Министерството за внатрешни работи објави оглас за вработување на 600 полицајци. На огласот се бараат полицајци за секторите за внатрешни работи во Скопје, Струмица, Охрид, Битола, Тетово, Велес, Штип и Куманово како и за Регионалните центри за гранични работи – Север, Запад, Југ и Исток.

Кандидатите треба да ги исполнуваат следните општи услови: да е државјанин на Република Северна Македонија, да е полнолетен, а да не наполнил 25 години живот ако за првпат заснова работен однос на работно место во Министерството за кое е предвидено средно образование, активно да го користи македонскиот јазик и неговото кирилско писмо, со безбедносна проверка да е утврдено дека не постои безбедносен ризик од вработување на кандидатот, да има завршено најмалку четиригодишно средно образование, да е здравствено и психофизички способен и со правосилна пресуда да не му е изречена казна забрана на вршење професија, дејност или должност.

Кандидатите треба да ги исполнуваат следните посебни услови: потребна телесна висина од најмалку 175 сантиметри за мажи, односно 165 сантиметри за жени и висока лична физичка подготвеност.

Постапката за селекција на кандидатите ја спроведува Комисија за избор на кандидат за полицаец, формирана од страна на министерот, која го определува редоследот на фазите за селекција. Селекцијата се спроведува во следните фази: административна селекција на поднесената документација, проверка на моторички способности, психолошки тест, писмено тестирање, интервју, безбедносна проверка и здравствени прегледи.

Комисијата за следење на состојбата и ефектите од високите температури при Министерството за здравство апелира до граѓаните во следните денови да ги почитуваат општите препораки за заштита од високите температури. Според информациите од Управата за хидрометеоролошки работи (УХМР), во текот на следните два дена целата држава ќе биде зафатена со температури од жолта алертна фаза.

Граѓаните треба да се заштитат од директна сончева изложеност, избегнување престој на отворено во периодот од 11 до 17 часот, да носат светла и лесна облека, а при директна изложеност на сонце да носат заштитни очила и капа, доколку е можно во светли бои кои ја рефлектираат светлината.

Се препорачува консумирање лесна храна и течности, посебно да се внимава при подготовка и консумирање на храната, како и избегнување термички необработени производи, на пример мајонези од домашни јајца и внимателно да се консумира сладолед и разни кремови. Потребно е внесување поголемо количество течности, најдобро обична вода за пиење, а да се избегнуваат алкохолните пијалаци. При влегување во возило, потребно е тоа одреден период да се проветри.

Во текот на ваквите екстремно топли денови, се препорачува граѓаните да останат во затворени простории, пред се климатизирани, а при неопходен престој на отворен простор во овој период, да се најде можност за почести одмори под сенка.

На хронично болните лица им се препорачува редовно земање на пропишаната терапија.

Македонскиот одбојкарски шампион и освојувач на националниот КУП, екипата на „ЏИО Струмица“, пријави учество во Балканскиот КУП – регионално одбојкарско натпреварување, преку кое најдобриот ќе обезбеди учество во европското „ЦЕВ Челенџ“ натпреварување – пишува www.drnka.mk

Балканскиот КУП се игра турнирски во зависност од бројот на екипите што ќе се пријават. Од таа причина ОК „ЏИО Струмица“, освен што го пријавија сениорскиот тим во ова натпреварување, се пријави и како можен домаќин и организатор на турнирското натпреварување во салата „Парк“ во Струмица.

Филтер станицата во општина Босилово од вечерва е без струја поради настанатиот дефект од пожарот на трафостаницата на ЕВН Македонија кај Сушица.

Од Јавното комунално претпријатие информираат дека вечерва од 20:30 часот без вода за пиење се населените места кои се снабдуваат од хидросистемот „Иловица“, и тоа: Босилово, Бориево, Робово, Радово, Еднокуќево, Турново и Секирник.

Прекинот на водоснабдувањето ќе трае се до отстранување на дефектот со снабдувањето на електричната енергија.

Попладнево околу 16:00 часот избувна пожар во Трафостаницата 110/10 KV на ЕВН Македонија кај Сушица, при што е прекинато напојувањето со електрична енергија кон голем број населени места во Струмичкиот регион.

