Во петок (30 јули), од 14:00 часот на просторот кај Дом на АРМ во Струмица ќе биде отворена „pop-up продавница“, каде граѓаните ќе имат можност да видат голем број на био-базирани производи од цела Европа, но и да научат повеќе за циркуларната економија и целите на одржлив развој.

„Pop-up продавница“ ќе биде поставена во периодот од 30 јули до 8 август, во рамките на проектот BE-Rural, а се реализира од Интернационалниот центар за одржлив развој на енергетски, водни и околински системи - Македонска секција (SDEWES - Скопје), кој е дел од проектот BE-Rural, финансиран во рамките на програмата „Хоризонт 2020“ на ЕУ.

Целта на овој проект е да го истражи потенцијалот на регионалните и локалните био-базирани економии преку поддршка на релевантните чинители за развој на стратегии за биоекономијата, како и развој на патокази и бизнис модели.

Проектот се фокусира на пет региони: Струмичкиот регион (општините Струмица, Босилово, Василево и Ново Село), како и Видземе и Курземе (Латвија), Ковасна (Романија), Стара Загора (Бугарија), Шчечин и Вистула Лагуна (Полска).

Меѓу останатите активности проектот цели кон размена на знаења, градење на капацитетот и подигнување на свеста за придобивките од биоекономијата преку семинари за различни целни групи, едукација на ученици преку едукативните материјали адаптирани на македонски јазик, летна школа за наставници, како и pop-up продавница.

Во рамките на „pop-up продавницата“ ќе се одржат три настани:

30.07.2021 (петок) - 19,00 часот: „Science sips - Taste the future of the bioeconomy”

31.07.2021 (сабота) - 18,00 часот: „World style Cafe”

07.08.2021 (сабота) - 18,00 часот: „Do it yourself – bio-based edition”