Сведоштво за градот Струмица преточено во монографија со која ќе се расветли богатото културно-историско наследство на градот, беше промовирана синоќа во Амфитеатарот во Струмица.

„Цареви Кули – Струмица (Од праисторијата до Римското Царство)“ - книга прва, произлезе од сумирањето на резултатите од археолошките истражувања на локалитетот Цареви Кули над Струмица, како и кабинетските проучувања на богатата материјална граѓа, прибирани во период од 10 години.

Автор на оваа монографија е м-р Зоран Рујак, археолог и долгогодишен истражувач на локалитетот Цареви Кули. Тој синоќа најави дека се подготвува и втората книга „Цареви Кули – Струмица (Од Римското Царство до доцниот среден век)“.

„Книгата е напишана со голема љубов, пред сѐ кон градот Струмица, а потоа и кон Цареви Кули. Податоците внатре се многу битни, не само за Струмица и за Македонија, туку и за Балканот и пошироко, кои на добронамерните истражувачи на минатото ќе им бидат многу корисни“ – кажа авторот Рујак.

Во книгата има илјадници податоци за материјалната и духновната култура од бронзеното време, од железното време, раноантичкиот и хелинистичкиот период на Цареви Кули.

„Кон крајот на петтиот и почетокот на четвртиот век пред нашата ера е формирана првата населба во денешна Струмица со која владееле Филип Втори и Александар Македонски, за кои има материјални податоци“ - кажа Рујак.

За Ацо Костов, директорот на Управата за заштита на културното наследство, кој ја промовираше монографијата на Рујак, по 10 години истражување се добива една оформена идеја за Цареви Кули, што се поседува како артефакти, што како недвижен материјал, што како книжен, а завршницата треба да резултира понатаму со проекти за конзервација.

Монографијата „Цареви кули – Струмица (Од праисторијата до Римското Царство)“ е во издание на НУ „Завод и Музеј“ – Струмица, а промоцијата се одржа во рамките на манифестацијата „Струмица – град на културата 2021“.