на началничката д-р Лиле Танева, која, како што ни рече, со надеж во оваа година на „нашето кумство“ за овој празник на двата светци, Одделението за неврологија и психијатрија се префрли во подобри услови, односно во главната болница на ЈЗУ „Општа болница“ Струмица.

Инаку, Свети Козма и Дамјан се многу познати во народот. Многу цркви им се посветени во Македонија, па и некои лекарски друштва го носат нивното име. Овој празник меѓу народот е познат како Свети врачи или едноставно како Световрача. Зборот врач (враж) и денес во некои словенски јазици (на пр. во рускиот јазик) значи лекар. Овие господови лекари наречени и Свети бесребреници имаат два празника на 1 јули (Свети врачи – летни) и на 1 ноември (според стариот календар).

ФОТОГАЛЕРИЈА

Ретко се прави ваков јубилеј, во бракот се вели „златна свадба“, во естрадните води да бидеш 50 години е успешна кариера со трајни вредности. Перо Христов, синоќа на големата сцена во Центарот за култура во Струмица одржа прекрасен концерт за 50-те години на естрадата, кои струмичани, оние што беа, ќе ја паметат два и пол часовната музичка приказна на Перо, збогатена се многу гости, колеги од естрадата.

На естрадната сцена стапна во далечната 1969 година, а веќе во 1972 година ја сними првата песна, „Капка среќа“, македонска забавна мелодија. Пееше забавно во тогашните ЈУ простори, во 1986-та зачекори и на фолк сцената, од тогаш пее народни и новосоздадени песни.

Неговиот музички израз, неговиот глас, цели 50 години го држат на македонската естрадна сцена, а притоа да се остане доследен на стилот, на секогаш добро одбрана песна што ќе ја пее тој, а да ја пее и публиката со години и години, не само генерациите од времето на создавањето на песната, тука и поновата генерација.

Во салата, на сцената, пееше тој, но и публиката со него, „Во црно вино утеха нема“, „Една ѕвезда, една солза“, „Ангелина“, „Заборави ме“, „Судбина било“ „Не можам љубов да кријам“, „Плачи срце, исплачи се“, „Ивона“, „Евридика“, но со него пееја и Благица Калева, Маргица Антевска, Кате од „Нели ти реков“, Игор Ангелов, Баже Моротов, Љубен Делев Бубата, Мирчо и Снежана од „Интервали“ и „Арија“, кои со своите инструменти ги придружуваа пејачите.

За концертот, беше издадено музичко ЦД со десетте најубави песни, како трајна вредност, насловено: „За многу години со моите најубави песни“.

„Во изминатите две години Општина Струмица потроши два буџета од по 19 милиони евра, или вкупно за овие две години нешто над 38 милиони евра. Дилемите на граѓаните оправдано се: Дали по две години или вкупно 14 години раководење на СДСМ со општината, локалната власт ги има реализирано ветените мерки и проекти што значат подобар и поквалитетен живот за сите граѓани“ – кажа Митко Дрвошанов на денешната прес конференција на советниците од Коалицијата „За подобра Македонија“.

Тие прашуваат дали по две години, се дише почист воздух во Струмица, како што се ветуваше, или станува збор повторно за уште едно паушално ветување.

Дрвошанов вели дека и ним, на советниците од неговата партија на секоја седница на која го отвораат оваа прашање им е дадено ветување дека се преземаат мерки.

„Но, изгледа или не се преземаат, или не се соодветни мерките, бидејќи со почетокот на грејната сезона се видоа и резултатите. Резултати кои покажуваат дека Струмица е еден од водечките градови по загаденост на воздухот во Европа“ – додаде Дрвошанов.

Тој го спомна и проблемот со кучињата-скитници по улиците, плоштадот, паркот, тврди дека и по две години ветување за решавање на овој проблем бездомните кучиња секојдневно напаѓаат граѓани и деца.

Говореше и за проектот на градоначалникот на Струмица од предизборната кампања, а кој неодамна беше воведен во основните училишта „Ужинка за секое дете“.

„Дали ветувањето пред две години во предизборната кампања, за ужинка за секое дете, по две години се претвори во проект „јаболко за секое дете“, секој ден, и тоа јаболка кои децата треба сами да ги измијат и излупат. За овој проект не постои родител кој се согласува или не го критикува“ – кажа Дрвошанов.

На денешната прес конференција на советничката група од Коалицијата „За подобра Македонија“, беше кажано дека вакви примери на неисполнети ветувања, нереализирани или лошо реализирани проекти, можат да се набројат многу.

