Во Струмица денеска се одржа четвртата од серијата јавни дискусии за претставување на нацрт текстот на „Националната стратегијата за развој на концептот за едно општество и интеркултурализмот во Република Северна Македонија“.

Градоначалникот на Струмица, Коста Јаневски на отворањето на дебатата изразил надеж дека стратегијата за едно општество и интеркултурализам ќе ги исполни очекувањата за реализација на едно еднакво општество за сите и ќе ги крши сите ѕидови на досегашните предрасуди.

Владината служба за информирање пренесе дека министерот без ресор задолжен за дијаспора Едмонд Адеми истакнал оти врз основа на стратегијата ќе бидат иницирани активности за зајакнување на процесите на комуникација и соработка меѓу заедниците во кои секој граѓанин, без исклучок, ќе се чувствува како еднаков, рамноправен припадник на општество, кое е и фер и правично за сите.

„Велат дека нашата влада повеќе е фокусирана на надворешната политика, и оти малку сме се грижеле за внатрешната политика. Како да забораваат дека надворешната политика е во функција на политиката на нашата земја. И дека е рефлексија на духот што се применува во внатрешната политика. Успесите во надворешната политика не беа случајни. Добрососедството и договорите со Грција и Бугарија се одраз на нашата општествена кохезија“ - рекол министерот Адеми.

Министерот без ресор задолжен за странски инвестиции, Елвин Хасан, пак, нагласил дека со стратегијата јасно ќе знаеме кои се нашите приоритети и цели и кои се мерките кои сите заедно треба да ги преземеме со цел реализација на нашиот исклучително значаен проект, односно концептот „Едно општество за сите“.

Ленче Христова, од Организацијата на жени од Струмица оценила дека националната стратегија за развој на концептот за едно општество и интеркултурализмот во држвава, како прв документ од тој вид, има цел да ги зајакне и да ги истакне долгогодишните заложби на граѓанските активисти, односно нивните каузи за еднаквост и еднакви можности на сите граѓани.

Во организација на Домот за деца и млади „Благој Мучето“, денеска во Струмица се одржа 29-та Манифестација Републички детски средби „Цвеќе 2019“.

23 екипи од основните училишта од земјата учествуваа на манифестацијата на која се натпреваруваа во цртање на хамер, ликовни творби за изложба и арнжирање свежо цвеќе во икебани.

Оценувањето беше од страна на стручни лица и беа доделени 10 награди за цртање на хамер, 14 награди за ликовните творби за изложба, 5 награди за аранжирање на свежо цвеќе и симболична награда за секој учесник.

На манифестацијата се претсави и хетерогената инклузивна група „Надеж“ со перформансот „После дождот“ во режија на Наташа Ѓоргиева, во кој учествуваа возрасни, деца, ученици од СОУ „Јане Сандански“ и ООУ „Маршал Тито“ и девојките од Центарот за балетска уметност „Референсе“ и нивниот ментор, Олгица Илиева.

На манифестацијата присуствуваа градоначалникот Коста Јаневски и членови на Советот на општина Струмица.

На покана на романската премиерка, Виорица Данчила, а во рамките на претседавањето на Романија со Советот на ЕУ, Зорица Заева учествуваше на конференција „Улогата на жените во модерното општество – помеѓу јакнење, лидерство и родовата дискриминација“, која се одржа во Букурешт.

Конференцијата имаше фокус на стратешките европски и меѓународни документи кои на краток и долг рок работат во насока на елиминација на родовата дискриминација и нееднаквост, но и на општествениот дискурс кој се движи во насока на подигнување на свеста за сите форми на насилство врз жената и овозможување на средина за еднаков развој и учество на жените во општеството, политиката и приватниот сектор.

Во своето обраќање, г-ѓа Заева говореше за статусот на жените во Република Северна Македонија, како и за заложбите кои Владата ги презема за намалување на насилството врз жените и девојките.

„Донесовме јасни и недвосмислени законски решенија со коишто се спречува насилството и се штитат жените жртви на насилство. Ја ратификувавме Конвенцијата на Советот на Европа за спречување и борба против насилството врз жените и домашното насилство, така наречената Истанбулска конвенција. Ги унапредуваме сите потребни услуги за поддршка и заштита на жените жртви на насилство. Кога жените губат – сите губиме“, истакна Зорица Заева на конференцијата во Букурешт.

