По вчерашната блокада од страна на жители од Иловица и Штука и активисти на еколошки здруженија, со која ги спречија археолозите од НУ „Заводот и Музеј“ од Струмица да ги продолжат археолошките истражувања на локалитетите каде треба да никне рудникот за бакар Иловица на планината Огражден, директорот на оваа установа, Ацо Манински вели дека тие со закон биле задолжени да направат археолошки истражувања на локалитетите, но мислењето дали ќе се гради или не рудник на Огражден ќе го даде Управата за заштита на културното наследство.

• Активисти блокираа археолошки истражувања за рудникот Иловица

Како што пренесува порталот www.drnka.mk, повикувајќи се на изјава на директорот Манински, ако не постапат по барањето на „Еуромакс“, тогаш тие ќе треба да го кршат законот.

„Ископувањата се законска обврска за нашата институција. Финансиерот на истражувањето е „Еуромакс“, бидејќи мора да ги направи на местата каде се планираат коповите и постројките. Нашиот договор е да завршиме во рок од 60 работни денови и се надеваме дека ќе ја завршиме работа. Нашите резултати ниту може ја помагаат ниту ја одмагаат процедурата за концесија за фирмата што ќе го користи овој простор“ - изјавил директорот на НУ „Завод и Музеј“ во Струмица, Ацо Манински.