Тие велат дека советниците од нивната коалиција делуваат како конструктивна опозиција. На сите седници за овие две години постојано се укажувало и давале предлози и решенија за сите проблеми, но по укинувањето на преносот на седниците, кој во изминатите години одеа во живо на телевизија, нивната работа не била толку визибилна за сите граѓани.

„Сакам да ве информирам дека работиме на изнаоѓање решенија како да имате увид сите граѓани што точно се дискутира на секоја седница. Конечниот одговор на прашањето: дали реализацијата на овие два буџета, односно потрошените 38 милиони евра, ги задоволуваат потребите и очекувањата, оставаме да го дадете самите Вие, почитувани граѓани“ – заврши Дрвошанов.

Вчера околу 09:00 часот на регионалниот пат Струмица – Валандово, патничко моторно возило „Фолксваген Пасат“, со велешки регистарски ознаки, управувано од В.М. (69) од Гевгелија, изгубило контрола и излетало од патот – информираат од СВР Струмица.

Во незгодата со тешки телесни повреди се здобил возачот, по што бил пренесен во Струмичката болница за укажување на лекарска помош.

Извршен бил увид на местото на настанот од увидна екипа од СВР Струмица.

Од ЕВН Македонија - КЕЦ Струмица информираат дека поради реализација на инвестициони зафати за подобрување на квалитетот во снабдувањето со електрична енергија, утре (среда, 13 ноември), од 09:00 до 14:00 часот без електрична енергија ќе останат корисниците на улицата „Кочо Рацин“ во Струмица - Детската градинка, Театарот во изградба и околината, а од  09:00 до 13:00 часот дел од улицата „Младинска“ во Струмица, односно од Месара „Лебед“ до поројот.

Членовите на Македонското друштво „Пирок“ од Швајцарија, во сабота на 16 ноември од 18:00 часот организираат голема Хуманитарна забава, на која ќе се собираат донации за лекување на повеќе лица од Македонија, меѓу кои и за струмичаните, Михаела Петрова од Куклиш, Никола Новоселски од Муртино, Ирена Танчева од Самоилово, Томе Jанев од Струмица.

Со секоја купена влезница посетителите донираат по 5 швајцарски франци за лицата на кои им се потребни средства за лекување, а средства ќе се собираат и со продажбата на традиционална македонска храна и слатки.

На забавата ќе настапат: Сузана Гавазова, Влатко Миладиновски, Дамјан Стојановски, Ферус Мустафов, група Болеро со Кико, Антонија Гиговска, Aлен Хасановиќ, Јане Крстев, Орхан и Анил, DJ Guro Miks & DJ Trend.

Како што информираат од Македонското друштво „Пирок“ собраните средства ќе се поделат и на Симона Хаџи-Тошева од Штип, Јане Николов од Зрновци, Лидија Ристевска од Битола, Михаил Митевски од Охрид, Огнен Стојков од Свети Николе и за Љупчо Бојановиќ од Звегор, делчевско.

Познатиот македонски пејач, некогаш на забавни мелодии во поранешната Југославија, а последните три децении во естрадните води на фолк музиката, струмичанецот Перо Христов, утре во Струмица ќе одржи концерт за 50-те години на естрадата.

Неговиот музички израз, неговиот глас, цели 50 години го држат на македонската естрадна сцена, а притоа да се остане доследен на стилот, на секогаш добро одбрана песна што ќе ја пее тој, а да ја пее и публиката со години и години, не само генерациите од времето на создавањето на песната, тука и поновата генерација.

Концертот започнува во 20:00 часот во големата сала на Центарот за култура „Антон Панов“, ќе ги пее големите хитови: „Во црно вино утеха нема“, „Една ѕвезда, една солза“, „Ангелина“, „Заборави ме“, „Судбина било“ „Не можам љубов да кријам“, „Плачи срце, исплачи се“, македонските евергрин мелодии од неговите почетоци „Ивона“, „Евридика“, а на концертот ќе настапат и неговите колеги: Благица Калева, Кате од „Нели ти реков“, Игор Ангелов, дуо Моротов, групите „Интервали“ и „Арија“.

Влезниците за утрешниот концерт на Перо Христов во Струмица се распродадени, а веќе е најавен уште еден концерт во Скопје на 20-ти ноември.

На концертот, Перо Христов ќе го промовира и музичкото ЦД со десетте најубави песни, како трајна вредност, насловено: „За многу години со моите најубави песни“.

Вo петок, 15 ноември, во 19:30 часот во галеријата на „Завод и Музеј“ во Струмица, ќе биде отворена изложба на струмичанката Верица Арапова насловена „Скриени откритија“, а во организација на Здружение за култура „Транзен“.