Посебен акцент во своето обраќање, Заева стави на економското јакнење на жените во општеството.

„Девојките и жените имаат апсолутно еднакво право да напредуваат во нивните работни кариери и да бидат избирани на највисоки работни позиции. Нема никаква причина да биде поинаку. Намалувањето на родовиот јаз во платите, на макроекономско ниво, може да придонесе за поголем економски раст. Затоа треба да биде јасно: Економското зајакнување е одговорот на многу од прашањата со кои се соочуваат девојките и жените“, нагласи Заева на конференција „Улогата на жените во модерното општество – помеѓу јакнење, лидерство и родовата дискриминација“ во Букурешт.

Екипи на ЈПКД „Комуналец“ од Струмица во акција за детално чистење на Спомен костурницата кај месноста Варници во близина на Раборци.

Од „Комуналец“ велат дека оваа акција е во рамките на Годишната програма за одржување на спомен обележјата на територијата на општина Струмица. Да се зачува генералната слика на најчиста општина во Македонија.

„Генералката“ е и во пресрет на одбележувањето на 75-годишнината од Мајската офанзива, кое ќе се одржи во сабота, 1 јуни, од 11:00 часот.

Кварталниот извештај за извршување на буџетот на општина Струмица за првиот квартал од 2019 година, има реалиација од 21,40% од извршувањето на буџетот.

„Ова значи дека според планираната динамика се полни буџетот на општина Струмица и треба да бидеме задоволни, бидејќи знаеме дека секогаш првиот е најслаб квартал и споредбено со другите години, оваа година имаме одличен процент и ако продолжи така со оваа динамика, извршувањето на буџетот може да достигне и 100% до крајот на годината“ – вели претседателот на Советот, Марјан Даскаловски, по денешната 23-та седница на Советот на општина Струмица каде беше усвоен Кварталниот извештај.

На денешната седница советниците дискутираа и за работата на Јавните претпријатија „Паркиралишта Струмица“ и „Струмица Гас“ за првите три месеци од оваа година.

Советниците ги усвоија Стратегијата за енергетска ефикасност на општина Струмица (2019-2023 година) и Стратегијата за женско претприемништво на општина Струмица со Акциски план (2019-2024 година), како и одлуката за обезбедување средства за одржување на Агрометеоролошки станици во рамките на проектот „Агрометеоролошки станици за заштита на земјоделските култури и животната средина“.

Донесена е одлука од буџетот на општината да се издвојат по 70.000 денари за помош на тројца жители на општина Струмица.

Селекторот на македонската одбојкарска репрезентација, Никола Матијашевиќ го објави списокот на играчи со кои ќе настапи на Европското првенство во одбојка во Словенија во септември.

Според објавениот список десет одбојкари се струмичани од кои дури петмина се од шампионот „ЏИО Струмица“, а останатите интернационалци.

На списокот на Матијашевиќ се 18 одбојкари меѓу кои браќата Ѓорѓиеви, техничарот Ѓорѓи и коректорот Никола на чија позиција е повикан и Марјан Урдов. Како примачи се повикани капитенот на „ЏИО Струмица“ – Васе Михаилов, младиот Стојан Илиев, но и струмичките интернационалци Александар Љафтов и Владо Милев. Како средни блокери селекторот ги повика Филип Маџунков, Славе Наков и Ристо Николов.

Македонската одбојкарска репрезентација ќе игра во Љубљана. На 12 септември игра со Финска, ден потоа со Турција, а на 14 септември силите ќе ги соочи со актуелниот европски шампион, селекцијата на Русија. На 16 септември, Северна Македонија ќе игра со Белорусија а групната фаза ја завршува со домаќинот Словенија на 17 септември.

Две кучиња утринава околу 04:00 часот се пронајдени отруени на струмичкиот плоштад, а низ паркот, кај основното училиште „Сандо Масев“ и во околината се пронајдени уште десеттина кучиња кои добиле последици од отровот.

На социјалните мрежи Здружението за заштита на животни „Animal Lovers“ од Струмица утринава информираше дека дел од кучињата се и домашни миленици.

Поради големиот број на повици за масовно труење ветеринарите не можат да одговорат на сите повици навремено.

