67-годишен струмичанец, кој пред два дена беше објавено дека е позитивен на ковид-19 и се лекуваше на Инфективното оддление при ЈЗУ „Општа болница“ во Струмица, почина. Во државата денеска се евидентирани три починати лица со ковид-19, освен во Струмица и едно лице во Скопје и едно во Дебар.

Во последните 24 часа направени се 1312 тестирања, а регистрирани се 123 нови случаи на ковид-19. Денеска Институтот за јавно здравје регистрира 74 оздравени пациенти.

СВР Струмица информира дека вчера околу 16:00 часот на регионален пат Струмица - Берово, поточно на делница село Дабиле кон село Петралинци, настанал пожар во кој биле опожарени земјоделски површини, пластеници и засаден пипер, овоштарник со 70 стебла сливи, 1 орев, 1 помошен објект - шупа во кој имало жито, ракија и зајаци, расцепени огревни дрва, една моторна алатка фреза, една приколка за моторно возило, систем за наводнување капка по капка и клас од пченка, кои биле сопственост на лица од село Дабиле.

ТППЕ Струмица со четири ПП возила и 12 пожарникари интервенираше на гаснење на пожарот. Пожарот е локализиран и ликвидиран околу 18:40 часот. Причинета е голема материјална штета.

Увид на местото извршиле инспектор од Дирекција за заштита и спасување и екипа од Секторот за внатрешни работи Струмица.

Пред 8 години, на денешен ден 23 јули, над Струмица избувна пожар што се прошири на поголемиот дел од ридот, во кој трагично загинаа браќата Блажо Стојков и Пено Стојанов од Рич, Мите Ѓоргиев од Струмица и Војо Гркљанов од Вељуса, а 11-мина беа повредени.

Човечкиот фактор беше причина за големиот шумски пожар, кој предизвика голема трагедија што вечно ќе ја паметат струмичани. Огнената стихија напиша злокобно сценарио и ја зави Струмица во црно.

Македонскиот одбојкарски репрезентативец Владо Милев потпиша договор со матичниот клуб ОК „ЏИО Струмица“ и по 13-годишна интернационална кариера повторно ќе игра во нашиот домашен шампионат.

Покрај тоа што ќе биде големо играчко засилување за најуспешниот тим во последната деценија кај нас, Милев ќе ја извршува и функцијата спортски директор, обидувајќи се да го пренесе своето искуство во исполнувањето на стратешките интереси на клубот.

Откако ја напушти „ЏИО Струмица во 2007 година, Милев ја градеше клупската кариера во 11 клубови во девет земји. Во репрезентативниот сегмент, одбојкарот којшто игра на позиција примач, беше дел од сите успеси на македонскиот национален состав во последните години. Лани Милев имаше одлични бројки во нашето дебитантското учество на европските првенства, во групата во Љубљана, а претходно на неговите гради завршија три сребрени медали од Европската лига во периодот од 2015-та до 2017-та.

Според најавите од „ЏИО Струмица, по ангажманот на 33-годишниот Милев, клубот ќе направи напор да потпише со уште неколкумина репрезентативци, а од претстојната сезона најавува посериозни вложувања во младинските категории преку почетна селекција на таленти од струмичкиот регион и ангажирање тренерски тим којшто ќе се грижи за нивниот развој.

„ЏИО Струмица“ има амбиција да се врати на европската сцена по подолго време, односно да ја искористи можноста за учество во Челенџ купот на ЦЕВ. Според клупскиот рејтинг којшто се гради врз база на резултатите од минатите сезони, македонската одбојка има право на по еден учесник во машка и во женска конкуренција во Челенџ купот, а со специјална дозвола на ЦЕВ постои можност да се пријави уште по една екипа.

Екипа од Одделението „Комунална хигиена“ при ЈПКД „Комуналец“ Струмица по втор пат годинава почна со прскање против коров и треви во каналот долж улицата „Крушевска Република“ .

