Денеска во градот Солун, Грција на Универзитетот „Аристотел“, ќе биде поставена самостојна изложба на струмичанката Кристина Зимбакова. Ликовната изложба се одржува во рамките на меѓународниот Симпозиум „Силвија Плат и трансатлантицизмот“ и ја сочинуваат слики поттикнати од творештвото и писмата на Плат - клучна американска поетеса на дваесеттиот век.

Делата на Кристина Зимбакова кои ќе бидат изложени се создадени во последниве години, во комбинирана техника на платно и на хартија од габи рачно изработена од авторката.

Куратор на поставката и организатор на настанот е проф. Емили Вандајн од САД, која е Фулбрајт гостувачки професор на Универзитетот „Аристотел“.

Во творештвото на Кристина Зимбакова се испреплетени сликарството, поезијата и природните науки. Делата се симболични и фигуративни, а габите и лишаите се најкарактеристичен медиум.

Зимбакова изложувала во Македонија, Европа и САД, а нејзини самостојните изложби биле поставени во Галерија „Расклон“, планина Родопи, Бугарија (2020), врв Сечена Скала (1740 м.н.в.), планина Беласица (2019), Универзитет „Алстер“, Белфаст, Северна Ирска (2017) и на Научен собир на Европскиот совет за зачувување на габите во Охрид (2017).

Инаку Кристина Зимбакова е дел и од групната изложба „Spazio Tana“ во Венеција, Италија, што е отворена од 1 до 31 мај. Таа учествува со делото Коловрт - Габи, лишаи, сув пастел и акрил на рачно изработена хартија од габи. Hymenochaete rubiginosa, Stecherinum fimbriatum, Junghuhnia nitida, Astraeus macedonicus, Peniophora incarnata, Terana caerulea, Trametes cinnabarina и 5 неодредени вида - 37x34 cm. (2021).