Во Банско започна асфалтирањето на четири улици, а градоначалникот на Струмица, Коста Јаневски денеска направи увид во градежните активности.

Тој најави дека догодина ќе ги решаваат проблемите со квалитетот на водата за пиење и канализациониот систем, што ги имаат жителите од оваа населено место со кои градоначалникот ги има договорено во директните средби со нив.

„Тоа се навистина опсежни и скапи проекти кои тие неколку пати ми ги спомнаа и можам да ги уверам дека сработивме комплетна техничка документација за канализациониот систем со одобрение за градење, значи, се што е подготвителна работа од страна на општината го завршивме. Проектот за Филтер станицата за подобрување на квалитетот на водата, кој исто така е скап проект, го завршивме и цела наша енергија ќе ја впрегнеме во обезбедување средства за да ја затвориме комплетно финансиската конструкција за овие два важни капитални проекти и се надевам дека во текот на наредната година ќе започнеме со активности во тој правец и тоа ќе биде едно големо задоволство за мене и затоа можам да ветам дека тука ќе потрошиме се што може од енергија и врски за да можеме да го решиме овој проблем“ - кажа градоначалникот Јаневски.

Општината Струмица на сите ученици од прво одделение во основните училишта на територијата на општина Струмица им обезбеди бесплатна училишна униформа, односно маици и дуксерки со логото на училиштето каде посетуваат настава.

Втора година по ред учениците од прво одделение во деветте општинските основни училишта добија училишни униформи. За учебната 2019/2020 година на 628 првачиња им се обезбедени униформи купени со пари од општинскиот буџет во вредност од 650.000 денари.

Советот на општина Струмица донесе одлука, 5-те милиони денари од Министерството за животна средина да ги префрли на ЈПЕД „Струмица Гас“ со кои пари ќе го замени котелот на мазут во ЈЗУ „Општа болница“ во Струмица со котел на гас и ќе ја приклучи болницата на градската гасоводна мрежа.

Според директорот на ЈПЕД „Струмица Гас“, Благој Милановиќ целата активност би требало да заврши до крајот на годината, односно во почетокот на новата година болницата ќе биде приклучена на гасоводната мрежа, се зависи од роковите со тендерската постапка. Нема да има никаков прекин на греењето во болницата.

Согорувањето на мазутот во системот за греење на Струмичката болница е причината за енормното загадување на воздухот во Струмица, според мерењата на Автоматската мониторинг станица, која е поставена во дворот на болницата. Во непосредна близина од околу 25-30 метри, на висина од околу 15 метри, се наоѓа ложиштето и оџакот од системот за загревање на болницата. На растојание од 20 метри од станицата се наоѓаат првите станбени згради и куќи.

Од ЈПКД „Комуналец“ информираат дека поради дефект на водоводна цефка во прекин е водоснабдувањето на корисниците од улиците „Гоце Делчев“ од куќен број 120 до 170 и „Охридска“ во градот Струмица.

Екипи на комуналното претпријатие се на терен и работат на отстранување на дефектот. Нормализирање на водоснабдувањето се очекува до 12:00 часот.

Поранешното приватно средно училиште „Јахја Кемал“ во Струмица е пренаменато во простор на Детска градинка со целодневен престој за деца на возраст од 6 до 10 години. Од понеделник почнува со работа. Ова го најави претседателот на Советот на општина Струмица, Марјан Даскаловски по завршувањето на денешната 28-ма седница, каде советниците донесоа едногласна одлука за отпочнување со работа на нов Клон 5 на улица „Гоце Делчев“ бб во Струмица, во состав на ЈОУДГ „Детска радост“ Струмица.

„На радост на родителите, Детската градинка или Клон 5 од понеделник, 4 ноември ќе почне со работа. Комисијата од Министерството за труд и социјална политика даде позитивно мислење. Веќе има пријавено деца за целодневен престој во оваа градинка, за нив ќе се грижи соодветен стручен кадар. Оние родители кои имаат потреба нивното дете да престојува таму, можат да го пријават во ЈОУДГ „Детска радост“ – кажа Даскаловски.

СВР Струмица информира дека вчера во периодот од 08:00 до 14:00 часот на подрачјето што го покрива Секторот за внатршни работи - Струмица била спроведена акциска контрола со цел откривање на прекршоци сторени од страна на пешаци. Притоа, биле констатирани 18 прекршоци, кои се соодветно санкционирани.

ЈПКД „Комуналец“ во пресрет на верскиот празник Задушница ја започнаа акцијата за есенско чистење на Градските гробишта во Струмица.

Како што информираат од оваа комунално претпријатие, со чистењето ќе биде опфатен целиот комплекс и сите гробни места и патеки ќе бидат исчистени од треви, стари дрвја, бетонски и други остатоци. Истовремено со чистењето  се обновуваат и патеките и се врши хортикултурно уредување. 

