Во последните 24 часа направени 1648 тестирања, а регистрирани се 383 нови случаи на ковид-19. Во Струмица 20 новозаболени, а еден оздравен од вкупно 95 во цела држава.

Со полагање свежо цвеќе пред Споменикот на револуцијата во градскиот парк, Струмица го одбележи 11-ти октомври – Ден на востанието на македонскиот народ и Ден на борецот, 11-ти октомври.

Под мотото „Ние за Вас“, на плоштадот во Струмица се одржа Октомвриски хепенинг за подигање на јавната свест и прифаќање на лицата со Даунов синдром.

Организатор на овој настан, со кој се одбележува месецот октомври, посветен на лицата со Даунов синдром е Здружението за помош и поддршка на лицата со Даунов синдром „ВЕРА“ од Струмица.

Свирка во живо, мини базар, продажна изложба на слики насликани со устата на Роза Мојсовска, изложба на фотографии со деца со посебни потреби - „Можам да бидам“, беа дел од октомврискиот хепенинг.

Отсекот за криминалистичка полиција при СВР Струмица, на 9 и 10 октомври, по претходни оперативни сознанија, во селото Иловица, струмичко, од слобода лиши три лица поради сомнение дека извршиле повеќе тешки кражби во куќи на подрачјето на Струмица и околните села, информираат од струмичката полиција.

Во СВР Струмица биле приведени Ш.М.(32), С.М.(18), двајцата од Иловица и 17-годишен малолетник од Свидовица. Во врска со кражбите, на разговор во СВР Струмица бил повикан и Ш.М.(18) од село Иловица.

Министерството за здравство информира дека во последните 24 часа направени се 2464 тестирања, а регистрирани се 393 нови случаи на ковид-19, од кои 15 и во Струмица.

Според завршените епидемиолошки анализи во моментов Струмица е со 245 активни случаи.

Голем е бројот на пациенти кои се примаат во болниците, само вчера во болницата „8 Септември“ се примени пет пациенти, а на Инфективната клиника во Скопје се примени 13, соопшти министерот за здравство Венко Филипче денеска на прес-конференција.

Тој апелираше да се почитуваат мерките за превенција од ковид-19, да се носат маски и да се одржува дистанца, се со цел да се забави ширњето на вирусот.

СВР Струмица иформира дека вчера околу 08:00 часот во Струмица е приведено лицето П.К. (32) од Струмица, затоа што при претрес во неговиот дом и други простории, извршен со судска наредба, биле пронајдени и одземени марихуана, шприцеви со црна течност и дробилки со остатоци од марихуана.

Инспекциските служби за време на викендот без ДДВ, (10, 11 и 12 октомври 2020 година), ќе продолжат со интензивни контроли на терен, во делот на почитување на здравствените протоколи, како и на цените на производите, информираат од Владата.

Државниот пазарен инспекторат (ДПИ) ќе спроведува контроли со цел да се спречат можни манипулации со цените на производите. Конкретно ДПИ ќе врши контрола дали цените на производите воведени во трговските книги на трговците, соодветствуваат со истакнатите цени на производите. Паралелно ДПИ, ќе спроведува интензивни контроли во однос на почитување на здравствените КОВИД протоколи во моловите и трговијата на мало (маркети, бутици итн). Конкретно, во моловите, дали се почитуваат мерките во делот на одржување на физичко растојание меѓу купувачите и продавачите од 1,5 до 2 метри, работно време, дали е обезбедена заштитна опрема (маски и ракавици), одржување на ред за влез во продавниците, обезбедени средства за дезинфекција, редари, регулирање на бројот на купувачи согласно квадратурата на продавницата, ред при пробување во продавниците за облека, обeлежани места за чекање пред касите и друго. Во делот на трговијата на мало, ќе се контролира почитувањето на протоколите во однос на запазување на големината на објектот и дозволеното присуство на бројот на купувачи, заштитна опрема за вработените (маски и ракавици), редарска служба, соодветни ознаки за правец на движење. За непочитувањето на здравствените протоколи предвидени се глоби во зависност од големината на трговците.

Од страна на ДПИ се преземени сите активности за превенирање на можни пропусти за време на викендот без ДДВ, за што се известени поголемите трговци и менаџери на моловите.

Воедно, продолжуваат интензивните контроли од страна нa сите инспекциски служби во зависност од нивните надлежности (Државен санитарен и здравствен инспекторат, Агенција за храна и ветеринарство Државен инспекторат за транспорт, Државен инспекторат за труд, Агенција за лекови), во однос на почитување на здравствените протоколи.

Таканаречениот викенд без ДДВ за првпат ќе се случи овој викенд, на 10, 11 и 12 октомври. Тоа всушност ќе биде продолжен викенд кој ќе трае три дена, бидејќи ќе има и еден споен неработен ден поради празникот 11-ти Октомври.

Во привилегиите од овој викенд ќе може да уживаат само корисниците на апликацијата „МојДДВ“, кои ќе купат домашни производи и услуги или компјутери и друга ИТ опрема во вредност од најмногу 30.000 денари. Повратот на целиот платен ДДВ ќе го добијат назад во рок од неколку дена на своите сметки.

