Од ЕВН Македонија – КЕЦ Струмица информираат дека утре (среда, 29 јули), од 09:00 до 15:00 часот без електрична енергија ќе останат корисниците во Петралинци, Старо Балдовци, Хамзали и индустриските објекти околу Рудник Огражден (Хамзали), Чанаклија, Манастир Хамзали и Дрвош.

Прекинот е поради реализација на инвестициони зафати за подобрување на квалитетот во снабдувањето со електрична енергија.

Бугарската влада одлучи делумно да ги олесни мерките за влез во земјата за пет држави, меѓу кои и Македонија, при што македонските државјани ќе можат да влезат во Бугарија само со негативен ПЦР тест, н епостар од 72 часа.

Освен од Македонија, со приложен ПЦР тест, во Бугарија ќе можат да влезат и државјани на Србија, Молдавија, Израел и Кувајт.

Според бугарската Влада, одлуката за овие олеснувања е на барање на туристичкиот сектор во земјата.

МВР информира дека во саботата во 21:40 часот врз основa на меѓународна потерница од Холандија, од полициски службеници од Полициска станица Ново Село, бил приведен Л.Ф. (50) од Швајцарија. Од судија му е одреден притвор до понатамошна постапка за предавање на холандиските власти.

Министерството за внатрешни работи од денеска, согласно постоечките законски одредби за функционирањето на т.н. техничка влада, повторно ги врати на старите раководни функции 14 раководни лица на исто толку организациони единици во министерството, кои беа на овие позиции и пред формирањето на техничката влада.

Во СВР Струмица, Танчо Пројковски повторно е именуван за началник на Секторот за внатрешни работи Струмица на местото на досегашниот началник, Васил Тодоров.

Започна роденденската недела во „РАЗНОПРОМЕТ АС“ во Струмица за својот 26 роденден, а која ќе трае до сабота 1 август со попуст од 10% до 70% на се што има таму, на сите над 40.000 артикли сместени во продажниот простор од 2500 м².

„РАЗНОПРОМЕТ АС“ се наоѓа од левата страна на излезот од Струмица кон Дабиље...

ФОТОГАЛЕРИЈА

ВИДЕО

Во Фудбалската Федерација на Македонија, денеска точно напладе се одржа ждрепката за новата сезона во прволигашката конкуренција. Новата сезона во Првата македонска фудбалска лига која годинава ќе брои 12 екипи, ќе започне на 9 август.

Струмичките прволигаши ФК „Академија Пандев“ и ФК „Беласица“ првото соочување ќе го имат на 1 ноември на стадионот „Благој Истатов“, домаќини ќе бидат „пандевци“, а реваншот ќе им биде на 3 март следната година.

Во првото коло „Беласица“ ќе игра со „Силекс“ од Кратово на домашен терен во Струмица, додека „Академија Пандев“ ќе бидат на гости во Битола каде ќе играт со „Пелистер“.

Екипата на „Академија Пандев“ на 16 август се домаќини на скопски „Вардар“, деодека „Беласица“ истиот ден му гостува на „Работнички“ во Скопје.

Во продолжение преземете го комплетниот распоред на натпреварите за натпреварувачката сезона 2020/2021 во Првата македонска фудбалска лига >>>

Под влијание на многу топла воздушна маса од утре до петок времето ќе биде сончево и многу топло. Максималните температури насекаде ќе бидат над 30 степени, а во југоисточните делови од земјава ќе достигнат и до 40 степени, информираат од УХМР.

Средниот блокер Ристо Николов, потпиша нов договор со ОК „ЏИО Струмица“ и ќе остане член на последниот освојувач на двојната круна кај нас.

Нашиот одбојкарски репрезентативец целата играчка кариера на домашната сцена ја мина во „ЏИО Струмица“, а неговото присуство во тимот ќе му помогне на тренерот Кире Ричлиев да создаде игра за остварување на клупските амбиции во сезоната 2020/2021. Тоа значи напад на титулите во првенството и во Купот и што подобро претставување на интернационалната сцена.