Верица Арапова е дипломиран архитект на Факултетот за Архитектура при Универзитетот „Св. Кирил и Методиј“ во Скопје, а целиот свој живот, паралено се занимава со сликарство и комбинирани техники. Во нејзиното портфолио има учествувано на бројни колонии и групни изложби. Користи комбинирана техника за нејзиниот ликовен израз, најчесто колаж со кој се движи од експресионизам до експериментален поп арт.

Оваа прва самостојна изложба, Верица Арапова ја работеше во изминатите две години, а во неа ќе бидат вклучени 25 дела, во кои обработува флорални теми од природата, како и од неисцрпните
инспирации на женскиот свет.

Делата во „Скриени откритија“, се сликарски пластови претопени еден во друг, кои се сокриваат еден со друг, живеат еден под друг - како посебни слики, а се откриваат секој посебно и само во очите на набљудивачот, зашто и зависат од неговата индивидуална перцепција, се гледаат одново и одново само преку неговото срце во секој единствен момент.

Петок, 15 ноември | 19:30 часот | „Завод и Музеј“ Струмица

Седум мигранти, од кои шест лица се од Сирија и еден од Ирак, вчера околу 09:00 часот се пронајдени од страна на полицијата во близина на угостителски објект на регионалниот пат Валандово – Струмица.

Како што соопштуваат од МВР, по преземени мерки, полициските службеници во близина на вештачко езеро во атарот на селото Белотино, струмичко, пронашле две патнички возила „Ауди А8“, со скопски регистарски ознаки и од слобода ги лишиле Н.Б. (31) и Б.И. (37), двајцата од Скопје, осомничени дека сториле кривично дело „криумчарење мигранти“.

За настанот бил известен Јавен обвинител, а увид на местото извршила екипа од СВР Струмица. Мигрантите биле предадени на полициски службеници од РЦ Север за понатамошна постапка.

Во многу поголем простор, целосен преглед на сите артикли и многу поширока понуда за потребите на потрошувачите, Струмичката компанија „РАЗНОПРОМЕТ АС“, која годинава го одбележа својот 25-годишен јубилеј, прави Реотворање на проширениот Продажно-изложбен салон во Струмица.

По повод Реотворањето, во петок и сабота (15 и 16 ноември), голем попуст кај сите над 30.000 артикли во „РАЗНОПРОМЕТ АС“, сега сместени на површина од 2500 м².

Почнувајќи од 5% до неверојатни 70% на сите, буквално на секој артикл сместен во проширениот Продажно-изложбен салон, каде може да се најде се за вашиот дом, како за изградба така и за опремување. На редовната цена на секој артикл ќе го видете попустот од 5 до 70%, а на касата ќе ви ја пресметат сумата за плаќање.

Сопственичката на „РАЗНОПРОМЕТ АС“, Елена Трајкова вели дека реотворањето на новиот проширен продажен салон на добро познатата локација на излезот од Струмица кон Дабиле е уште еден чекор во успешниот пат кој го поминуваат полни 25 години со задоволни клиенти.

„Тие освен што се наши клиенти, се и наши пријатели, бидејќи кај нас секогаш можат да најдат одговор на прашањата кои ги имаат, она што го барат ќе го добијат. Огромно задоволство е тоа што од денеска ќе нудиме уште подобра услуга и производи во овој модерен продажен салон“ – ни рече Трајкова.

Со почетокот на грејната сезона, во овие два дена „РАЗНОПРОМЕТ АС“ со попуст и за палетата на производи за греење на пелети, дрва, радијатори за систем на парно греење, електрични уреди за греење.

Предсезонски попуст од 20% на Новогодишните и Божиќните украси кои веќе се поставени во салонот. Не чекајте го декември за да си купите новогодишни украси по редовна цена, искористете го оваа Реотворање на салонот на „РАЗНОПРОМЕТ АС“ и обезбедете си украси со намалена цена од 20%.

„Се за Вас во Разнопромет АС“!

Од ЈПКД „Комуналец“ информираат дека е настанат дефект на водоводна цефка, па во моментот е прекинато водоснабдувањето на корисниците од улицата „Маршал Тито“ во Струмица од куќен број 1 до број 41.

Екипи на јавното комунално претпријатие се на терен и работат на санирање на дефектот. Нормализирање на водоснабдувањето се очекува денеска до 14:00 часот.

Одбојкарките на „Наковски Волеј“ од Струмица со убедливи победа на гостувањето кај „Ускана“ во Кичево во рамките на 4-то коло.

Девојките на Хари Наковски славеа со 3:0 во сетови (25:17, 26:24, 25:16). Ова е четврта победа за ОК „Наковски Волеј“, кој станува сериозен кандидат оваа сезона за една од титулите.