Преку социјалните мрежи попладнево се обрати и градоначалникот на Струмица, Коста Јаневски, кој го осуди овој чин и побара од надлежните органи да се пронајдат сторителите.

Јаневски потсети дека годинава треба да се отвори стационарот за бездомни животни во атарот на селото Сачево.

„Свесни сме дека кучињата скитници се проблем во општината, но ова не е начинот на кој треба да се ослободиме од нив. Општина Струмица од 2015 година спроведува хуман третман кон кучињата скитници, а од крајот на минатата година, заедно со Центарот за развој на Југоисточниот плански регион, работиме на трајно решавање на проблемот со изградбата на Стационарот за бездомни животни во атарот на селото Сачево“ - напиша градоначалникот Јаневски.

Сликарката Кристина Зимбаков по потекло од Струмица, во недела, 2 јуни во 12:00 часот ќе постави Ликовна изложба под самиот врв Сечена Скала, едно од највпечатливите места на стрмната планина Беласица во југоисточниот дел на Македонија. Локалитетот на изложбата е на државната гранична линија.

Со теренско возило од селото Смолари до таму се стигнува за 2 часа, а пеш по планинарска патека е 4 часа.

На изложбата ќе бидат претставени триесеттина нови дела во комбинирана техника создадени во последните две години, главно сочинети од циклусот „Срце в кафез,“ „Ја извишила фортуната“ и „Микроскопски стакленца“.

Габите и лишаите се примарно изразно средство, вткаени за цртање фигури или составување мозаик. Материјалот е собран преку лични теренски истражувања или од суви збирки, во соработка со био-научници. Применети се мноштво видови од планината Беласица во Македонија, но и ретки или ендемични видови од Аргентина, Антарктикот, суптропските предели на Австралија со Тасманија, САД, подножјето на Хималаите во Индија, Хрватска и ендемична алга од Јужна Африка.

Ликовните дела се насликани на хартија од габи рачно изработена од авторката Кристина Зимбакова.

Грижливото користење примероци од габи и лишаи од разни делови од светот стопени во нов, уметнички контекст со фигуративен и лирско-експресивен израз има цел да ја поттикне и свеста за овие прастари, чудесни и загадочни организми.

Кристина Зимбакова (1975) во своето творештво негува интердисциплинарен пристап, каде се испреплетени сликарството, поезијата и природните науки, а габите и лишаите се најзастапен медиум. Досега имала самостојни изложби во земјава како и во Ирска, а учествувала на бројни групни изложби во странство, од кои се истакнуваат оние во Оксфордскиот театар во Англија и Музејот за уметност „Ешкенази“ во САД.

Инспирирани од акцијата „Еко фронт – Чиста да ни е“, учениците од СОУ „Никола Карев“ од Струмица го прифатија герила проектот „Еко предизвик“ и започнаа со активности за чистење и поставување нова урбана опрема во дворот на училиштето.

20-тина ученици, заедно со вработените во училиштето, започчнаа со собирање на отпадот со цел за подигање на свеста и еколошката култура кај своите соученици, потенцирајќи дека за да имаме чиста и здрава животна средина, најпрво би требало да започнеме од сопствениот двор.

Оваа активност ќе трае до петок, каде заедно со екипи од Јавното претпријатие за комунални дејности „Комуналец“ ќе се финализира генералното чистење на училишниот двор.

Рокот за поднесување на барања за субвенции за Програмата за финансиска поддршка во земјоделството за 2019 година се продолжува до 30-ти јуни. Ова продолжување на рокот е по барање на земјоделците, со цел да можат сите земјоделци да го искористат правото за поднесување на барања за финансиска поддршка за мерките од годинешната Програма за директни плаќања.

До овој рок, земјоделците ќе можат да ги поднесуваат барања по Програмата за финансиска поддршка во земјоделството за 2019- та година, односно за директни плаќања за растително производство и тоа за површини со поледелски и градинарски култури, лозови и овошни насади, како и за сточарско производство и тоа за одгледување на говеда, овци, кози, пчели, свињи и за заклани животни во кланица.

Барањата за добивање на финансиската поддршка се поднесуваат по електронски пат, самостојно од страна на барателите. Оние баратели кои не знаат сами да поднесат барање или имаат потреба за помош при создавање на електронското барање, може да се обратат во подрачните единици на Министерството за земјоделство, шумарство и водостопанство.

