Кога ќе се спуштите од кај „собранието“ низ струмичкото корзо ќе видите слатки бебиња на фотографии. Ова е изложба на фотографии со бебиња што ги направи авторката Драгица Атанасова од Струмица, која сега живее во Швајцарија.

Изложбата ја постави Здружението „Кадро“ од Струмица со поддршка на општината Струмица, а фокусот на Атанасова се новороденчиња преку кои таа раскажува кратки бајки, полни со светлина. Најчесто ги аранжира своите фотографии, правејќи сцени кои навидум се извадени од детски соништа, претворајќи ги во приказни за големи.

Драгица Атанасова е родена 1980-та година во Струмица. Во 2007-та дипломирала примената лингвистика (англиски и германски јазик) на Југозападниот Универзитет „Неофит Рилски“ во Благоевград, Бугарија. Работела како наставник во Македонија до 2010 година, по што заминува за Швајцарија.

Посериозно започнува да се занимава со фотографија во 2015-та година, најпрвин само како вљубеник во фотографијата за подоцна да го претвори тоа во нејзина успешна професија.

Драгица Атанасова работи претежно студиска фотографија во која основна тема и се децата. Вработена е како фотограф во една од најголемите женски клиники во Цирих, Швајцарија, но работи и во своето фотографско студио „BABYBELLA“.

Изложбата на Драгица Атанасова на струмичкото корзо ќе биде поставена во наредните 15 дена.