„Со ова акција по хемиски пат се уништуваат коровот и сите други растенија кои започнаа да растат во текот на летниот период. По неколку дена се продолжува со собирање на исушениот материјал и губре, се со цел каналот без проблеми да може да ја прими целата надојдена вода од летните поројни дождови со што се превенира од поплави на овој дел од градот, а воедно и каналот добива поубав почист изглед“ - информираат од ЈПКД „Комуналец“.

Од таму апелираат до граѓаните кои живеат покрај каналот отпадот да не го фрлаат во каналот, туку истиот да го пријават на телефонски број: 034/325-909 за да биде подигнат.

Вчера околу 11:00 часот на локален пат од Добрејци кон Пиперево, во близина на Струмица, поточно на мост на река Струмица, патничко возило „Лада“, без регистарски ознаки, управувано од 17–годишно девојче, изгубило контрола и излетало од коловозот во река Струмица – информираат од СВР Струмица.

Во незгодата, со тешки телесни повреди се здобила малолетничката, констатирани во Струмичката болница, каде што била пренесена за укажување лекарска помош.

Увид на местото на незгодата извршила екипа на Полициска станица Струмица.

Министерството за внатрешни работи ги известува граѓаните дека до граничната служба на граничниот премин „Стар Дојран“ од страна на грчката гранична служба од граничниот премин „Дојрани“, а во врска со новите протоколи на грчката влада за рестрикитивни мерки за ковид-19, доставено е известување дека грчкиот граничен премин „Дојрани“ ќе биде затворен за патнички и товарен сообраќај во периодот од 22.07. (среда) од 00:00 часот до 04.08.2020 година (вторник).

Сите патнички и товарни моторни возила што планираат да остварат влез и излез од и во Грција во наведениот период, тоа ќе може да го остварат на грчкиот граничен премин „Евзони“ – стои во соопштението на МВР.

Вчера околу 19:00 часот во Штип, полициски службеници привеле 29-годишен жител на селото Баница, струмичко, бидејќи се спротиставувал на полицајците, кој побарале од него да го препаркира камионот натоварен со лубеници и земјоделски производи.

Како што соопшти портпаролот на СВР Штип, Гордана Панајотова, настанот се случил на булеварот „ЈНА“ во Штип. Освен што ги навредувал полициските службеници кои од него побарале да го отстрани камионот од тротоарот и да го препаркира, лицето М.В. не ја почитувал ни владината уредба за задолжително носење заштитна маска.

Земјоделецот се соочува да плати казна од 600 до 900 евра за омаловажување на полициските службеници и дополнително 20 евра за неносење заштитна маска.

По целосно расчистување на случајот, против него ќе биде поднесен соодветен поднесок.

СВР Струмица изготви кривична пријава против правно лице од Струмица и одговорно лице И.В., поради постоење основи на сомнение за сторено кривично дело „непостапување според здравствени прописи за време на епидемија“, казниво по член 206 од Кривичниот законик, информираат од СВР Струмица.

Имено, на 18.07.2020 година на профил на социјалната мрежа „Инстаграм“, кој го користи пријавениот правен субјект, било објавено дека истата вечер во нивен угостителски објект ќе настапуваат естраден уметник и музичка група. Од преземените мерки и обезбедените докази било утврдено дека правното и одговорно лице дозволиле во периодот од 21:00 до 01:00 часот во објектот да се одржи настап на естрадниот уметник и музичката група и воедно дозволиле и присуство на неограничен број гости кои биле послужувани на шанк и стоечки маси, со што постапиле спротивно на Протоколот за отворање и работа на кафетериите, а кој произлегува од Планот за намалување на рестриктивните мерки за спречување на ширење на коронавирусот“ – стои во денешното соопштение на СВР Струмица.

По вчерашните тројца, денеска во Струмица се евидентирани уште двајца заразени со ковид-19. Според информациите од Министерството за здравство, од 1636 направени тестови во изминатите 24 часа, 164 лица се позитивни на ковид-19.

По градови: во Скопје 52, Штип 33, Куманово 21, Гостивар 17, Струга 7, Битола 5, четворица во Тетово и Кавадарци, во Демир Хисар и Свети Никола 3, по двајца во Дебар, Велес, Кочани, Пробиштип и Струмица и по еден во Охрид, Македонски Брод, Кичево и Ресен.

