Министерот за локална самоуправа, Горан Милевски и градоначалниците на општините од Југоисточниот плански регион, денеска во Струмица го потпишаа договорот за финансирање на оперативните функции на Центарот за развој на Јуогоисточниот планскиот регион со седиште во Струмица, за тековната 2019 година.

Согласно Законот за рамномерен регионален развој, Министерството за локална самоуправа, на годишно ниво, го кофинансира работењето на сите осум Центри за развој на планските региони во висина од 1,2 милиони денари за активности и исто толку за имплементација на проектите за регионален развој.

Со овој договор се утвдуваат и активностите кои што Центарот за развој ќе ги реализира оваа година, а кои што произлегуваат од Програмата за развој на Југоисточниот плански регион.

За градоначалникот на Струмица и претседател на Советот на градоначалници на Југоисточниот плански регион, Коста Јаневски, важно е што покрај потпишувањето на договорите се разговарало и за децентрализацијата, која, како што рече, досега била малку закочена.

„Има едно големо расположение на сите чинители да се тргне кон следните чекори на децентрализацијата во областа на социјалната политика и други сегменти кои се значајни, како што е менаџирањето со шумите и патиштата. Тие се некои важни точки кои што во други прилики сме ги зборувале во ЗЕЛС и имаме начелно конкретни чекори кои треба да ги преземеме во текот на овој и наредниот месец“ – рече Јаневски.

Министерот Горан Милевски ги информираше градоначалниците дека вчера Министерството за локална самоуправа ги започнаа активностите на експертско ниво за подготовка на измените на Законот за рамномерен регионален развој и на новата Стратегија за регионален развој за периодот 2020-2029 година, во што се очекува своето искуство да го пренесат и локалните власти.

Во наредните денови договори за финансирање ќе бидат потпишани со сите Центри за развој на планските региони, за да не се доведе во прашање нивното тековно работење.