Од Противпожарната единица на Струмица информираат дека вчера во реонот помеѓу населените места Едрениково и Трибичино, општина Василево, гореше нискостеблеста шума. Пожарот е целосно изгаснат од страна на екипа на ТППЕ Струмица. Причините за настанувањето на пожарот дополнително ќе се утврдуваат.

Сите ученици од прво до деветто одделение во основните општински училишта во градот и населените места, денеска добија по едно јаболко. Со тоа и започна реализацијата на проектот „Здрав оброк за секое дете“, финансиран од буџетот на општина Струмица.

Градоначалникот Коста Јаневски ги посети учениците во основното општинско училиште „Никола Вапцаров“ во Струмица.

„Се работи за една ужинка, овошје, која треба да иницира промени во начинот на исхрана на нашите најмлади сограѓани, на нашите деца. Познато е дека во нашето општество, а тоа е и глобален проблем во светот, децата се повеќе имаат прекумерна тежина и немаат најздрави навики на исхрана и со овој проект сакаме да поттикнеме едно размислување, една иницијатива, која што секако треба да биде поддржана најмногу од наставниците, педагозите и секако од родителите, за кои верувам дека не секогаш на децата успеваат да им ги наметнат здравите навики. Мислам дека овој проект содржи многу потенцијал и се надевам дека најправилно ќе биде разбран од родителите, педагозите и наставниците и дека ќе придонесе децата заеднички да се стимулираат да ги променат своите навики, поздраво да се хранат, а со тоа обезбедуваме поздрав развој на нашите деца, ги потсетуваме на навика која што би требало да трае цел живот и која кај нив ќе создаде поголем потенцијал да размислуваат како би требало да се хранат во животот“ - рече градоначалникот Јаневски.

Во рамките на овој проект, секој работен ден, околу 5000 ученици од основните општински училишта ќе добиваат по едно јаболко.

Во домот на популарната фолк пејачка Благица Калева, во Струмица, вчера имало голема причина за радост. Борче, момчето на нејзината ќерка Марија, на романтичен начин, со транспарент и со музика, ја запросил својата сакана, а на пат било и бебето.

За „Фокус” Благица раскажува низ солзи за убавиот настан, а гласот и трепери од емоции. Вели дека по сите горчливи солзи кои ги исплакала во животот, вчера за прв пат пролеала солзи радосници.

Повеќе на следниот линк>>>

Засилените активности на МВР за сузбивање на уличната продажба на наркотични дроги продолжуваат, па Одделот за криминалистичка полиција во координирана акција со СВР Струмица, СВР Штип, Одделот за специјални полициски операции и Одделот за сузбивање на организиран и сериозен криминал, разби криминална група од Струмица, која се занимавала со продажба на наркотична дрога „хероин“.

Организатор на криминалната група е В.С. (45) од Струмица, лице со криминално минато, осудуван за тешки кривични дела, како и за недозволена трговија со дрога. Тој организирал набавка на наркотична дрога „хероин“ во количини од половина килограм, која потоа ја препакувал во помали паковки (од еден до пет грама) и ја продавал по цена од 1.300 и 1.500 денари за еден грам на уживатели и дилери од Струмица и Штип.

Во продажбата на дрогата бил инволвиран и Т.К. (49) од село Добрејци, струмичко, кој по добиени насоки од организаторот, „хероинот“ го продавал од неговиот дом во Добрејци на уживатели и дилери.

Во почетокот на октомври 2019 година, во Штип, од страна на полициски службеници е лишен од слобода В.М (33) од Штип, кај кого при личен претрес пронајдена е наркотична дрога „хероин“, која ја купил од В.С. од Струмица, поради што СВР Штип против В.М. поднесе кривична пријава за „неовластено производство и пуштање во промет на наркотични дроги, психотропни супстанци и прекурсори“ .

На 25 и 26.10.2019 година во Струмица лишени од слобода се шест лица од Струмица за кои во истрагата е утврдено дека купувале наркотична дрога „хероин“ од В.С и Т.К.. При претреси на седум локации во Струмица кај пет лица, меѓу кои и станот кој го користел В.С. во Струмица, пронајдени се околу половина килограм наркотична дрога „хероин“, спакувана во неколку кеси и смеса за мешање, 45.000 денари, 325 евра, а запленети се двепатнички возила, кои биле користени за продажба на хероин.

По завршување на истрагата, СВР Струмица поднесе кривична пријава против В.С. и Т.К.за сторено кривично дело „неовластено производство и пуштање во промет на наркотични дроги, психотропни супстанции и прекурсори“ и против П.С. (42) од Струмица, за сторено кривично дело „помагање“ во „неовластено производство и пуштање во промет на наркотични дроги, психотропни супстанции и прекурсори“.