Претходно, раководството на „ЏИО Струмица“ потпиша договори со Владо Милев и со Васе Михаилов со што значително ја засили конкуренцијата на примачката позицијата. Со оглед на овие потези, јасно е дека екипата ќе располага со искуство како значајна компонента, а според најавите, клубот планира и процес на подмладување, односно засилена активност во работата со младите категории заради создавање одбојкари коишто ќе бидат основа на струмичкиот состав во подолг временски интервал.

Исплатата на пензии за месец јули почнува од утре, вторник, 28 јули. Подигнувањето на пензиите преку филијалите и експозитурите на банките за пензионерите кои не користат картички ќе се реализира во четири групи, според висината на пензијата:

– Во вторник, на 28.07.2020 година исплата на пензии со висина до 11.000 денари,
– Во среда, на 29.07.2020 година исплата на пензии во висина од 11.001 денари до 14.000 денари,
– Во четврток, на 30.07.2020 година исплата на пензии во висина од 14.001 денари до 18.000 денари,
– Во петок, на 31.07.2020 година исплата на пензии во висина над 18.000 денари.

Пензионерите кои користат платежна картичка поврзана со сметката на која се префрлува пензијата, со парите можат да располагаат од утре (вторник, 28 јули). Тие можат да ја подигнат јулската пензијата на банкомат, да ги користат средствата за плаќање во трговската мрежа или за електронски плаќања.

„Етапното процесирање на пензиите ќе овозможи спроведување на препораките и мерките за спречување и ширење на вирусот, со оглед на тоа што пензионерите како возрасна група се најранливи.

Министерството за труд и социјална политика укажува дека пензиите се сигурни на сметките на корисниците, пензискиот систем е стабилен и функционира без проблеми. Апелираме до пензионерите да се придржуваат до распоредот за исплати, затоа што етапната исплата е направена со цел да се намали метежот пред банките и можностите за загрозување на личното и јавното здравје.

Потсетуваме на обврската за носење лична заштитна опрема којашто ги покрива пределот на носот и устата како и на држење растојание при чекање ред пред и внатре во банките“ – стои во соопштението на Министерството за труд и социјална политика.

Делегатите на Собранието на Ловното друштво „Беласица“ од Струмица, повторно го избраа Марјан Даскаловски за претседател на Ловното друштво со мандат од четири години.

На годишното Собрание кое денеска се одржа во Домот на АРМ во Струмица, педесетте делегати едногласно по петти пат го избраа Даскаловски да го раководи едно од најстарите ловечки друштва во Македонија, со 74 години организирано постоење и растеж на ловството во Струмица и струмичкиот регион.

„Горд сум што ја добивам по петти пат поддршката од делегатите. Знаат дека ЛД „Беласица“ се води чесно и одговорно. Сите заедно направивме друштвото да биде респектирано и едно од највлијателните во нашата држава. Во следните четири години ќе работиме напорно за да останаме пример за другите. Горд сум на својот Управен одбор, на мојот ловник Димитар Арапов како мој прв соработник, на ловочуварската служба и на сите комисии. Кога имаш ваков тим, лесно се остваруваат замислените цели. Нашето членство знае дека нема да ги разочараме“ – кажа Даскаловски по реизборот за претседател на Ловното друштво „Беласица“.

Во последните 24 часа регистрирани се 152 нови случаи на ковид-19 од направените 1077 тестирања, од кои четворица во Струмица. Тројца мажи на возраст од 40, 46 и 53 години и една жена на возраст од 45 години. Денеска Институтот за јавно здравје регистрира 70 оздравени пациенти. Нема починати...

Денеска на 64-годишна возраст почина Бранко Џибулов од Струмица, еден од првите македонски акустичари.

Џибулов беше дел со групата „Макакус“, добитник е на втората награда на акустичарската гитаријада во Нови Сад, а неговите песни долго време се емитуваа на програмите на Радио Скопје.

Посмртните останки на Бранко Џибулов ќе бидат изложени утре, (недела) од 12:00 до 13:00 часот во Градската капела во Струмица, а погребот ќе се изврши во 13:00 часот на Градските гробишта.

Силен пороен дожд попладнево ја зафати струмичката котлина. Неколку улици во градот, меѓу кои булеварот „Маршал Тито“ и улицата „Младинска“ се поплавени.