Во изминатите 24 часа нема починато пациенти, а Институтот за јавно здравје регистрира 69 оздравени пациенти. 

Инаку, од почетокот на пандемијата во Струмица се евидентирани 34 случаи од кои две лица починаа, 15 се оздравени, а 17 се активни.

Од ЕВН Македонија - КЕЦ Струмица информираат дека поради реализација на инвестициони зафати за подобрување на квалитетот во снабдувањето со електрична енергија, утре (среда, 22 јули), од 09:00 до 15:00 часот без  електрична енергија ќе останат корисниците во Петралинци, Старо Балдовци, Хамзали и индустриски објекти околу Рудник Огражден (Хамзали), Чанаклија, Манастир Хамзали и Дрвош.

Од Противпожарната единица на Струмица информираат дека денеска околу 13:45 часот избувнал пожар во атарот на село Банско, гореше запалена сува трева и отпаден материјал. Интервенирано е со две противпожарни возила и пет пожарникари. Пожарот е локализиран и ликвидиран во 15:40 часот.

Во 15:30 часот во атарот на село Дабиле, Струмичките пожарникари со четири возила и 12 пожарникари интервенираа и на гаснење на запален овоштарник со шупа во која имало земјоделски машини, комбајн, како и балирана слама. Пожарот е локализиран и ликвидиран во 18:40 часот. Направена е голема материјална штета.

ФОТО: ТППЕ Струмица

Државниот пазарен инспекторат утрово го затвори клубот „Аватар“ во Струмица. Директорот на инспекторатот, Стојко Пауновски, за ТВ канал ВИС изјавил дека одлуката е донесена поради тоа што клубот воопшто не смее да работи и сите клубови во државата работеле нелегално, бидејќи немаше дозвола од Владата како и протоколи од комисијата за заразни болести.

Сопственикот на клубот, во неделата рече дека саботната журка излегла од контрола. Тој тврди дека клубот функционирал како кафетерија, бидејќи на оваа локација е регистриран така, а објектот е од отворен тип.

Во изминатите 24 часа од направените 724 тестирања, регистрирани се 96 нови случаи на ковид-19, меѓу кои и тројца струмичани на возраст од 24, 32 и 55 години, кои не се поврзани со досегашните кластери.

Во Скопје и Штип денеска се евидентирани 24 нови пацинети со ковид-19, во Струга 9, Тетово 7, Куманово и Охрид 6, Радовиш 5, Гостивар 4, Струмица и Свети Николе 3, Кочани 2 и по еден во Битола и Крива Паланка.

Починаа се 10 лица, четири пациенти од Скопје, двајца од Куманово и по еден пациент од Штип, Тетово, Гостивар и Кичево.

Денеска Институтот за јавно здравје регистрира 61 оздравен пациент.

Има 19 години, струмичанка која ја познаваме како млада поетеса со издадени две книги, но од мало дете е по музиката. Станува збор за Илина Врешкова, која своите следни чекори ги прави и на музичката сцена. Сними песна со видео спот, насловен „Не тугуј љубави“.

Автори на музиката и текстот се Димитар Симов и Зоки Зоц, аранжманот и миксот се на Дејан Стојановиќ, во позадински вокал е Марија Ѓоргиевска, додека режисер на спотот е Алек Тасевски.

Погледнете го видеото со првата песна на Илина Врешкова...

СВР Струмица информира дека синоќа половина час по полноќ, 19-годишно момче Г.П. од Ново Село, пред угостителски објект во Струмица, по претходна расправија бил физички нападнат од неколку непознати лица.

СВР Струмица во денешниот полициски билтен информира за уште еден физички напад, кој се случил вчера околу 13:00 часот во двор од куќа во Банско, сопственост на М.Д. (35), која додека била заедно со нејзините две деца и К.С. биле физички нападнати од А.Д. и И.Д.

СВР Струмица информира дека презема мерки за расчистување на овие два настани.