Противпожарната единица на Струмица со две противпожарни возила и пет пожарникари го изгасија пожарот. Направена е голема материјална штета, уништета е целата опрема. Во моментот се уште без струја се населени места од општините Босилово и Ново Село.

Екипи на ЕВН Македонија се обидуваат со превземање на електричната енергија од трафостаници од Струмица за да можат жителите од овој реон добијат електрична енергија. Но, според информациите на Радио СтрумицаНет, тешко до вечерва тоа да се случи.

Ѓорги Танушев е првото засилување за ФК „Академија Пандев“ од Струмица за новата фудбалска сезона 2019/2020.

Танушев е струмичко дете, а минатата сезона настапуваше за екипата на „Победа“ и ќе биде одлично освежување во средниот ред.

Покрај Танушев, во сениорскиот тим се вратени и Кристијан Велиновски, кој беше позајмен во „Брегалница“, како и Емир Скендери кој беше пратен на позајмица во „Кожуф“.

Здружението на граѓани Центар за истражувањa и анализи „НОВУС“, вчера во просториите на Домот на АРМ во Струмицаја одржа активноста „Обука за транспарентност и отчетност“, која беше наменета за партнерските организации како и останатите членови на граѓански здруженија, вработени во институции и локалната самоуправа и останатите граѓани.

Обуката се организира во рамките на проектот „Партнерството мотор на демократијата“ во соработка со општина Струмица, во рамките на проектот „Граѓанските организации во служба на локалната демократија“, финансиски поддржан од Европската Унија додека имплементиран од организацијата АЛДА - Европска Асоцијација за Локална Демократија, Здружението на финансиски работници на локалните самоуправи и јавните претпријатија и Европското движење на Република Македонија проект кој се реализира во периодот од 01.03.2018 – 01.03.2019 година.

„Со активностите од овој проект сметаме дека ќе придонесеме кон унапредување на демократските процеси на локално ниво со можност за влијание врз целокупните демократски промени во државата, врз основа на засилено влијание и интервенции на граѓанските организации во креирањето и спроведувањето на општинските политики“ – велат од здружението „НОВУС“.

Центарот за истражување и анализи НОВУС , во рамки на проектот „Партнерството мотор на демократијата”, финансиран од страна на Европската Асоцијација за локална демократија (АЛДА) од Скопје, Здружението на финансиски работници на локалната самоуправа и јавните претпријатија и Европското Движење, дел од ИПА програмата за поддршка на граѓанското општество и програмата за медиуми 2015 година, спроведува кампања „Будење”, како активност во овој проект.

Целта на овој проект е подигнување на нивото на свесност на граѓанските организации, граѓаните и општата популација за потребата од нивно учество во креирањето и спроведувањето на општинските политики во таа насока и силно влијание врз процесите на креирање и спроведување на политиките на властите, заради придонес кон унапредувањето на демократијата.

Здружението на граѓани Центар за истражување и анализи „НОВУС“ вчера спроведе активноста „Отворен ден со комисијата за образование, култура и млади и спорт при Советот на општина Струмица”, каде беа присутни околу петнаесеттина претставници од граѓанскиот сектор, младински активисти и граѓани. Од страна на комисијата присуствуваа советниците Ацо Георѓиев и Хатиџе Мемедова.

Координаторот на проектот Јасмина Пијанманова детално го објасни проектот пред присутните и ја објасни целта за која тие се повикани на овој отворен ден со комисијата за образование, култура и млади и спорт.

Отворениот ден со комисијата за образование, култура и млади и спорт се одржа со цел да се приближи работата на комисијата до граѓаните и носителите на одлуки на локално ниво да ги објаснат процедурите за носењето на одлуки на локално ниво.

На средбата се разговараше за исполнувањето на стратешките документи кои се донесени на локално ниво и колкав е степенот на нивното исполнување. Најмногу се разговараше за степенот на исполнување на Стратегијата за култура на општина Струмица 2017 - 2022 година. Прашањето од страна на присутните беа поставувани за финансирањето на програмите и проектите за култура, како се поднесуват проекти и како тие се финансираат. Од страна на присутните беше истакнато дека општина Струмица мора да води сметка за финансиите кои се издвојуваат за култура и да прави разлика што е култура, а што забава бидејќи не сите активности што ги финансира општината се сметаат за културни активности.