Струмичкото комунално претпријатие соопшти дека има свои екипи на терен кои помагаат на најкритичните места. Од таму на социјалните мрежи споделија фотографии од улицата „Младинска“ во близина на крстосницата со „Крушевска Република“, на која се гледа дека целата улица, вклучително и тротоарот, е поплавена.

Струмичани на социјалните мрежи информираат дека и други места во градот се погодени од силниот дожд со ветер, кој се случи околу 17:00 часот. Поплава имаше во подземната гаража од плоштадот „Гоце Делчев“ во Струмица, водата се извлекуваше со пумпи. И на кружниот тек пред главната пошта и уште неколку улици во долниот дел на градот имаше огромни количини на вода, која направи застој во сообраќајот, но со намалување на врнежите водата се повлекуваше.

Граѓаните информираат и за скрешени дрвја во градот, а гром удрил на викендица кај браната Водоча, повредени нема, а по настанувањето пожар од гром, интервенирале соседите околу викендицата и брзо го изгаснале пожарот.

Од Противпожарната единица на Струмица информираат дека денеска пред 10:00 часот интервенирале во Банско каде бил опожарен автомобил „Опел“.

Четири пожарникари со едно противпожарно возило учествувале во гаснењето на запалениот автомобил, но како што велат од Противпожарната единица, поради големата оддалеченост и лесно запаливите материјали, пожарот бил во поодмината фаза и е ликвидиран за 5 минути по пристигнувањето.

Автомобилот е целосно уништен, а причините за настанувањето на пожарот дополнително ќе се утврдуваат.

Од ЈПКД „Комуналец“ Струмица со апел до граѓаните, водата да се користи во домаќинството, а не за наводнување на површини.

Имајќи во предвид дека водата за пиење претставува скапоцен ресурс и дека треба рационално и одговорно да се троши, апелираме до граѓаните да не ја користат водата што е наменета за пиење за наводнување на земјоделските култури, тревници и дворни места особено во летните периоди, бидејќи капацитетот на резервоарите за вода не е предвиден за наводнување на земјоделски култури, туку единствено за пиење и за потребите на домаќинствата и доколку водата за пиење се троши ненаменски, во руралните средини се јавува недостиг од вода за домаќинствата – стои во соопштението на ЈПКД „Комуналец“.

ЈПКД „Комуналец“ Струмица се грижи за непрекинато снабдување со квалитетна питка вода на сите корисници, меѓутоа поради несовесно однесување на некои граѓани, посебно во летниот период, доаѓа до краток прекин на водоснабдувањето.

Откако ги обезбеди услугите на Владо Милев, „ЏИО Струмица“ потпиша договор со уште еден македонски репрезентативец, Васе Михаилов.

Искусниот, 34-годишен одбојкар, којшто игра на позицијата примач, цела кариера од натпреварувачката 2005-та/2006-та до лани ја мина во својот матичен клуб, а минатата сезона настапуваше за ОК „Вардар“. Само по една година во главниот град, Михаилов реши да се врати во Струмица, преземајќи две улоги. Покрај играчката, тој ќе има обврска да работи и со младите одбојкари во клубот којшто во последната деценија доминираше во македонската одбојка.

Со оглед дека долго беше најдобар играч во домашниот шампионат и во купот, Михаилов постојано го носеше дресот на нашата репрезентација, што значи дека е освојувач на три сребрени медали во Европската лига, а ја заработи и честа да игра на Европското првенство 2019-та, дебитантско за нас.

Со ангажманот на Михаилов, кој ќе биде старо-нов капитен на екипата, а претходно и на Милев, „ЏИО Струмица“ значително ја засили примачката дијагонала пред да се обиде да обезбеди уште неколку звучни имиња во составот. Амбиција на клубот е есенва да се врати на европската сцена со учество во Челенџ купот на ЦЕВ, да биде најсериозен кандидат за освојување на двојната круна кај нас, но и да го засили процесот на создавање квалитетна конкуренција во младинските категории од коишто наскоро би произлегле новите ѕвезди на струмичката и на македонската одбојка.