„Централната и локалната власт предводени од СДСМ покажаа и докажаа дека кога се сака својата држава и својот народ, се инвестира во најнеопходните работи кои носат прогрес и подобар живот за сите. Наместо во споменици и жални врби, плански и домаќински се инвестира во урбаната и руралната инфраструктура. Таа е во приоритетите на оваа власт“- кажа на денешната прес конференција Ани Касапова од Општинската организација на СДСМ во Струмица, потенцирајќи дека се гради во цела држава, но и во Струмица.

Касапова вели дека и во овие вонредни околности поради пандемијата од Ковид-19, планираните проекти се реализираат според планираната динамика.

„Во полн ек е проширувањето на дистрибутивната гасоводна мрежа во должина од 7 километри. Се градат канализациони системи во населените места Вељуса и Банско, а овој проблем ќе се решава и во Градско Балдовци и Баница. Се подобрува инфраструктурата во близина на туристичките локалитети и културно – историските знаменитости – Водоча, Цареви кули, Габровски водопади.

Започна уредувањето на поројот „Крушевска Република“, се реконструираат отворените спортски игралишта, се гради нова спортска сала во основното училиште „Никола Вапцаров“, а со донесувањето на Деталниот урбанистички план ќе се гради целокупната инфраструктура во населбата Софилар.

Бројката на нови случаи со ковид-19 евидентирани преку Центарот за јавно здравје денеска достигна дури 21 нов случај, од вкупно 243 новозаболени во цела држава. Најмногу во Скопје 98 лица.

Во изминатите 24 часа во Струмица се регистрирани нови 11 позитивни нa вирусот ковид-19, со што бројката на активни случаи на територијата што ја покрива Центарот за јавно здравје во Струмица се зголеми на 167 активни случаи. Со ова бројка, Струмица стана 4-ти град во Македонија со најголем број на активни случаи, веднаш зад Скопје со 834, Куманово 182, Кочани 172 активни случаи.

СВР Струмица информира дека во средата вечер околу 21:00 часот на магистралниот пат Струмица - Ново Село, во селото Дабиље, се случила сообраќајна незгода помеѓу мотоцикл „Пијаџо“ со струмички регистарски ознаки, управуван од Д.Ч. (44) од село Петралинци, струмичко и патничко возило „Опел Корса“ со струмички регистарски ознаки, управувано од Г.К. (32) од село Дабиле, струмичко.

Од ЕВН Македонија – КЕЦ Струмица информираат дека денеска (петок, 2 октомври) од 15:00 до 17:00 часот ќе има прекин на електричната енергија на дел од Просенички пат, „Тритерол“ и „Расадник“ Просениково, а од 17:00 до 19:00 часот селото Добрејци, дел од Василево, Фабриката за мебел „Алмак“, „Нави Пром“, „Роко 2000“ и други.

Во последните 24 часа направени 1350 тестирања, а регистрирани се 162 нови случаи на ковид-19. Најмногу во Скопје 75 лица, а во Струмица 10. Во Струмица се регистрирани и тројца оздравени пациенти од вкупно 109 во целата држава.

Денеска започна новата учебна 2020/2021 година. Иако еден месец подоцна и е поразлична од минатите години, поради пандемијата од ковид-19, денешниот ден е посебен за сите ученици, а особено за првачињата кои за прв пат седнаа во училишните клупи.

Градоначалникот на општина Струмица, Коста Јаневски се сретна со првачињата од училиштето „Св. Кирил и Методиј“ во Дабиље. Им посака многу здравје и успех во новата учебна година и апелираше до оние кои ќе бидат во училиштата, да бидат максимално одговорни и да ги почитуваат протоколите и пропишаните мерки за здравствена безбедност.

Родители на ученици од основното општинско училиште „Борис Трајковски“ во Моноспитово, општина Босилово, го изразија својот револт кон Комисијата која не дозволи во ова училиште да се следи настава со физичко присуство. Ги повикаа тие што донесоа ваква одлука да дојдат во училиштето и да се уверат на лице место дека има услови децата да следат настава во училниците.

Како што велат тие, нелогично е ова училиште со само 130 ученици од прво до деветто одделение да не добие дозвола кога има доволен број училници и три влеза во училишната зграда.