Како заклучок на средбата беше дека општина Струмица треба под итно да формира одделение за култура во општината со вработувања на вистински експерти од оваа област и формирање на советодавно тело за култура составено од разновидни профили на луѓе од областа на културата.

Центарот за истражување и анализи НОВУС, Струмица започна со спроведувањето на истражување за степенот на партиципативност на граѓаните и граѓанските организации и нивното учество во донесувањето на одлуки на локално ниво, како и нивното задоволство од достапноста на услугите што ги нуди локалната самоуправа.

Ова истражување е во рамките на проектот „Партнерството мотор на демократијата“, во соработка со општина Струмица регрантиран преку проектот „Граѓанските организации во служба на локалната демократија“, финансиски поддржан од Европската Унија имплементиран од Европска Асоцијација за Локална Демократија АЛДА, Здружението на финансиски работници на локалните самоуправи и јавните претпријатија и Европското движење на Република Македонија.

Како алатка за прибирање на потребните податоци е изготвен и анкетен прашалник кој треба да придонесе во истражувањето и даде увид во потребните податоци за регионот на општина Струмица.

Истражувањето ќе се прави на репрезентативен примерок на популацијата на општина Струмица и ќе бидат опфатени 250 испитаници.

Линк до прашалникот >>>

Здружение на граѓани Центар за истражувањa и анализи „НОВУС“ од Струмица, организираше Координативна средба помеѓу граѓанските здруженија и Здружението на граѓани Центар за истражување и анализи „НОВУС“.

Координативната средба се спроведе во рамките на проектот „Партнерството мотор на демократијата“ во соработка со општина Струмица во рамките на проектот „Граѓанските организации во работата на локалната демократија“, финансиски поддржан од Европската Унија додека имплементиран од организацијата АЛДА - Европска Асоцијација за Локална Демократија, Здружението на финансиски работници на локалните самоуправи и јавните претпријатија и Европското движење на Република Македонија, проект кој ќе се реализира во периодот од 01.03.2018 – 01.03.2019 година.

Средбата се реализираше со цел да направи вмрежување помеѓу граѓанските организации на локално ниво за создавање одржлив механизам на партнерство во функција граѓанските организации да станат активни чинители или фактори во процесот на креирањето, донесувањето и имплементацијата на општинските политики и во таа насока да се потврди нивното делување како коректив на власта.

„Со овој проект сметаме дека ќе придонесеме кон унапредување на демократските процеси на локално ниво со можност за влијание врз целокупните демократски промени во државата, врз основа на засилено влијание и интервенции на граѓанските организации во креирањето и спроведувањето на општинските политики“ – велат од Здружението „НОВУС“.

Од синоќа на кошаркарското игралише на СОУ „Јане Сандански“ во Струмица започна уличниот турнир во кошарка. Вкупно 16 екипи во наредните два дена ќе се борат за награден фонд од 40.000 денари.

На првата вечер се одиграа групните дуели меѓу екипите составени од 4 играчи, а атмосферата ја подгреваше DJ Tom.

Вечерва ќе се дознаат првите осминафиналисти кои ќе обезбедат настап на завршниот трет ден и ќе влезат во потесна конкуренција за медали.

И публиката се наградуваше, за тројки и лични, со ваучер од 1.000 денари, пернички од „АЛМАК“ Струмица и крпи од „Фротирка“ Делчево.

На финалето најхрабите ќе играат на битовите на DJ Popeye и Дивизија. 

Од ЕВН Македонија – КЕЦ Струмица информираат дека утре (среда, 12 јуни), од 08:30 до 12:30 часот, без електрична енергија ќе биде дел од улицата „Младинска“ во градот Струмица, односно околу месарница „Лебед“ и аптека „Еликсир“, дел од улиците „Александар Македонски“ и „Ѓорги Трајков“.