Од страна на судија на претходна постапка на В.С и Т.К одреден им е притвор во траење од 30 дена.

Во рамки на стратешкиот приоритет за 2019 година на Министерството за внатрешни работи „борба против недозволената трговија со дрога и оружје“, МВР ќе продолжи со интензивни активности, со посебен акцент на сузбивање на уличната продажба на наркотични дроги.

Здружението на филмски продуценти на Македонија, МЗФП – Скопје, до 15 ноември го организира проектот „Европски филм за млада публика“, во рамките на кој ќе бидат прикажани три европски филмови во пет градови во држвата, Струмица, Неготино, Кавадарци, Гевгелија и Свети Николе.

На 31 октомври (четврток), во НУЦК „Антон Панов“ во Струмица ќе бидат прикажани филмовите „Други девојки“, „Враќањето на Хана“, како и германскиот филм „Тегла полна живот“ со актерката Јела Хазе.

Организаторите посочуваат дека целта на проектот е да и презентираат на младата публика филмови кои се различни од холивудските и да ги запознаат со културните вредности од европските земји, но и да им ја доближат европската кинематографија.

Проектот е поддржан од Министерството за култура во рамките на манифестацијата „Нов културен бран“.

Утрово во 08:00 часот температурата во Струмица изнесуваше 1 степен, највисока во Дојран 10 степени, а најстудено во Берово -2 степени, информираат од УХМР.

Времето денеска ќе биде сончево и топло со слаб ветер од северен правец. Дневната температура ќе биде во интервал од 22 до 29 степени. Во Струмица сончево со дневна температура до 27 степени.

Со головите на Дарко Алексовски екипата на „Кит-Го“ на домашен терен во Пехчево ја победи екипата на „Беласица“ со резултат од 2:0, во рамките на 10-то коло од Втората фудбалска лига - Исток. Ова е втор пораз на струмичани, кои се лидери на табелата во Втората лига.

Натпреварот во Пехчево започна со одложување од половина час, поради доцнење на судиската тројка која имаше сообраќајна незгода кај Кочани, на доаѓање кон Пехчево, во која за среќа немаше посериозни последици.

Следното коло, на стадионот „Благој Истатов“ во Струмица, „Беласица“ ќе ја пречекува екипата на ФК „Победа“.

Вечерва во Спортската сала на СОУ „Димитар Влахов“ во Струмица се одржа второто коло од Првата лига на одбојкарското првенство (жени). Дерби соочување меѓу ОК „Наковски Волеј“ и новиот одбојкарски клуб „Струмица Жени“, дуел на одбојкарки коишто добро се познаваат и меѓу нив постои ривалство.

Девојките на Хари Наковски, како домаќинки демонстрираа одлична игра и со 3:0 во сетови, (25:14, 25:13, 25:15), ги надиграа девојките на „Струмица Жени“, кои немаа сила за било каков резултатски пресврт, ниту да им парираат во играта на екипата на „Наковски Волеј“, која сега со 6 бода е на врвот на табелата.

Одбојкарите на „ЏИО Струмица“ го започнаа походот во новата сезона за повторно освојување на двојната круна. Првиот натпревар со екипата на „УГД Студент“ во Штип го добија со 3:0 во сетови.

Струмичани првиот сет го добија со 25:16, убедливи беа и во вториот сет со 25:15, а домаќините единствено што се заканија беше во третиот сет кога успееја да „соберат” 20 поени.

Инаку, девет екипи ќе учествуваат во трката во претстојната сезона, а „ЏИО Струмица“ и „Вардар“ го носат фаворитскиот епитет. Скопскиот тим се засили со одбојкари од најголемиот ривал, така што со нивниот ангажман оствари двоен ефект. Македонските репрезентативци од Струмица, Васе Михаилов, Филип Маџунков и Стојан Илиев ќе го носат црвено-црниот дрес, во него ќе биде и поранешниот репрезентативец Јовица Симовски, а покрај нив, скопската екипа обезбеди и техничар од Јапонија и либеро од Србија. По заминувањето на Михаилов и на Илиев, „ЏИО Струмица“ мораше да реагира и да ја пополнува позицијата примач, па нејзин нов член е поранешниот одбојкар на „Шутова“, Игор Суботиќ од Србија. Другиот дел од тимот е составен од проверени домашни одбојкари, така што нема дилеми дека во директните дуели на актуелниот првак и на „Вардар“ ќе се бара најдобрата екипа кај нас во натпреварувачката 2019/2020.

Следното коло „ЏИО Струмица“ игра на свој терен против екипата на „Весна Пробиштип“.