Граѓаните имаат многу нејаснотии околу начинот на кој ќе се одвива пазарењето за време на викендот без ДДВ, колкав максимален износ можат да добијат како поврат, што можат да купат, од каде, колкава количина итн.

Генерално за да им биде вратен ДДВ во целост, граѓаните ќе мора да купуваат исклучиво македонски производи или услуги. Целиот износ на ДДВ ќе им биде вратен на граѓаните и доколку купат компјутер, печатач, скенер, софтвер или сè што спаѓа во ИТ опрема.

Короната урива рекорди во Македонија, но и во Струмица. 386 нови случаи во државата од направените 2267 тестирања, а во Струмица 44 новозаболени. Има и 15 оздравени пациенти во Струмица од вкупно 154, евидентирани во Институтот за јавно здравје.

Во Ковид-центарот во Градската општа болница „8 Септември“ во Скопје, каде има капацитет за најмногу 50 пациенти, до утринава до 8:00 часот има 42-ца хоспитализирани со Ковид-19, потврди за Фактор, директорот, д-р. Христијан Костов.

„До 14:00 часот болничките кревети ќе бидат целосно исполнети. Нема повеќе место. Од утринава примив безброј телефонски повици за да хоспитализираме болни од ковид, но еве велам дека сè пополнето. Најмногу пациенти, освен од Скопје, се примени од Струмица и тоа станува збор за исклучително тешки случаи. А, ГОБ „8 Септември“ мора да функционира со сиот свој капацитет, и технички и кадровски, за пациенти кои не се заразени со коронавирусот“, појаснува за Фактор, д-р. Костов.

Од ЕВН Македонија – КЕЦ Струмица информираат дека утре (петок, 9 октомври), поради реализација на инвестициони зафати за подобрување на квалитетот во снабдувањето со електрична енергија, на територијата на општина Струмица ќе има прекини, и тоа:

Од 08:00 до 09:30 часот без електрична енергија ќе биде СОУ „Никола Карев“ во Струмица.

Од 09:00 до 13:00 часот – дел од селото Куклиш, улицата кон „Москов МС“ и млекарата.

Од 10:30 до 12:00 часот – Објекти на патот за Добрејци, како и бензинските станици „Лукоил“ и „Ангел Петрол“ на излез кон Радовиш.

Прекини со исклучување од 09:00 до 11:00 часот и од 12:30 до 13:30 часот ќе има во селата: Куклиш, Банско, Свидовица, Попчево, Рич, Белотино, Триводи, Костурино, Дорломбос и Мемешли.

Полициски службеници на МВР во вчерашната акциска контрола во Струмица санкционирале 116 возачи, шест мотоциклисти, а евидентирале 32 нерегистрирани возила кои биле во сообраќај.

„Министерството за внатрешни работи во текот на вчерашниот ден спроведе засилена акциска контрола во областа на сообраќајот на територијата на Струмица. Притоа изречени се вкупно 116 санкции, меѓу кои 32 за измината важност на сообраќајната дозвола (нерегистрирани возила), а санкционирани се и шест мотоциклисти“ – стои во денешното соопштение на МВР, најавувајќи дека сообраќајните контроли продолжуваат и во наредните денови.

Од МВР апелираат до граѓаните да ги почитуваат сообраќајните правила и прописи за да се зголеми безбедноста во сообраќајот.

Носењето заштитни маски ќе биде задолжително секаде, на отворен и затворен простор, а од ова правило ќе бидат исклучени единствено децата помали од шест години, соопшти министерот за здравство Венко Филипче.

„Се забранува групирање на повеќе од четири лица на јавен простор после 22 часот. Забрана на семејни поголеми прослави во домашни услови, се забранува групирање на слави и собири во групи во домовите. Освен оние кои живеат на адресата, дозволено ќе биде да има најмногу четири гости“, овие нови предлог мерки на Комисијата за заразни болести ги најави министерот Филипче, кои веќе се доставени до Владата на освојување.

Во Македонија во последните 24 часа направени се 2140 тестирања, а регистрирани се 364 нови случаи на ковид-19. Струмица во изминатото деноноќие со нови 21 лице позитивни на коронаворусот. Бројката на активни запоболени во Струмица достигна 202 заболени.

Гужвите пред банките во Струмица со недржење физичка дистанца се едни од можните причинители за ширењето на коронавирусот во Струмица, кој во изминатиот период е со голем број на активни случаи. Поради актуелната состојба, по средбата со угостителите, градоначалникот Коста Јаневски и началникот на струмичката полиција, Танчо Пројковски, заедно со локалниот Совет за превенција, одржаа средба со претставници на сите банки кои работат на територијата на општина Струмица.

Да превземат под итно мерки за почитување на препораките за заштита од коронавирусот, при влез во и излез од внатрешноста на деловните единици или простории на банките и штедилниците во кои се примаат клиенти. Полицијата од нив директно побара ангажирање на професионални агенции за обезбедување, а не со обични редари.

Дел од банките на денешниот состанок кажаа дека пред своите експозитури имаат ангажирано редарски служби. Дел од нив и професионални агенции за обезбедување, за да се стави ред за влез во банките.