Барањата за мерките од растителното производство се поднесуваат врз основа на евидентирани податоци за парцели во Единствениот регистар на земјоделски стопанства и Системот за идентификација на земјишни парцели со состојба на 15 март 2019 година.

Барањата за мерките од сточарското производство за говеда, овци, кози и пчели се поднесуваат врз основа на евидентирани податоци за животни во Регистарот за идентификација и регистрација на домашни животни со состојба на денот на поднесување на барањето.

Одгледувачите на добиток пред поднесување на барањето задолжително треба да ја проверат и по потреба ажурираат состојбата на животните во ветеринарното друштво со кое имаат склучено договор.

Сите корисници на оваа финансика поддршка по аплицирањето и добивањето на отпечатениот примерок добро да ги проверат податоците и ако има одредени отстапувања во рок од 30 дена од денот на аплицирањето да ги извршат потребните корекции.

Од Струмица стартуваше Кампањата за подигнување на свеста за ракот на дојка во Македонија на Министерството за здравство и Здружението за борба против ракот „Борка“.

Вчера во Домот на АРМ во Струмица се одржа Панел дискусија за ризиците, предизвиците, можните решенија и следните чекори и активности што ќе бидат преземени од Министерството за здравство за намалување на бројот на заболени од рак и за создавање здрава популација.

Доктор Нино Васев, директор на Универзитетска Клиника за Радиотерапија и Онкологија во Скопје, говорејќи за болеста уште еднаш порачаа дека само раната детекција преку мамографски прегледи може да дадат резултати. Доколку се открие ракот на дојка во ран стадиум, може успешно да се излекува.

Министерот за здравство, Венко Филипче истакна дека за пациентите се обезбедени потребните лекови и бесплатни ортопедски помагала. Почната е постапката за набавка на нови 8 мамографи за рано откривање на ракот.

Целта на кампањата е активно вклучување на сите релевантни и засегнати страни во создавањето здрава популација, свесна за ризиците и предизвиците, држава со значително намален број на заболени од рак.

„Кампањата за подигнување на свеста за ракот на дојката ќе се реализира и по средните училишта, бидејќи се помлади лица страдат од ова заболување. Во првата фаза опфатени ќе бидат 36 средни училишта низ државата“ – рече Биба Додева од Здружението „Борка“.

Хуманитарниот концерт со кој требаше да се соберат парични средства за продолжување на лекувањето во Москва на Никола Новоселски од Муртино е откажан.

Како што ни рече Иван Митев од „ИМД продукција“, организатор на концертот, купени се само 50 влезници или само толку граѓани пројавиле интерес за концертот и затоа истиот е откажен пред да се монтира сцената и озвучувањето во Спортската сала „Парк“ во Струмица.

За оние граѓани кои купиле влезници, настанот ќе се одржи како хуманитарна забава во ресторанот „Play во објектот на салата, а ќе настапат: Ленче и Горан Кукиќ, Сузана Гавазова, Благоја Груевски, Стојне Николова, Миле Кузмановски, Ѓоко Јовиќ, Марјан Коцев, Болеро Бенд, Тејзи, Енерџи Бенд, Дрим Тим и други пејачи и групи.

Никола Новоселски од струмичко Муртино на 27-годишна возраст доживува тешка сообраќајка по која останува инвалид. За него досега се организираа повеќе хуманитарни акции, по што тој замина на лекување и третмани во Русија. Со пресадување матични клетки и посебни вежби здраствената состојба на Никола се подобрува. Тој сега пак треба да оди во Русија, но фалат пари, како за лекувањето така и за патот, бидејќи за него во авион мора да откупат 6 седишта за да може да биде легнат.

Полн „шлепер“ со медицинска опрема, ортопедски помагала, инвалидски колички, кревети, душеци, столови за медицинска потреба, денеска беа истоварени во ЈЗУ „Општа болница“ во Струмица, како донација од Хуманитарното здружение „Хикуде“ од Австрија.