Истиот ден од 04:00 до 05:00 часот прекин на електричната енергија во селата: Зубово, Мокриево, Мокрино, Борисово, Колешино, Габрово, Радово, Босилово, Бориево, Моноспитово, Турново, Секирник, Сушица, Иловица, Штука, Ново Село, Барбарево, Стиник, Старо Коњарево, Дражево, Смолари, Ново Коњарево, Самоилово, Бајково, дел од Банско, Граничниот премин „Ново Село“, Краварник Сушица, „Колид“ Колешино, Централи „Фотопарк“ и „Гринсолар“ Смолари.

Прекинот е поради реализација на инвестициони зафати за подобрување на квалитетот во снабдувањето со електрична енергија.

Одлична улична атмосфера на синоќешниот „Street summer jam“ со „One Way Dance Studio“ во рамките на „Струмица ОПЕН фестивал 2019“.

Доне Киров, Тоти Николов, Игор Митев и Јана Мицева беа артистите кои го збогатија „street art“ ќошето.

Атмосферата кулминираше со битките во танцување за деца и јуниори, а за крај, членовите на студиото „One Way“ ја почестија публиката со свои групни кореографии на сцената кај СОУ „Јане Сандански“ во Струмица.

ФОТОГАЛЕРИЈА

Во срцето на градот, покрај големиот градски парк, пицерија „Бонита“ од Струмица веќе цели 25 години е сврталиште за оние кои сакат врвна услуга, квалитетна и вкусна храна, одличен амбиент и беспрекорна гостопримливост.

Од мала пицерија, „Бонита“ сега стана вистински центар за одмор, релаксација и вкусен залак. Од година во година овој ресторан постојано се надоградуваше во интерес на гостите и сите кои знаат што е квалитетна пица, со голема палета на специјалитети и неверојатен амбиент кој наликува на ресторан од светските метрополи.

Пицерија „Бонита“ по повод јубилејот 25 години постоење од синоќа блесна во ново руво притоа задржувајки ги сите епитети на вистински пица ресторан за кои отоворено зборуваат, ресторан кој постојано излегува во пресрет на гостите и посетителите за сите сладокусци, за гурманите, за жедните за незаборавна забава.

Пицерија „Бонита“ во сопственост на Боби и Рони Јаневи, отворено најавуваат дека и во иднина ќе бидат во функција на сите посетители, бидејќи секој гостин за нив ќе биде привилегија да биде вистински услужен во пријатна и одлична атмосфера со огромна понуда на специјалитети и беспрекорна услуга.

„Бонита“ како и досега, така и во иднина ќе има дневна и ноќна шема, стои за организирање семејни прослави, а во вечерните часови не се исклучува можноста да има забава со музика во живо пред се за одлично расположение на гостите.

ФОТОГАЛЕРИЈА

Викендот во Струмица на општинското игралиште со вештачка трева „Филип Лазаревски“, се одржа вториот Меморијален турнир во чест на починатиот млад фудбалер на „Академија Пандев“, Филип Лазаревски.

Победник е екипата на Фудбалската Федерација на Македонија, а на турнирот, кој е од меѓународен карактер, учествуваа четири екипи. Освен екипата на ФФМ, составена од фудбалери од фудбалската паралелка од Скопје, настапија и фудбалерите родени 2002 на ФК „Академија Пандев“, генерацијата каде настапуваше Лазаревски, ФК „Реал Ниш“ од Србија и ФК „УВВ Утрехт“ од Холандија.

Турнирот се играше по форматот секој со секого, при што секоја екипа одигра по три натпревари. Селекцијата на ФФМ со три победи и вкупно 9 освоени бода беше најдобра и го освои турнирот. Втори беа домаќините, фудбалерите на „Академија Пандев“, третото место го освоија гостите од Србија, екипата на „Реал Ниш“, а последен на турнирот беше тимот од „УВВ Утрехт“ од Холандија.

За најдобар голман на турнирот е прогласен Димитрија Стевановиќ од тимот на „Реал Ниш“, признанието најдобар играч го доби Мете Максимов  од селекцијата на ФФМ, а за најдобар стрелец е прогласен Кире Митков од „Академија Пандев“.

Наградите и признанијата на најдобрите екипи и поединци им ги доделија претставници од семејството на Филип Лазаревски, но и од „Академија Пандев“.