„Нека дојдат и нека кажат зошто не дозволија, нека ни образложат зошто нашите деца нема да одат во училиште, а наставата ќе ја следат онлајн, иако платформата, како што гледаме, уште целосно не е функционална. Сакаме нашите деца настава да следат во училиштето“, велат родителите кои добија поддршка и од наставниците и од директорката на училиштето, Соња Бучкоска.

Од ЈПКД „Комуналец“ информираат дека поради санирање на дефект прекинато е водоснабдувањето на улицата „Бетовенова“ во Струмица. Нормализирање на водоснабдувањето се очекува попладне до 15:00 часот.

Во последните 24 часа од направените 1697 тестирања, регистрирани се 194 нови случаи на ковид-19. Најмногу во Скопје 77 лица, а во Струмица 9 нови случаи. Во моментот активни се 149 лица со ковид-19, евидентирани преку Центарот за јавно здравје во Струмица.

Починале двајца пациенти, еден од Прилеп на возраст од 80 години и еден од Велес на возраст од 54 години, информираат од Министерството за здравство.

Од ЕВН Македонија – КЕЦ Струмица информираат дека утре (четврток, 1 октомври), од 08:00 до 09:30 часот ќе биде прекината електричната енергија на улиците „Маршал Тито“ и „Балканска“ во Струмица (објекти околу центарот на ЕВН, вклучително и ЕВН).

Лекарка како супер херој насликана на ѕид во дворот на гимназијата „Јане Сандански“ во Струмица од 16-годишната Јана Мицева, а обоено од средношколци од ова училиште, од денеска го краси изгледот на училиштето и ќе ги потсетува младите на поголема превентива и заштита од ковид-19.

Овој проект го имплементира Центарот за истражување и анализа „НОВУС“ од Струмица со поддршка на Британската амбасада во Скопје, а со овој мурал сакат да се заблагодарат на здравствените работници во земјава кои се на првата линија за спасување на човечки животи од вирусот ковид-19.

Вечерва околу 20:40 часот на раскрсницата од булеварот „Ленинова“ со улицата „4-ти Јули“, кај ТЦ „Глобал“ во Струмица, автомобил удрил во пешак, жена. Информацијата ја потврди портпаролот на СВР Струмица, Хризантема Рендевска.

Жената била префрлена во Струмичката болница со Итната медицинска помош, но се уште нема информации за нејзината состојба.

Во скоро сите училишта, во текот на летниот период беа реализирани активности за подобрување на условите за реализација на воспитно-образовниот процес во новата учебна година, информираат од Општина Струмица.

Во ООУ „Гоце Делчев“ од Вељуса извршена е реконструкција на фасада на задниот дел од училишната зграда со површина од 470 метри квадратни.

Во ООУ „Св. Кирил и Методиј“ од Дабиле поставен е порамнителен слој во една училница и во канцеларијата на секретарот и поставување на ламинат во овие простории, набавка на смарт табла, белење на ходниците во училиштето и санација на ѕидовите.

Во ООУ „Сандо Масев“ извршено е варосување на цокле во централното училиште  низ сите училници, целосно белење и обновување на внатрешен ентериер на ходниците во централното училиште, лакирање на паркетот во спортската сала, санација и обновување на кошаркарското игралиште во централното училиште, целосно белење и обновување на сите тоалети во централното и санирање на тоалетите во подрачното училиште во Баница.

Во ООУ „Маршал Тито“ од Струмица извршено е брусење на стар паркет во три училници и мал ходник, лакирање и полирање, реконструкција на фасадата на југоисточниот дел на училиштето со поставување на термофасада и реконструкција на под во една училница.

Во последните 24 часа од направените 1372 тестирања, регистрирани се 112 нови случаи на ковид-19, од кои 11 и во Струмица.

Во болнички услови починаа 8 пациенти, од Teтово (73), Струмица (58), Делчево (55), двајца од Струга (80 и 74 години) и тројца пациенти од Скопје (53, 76 и 82 години).

СВР Струмица – Отсекот за општ криминалитет до Основно јавно обвинителство во Струмица ќе поднесе соодветен поднесок против 13-годишно момче од Струмица, поради основано сомнение дека извршил 13 кривични дела тешки кражби, кражби, разбојништва и одземање на моторни возила и велосипеди, извршени во Струмица, Радовиш и во Кочани.