„Ние сме хуманитарно здружение кое повеќе од една деценија помагаме на здраствените установи во земјите од Источна Европа. Во Македонија досега имавме донирано во Радовиш, Кочани, Штип, а еве денеска и во Струмица“ - вели Марта Реитер од Здружението „Хикуде“ од Австрија, која ја донесе оваа донација.

Директорот на болницата, д-р Наќе Гогов се заблагодари на донацијата и истакна дека таа е добредојдена и ќе биде распоредена по болничките одделенија и амбуланти и се надева дека со истата ќе биде подобрен престојот и медицинската услуга на пациентите во струмичката болница.

Дел од македонската естрада, утре (вторник, 28 мај), во спортската сала „Парк“ во Струмица ќе пејат на големиот Хуманитарен концерт за Никола Новоселски од Муртино, на кого му се потребни средства за продолжување на лекувањето во Москва, Русија.

На концертот ќе настапат Ленче и Горан Кукиќ, Сузана Гавазова, Благоја Груевски, Стојне Николова, Миле Кузмановски, Ѓоко Јовиќ, Марјан Коцев, Болеро Бенд, Тејзи, Енерџи Бенд, Дрим Тим и други пејачи и групи кои ќе пејат за да се соберат средствата за Новоселски.

Влезницата за концертот изнесува 200 денари и истите можат да се купат во „Разнопромет АС“, ресторанот „Play“, кафе баровите „19-ка“, „Голд кафе“, „Концепт кафе“ и на влезот во спортската сала „Парк“ на самиот концерт, кој е закажан во 20:00 часот.

Естрадните уметници повикаа на хуманост, донирање средства и присуство со цел да се подаде рака за Никола, кој 7 години се бори да стане од креветот за кој е врзан.

Никола Новоселски од струмичко Муртино на 27-годишна возраст доживува тешка сообраќајка по која останува инвалид. За него досега се организираа повеќе хуманитарни акции, по што тој замина на лекување и третмани во Русија. Со пресадување матични клетки и посебни вежби здраствената состојба на Никола се подобрува. Тој сега пак треба да оди во Русија, но фалат пари како за лекувањето така и за патот, бидејќи за него во авион мора да откупат 6 седишта за да може да биде легнат.

На Никола можете да му помогнете и преку донирање 100 денари од повик на броевите: 143-303 Телеком и 143-475 ВИП/ОНЕ

Средства може да се уплаќаат и на сметка на име:

Мара Новоселска Муртино бр. 103 Струмица, денарска сметка: 210-5016778434.84 НЛБ Банка

девизна сметка на име: Mara Novoselska IBAN CodeMK07210501677843484   SWIFT-TUTNMK22

Министерството за здравство заедно со Здружението за борба против ракот „Борка“ почнуваат со спроведување Кампања за подигнување на свеста за ракот на дојка во Македонија. Кампањата започнува со панел дискусија што ќе се одржи денеска, понеделник, во Дом на АРМ Струмица, со почеток во 17:00 часот.

На панел дискусијата ќе се зборува за ризиците, предизвиците, можните решенија и следните чекори и активности што ќе бидат преземени од Министерството за здравство за намалување на бројот на заболени од рак и за создавање здрава популација.

На панелот ќе се обратат Венко Филипче, министер за здравство, Коста Јаневски, градоначалник на општина Струмица, Биба Додева, претседател на Здружението за борба против рак БОРКА – за секој нов ден, Скопје, д-р. Нино Васев, специјалист oнколог, директор на Универзитетска Клиника за Радиотерапија и Онкологија и д-р. Мери Пешевска, специјалист онколог.

Целта на кампањата е активно вклучување на сите релеватни и засегнати страни во создавањето здрава популација, свесна за ризиците и предизвиците, држава со значително намален број на заболени од рак и секако, држава со значително зголемен број на излечени од рак. Доколку се открие ракот на дојка во ран стадиум, може успешно да се излекува.

Во Кратово екипата на „Силекс“ со победа го заврши регуларниот дел на првенството, ја победи струмичка „Беласица“ со 2:1.

Поранешниот шампион „Силекс“ не успеа да го избегне баражот и ќе мора да игра дополнителен натпревар за опстанок во елитата. 

„Беласица“ допатува во Кратово за да се обиде да земе некој бод за престиж, а кратовчани, иако не зависеа сами од себе, потајно се надеваа дека можат да опстанат и без бараж натпревар.