Претседателот на Општинската организација на СДСМ во Струмица, Марјан Даскаловски, денеска ги повика струмичани да се вклучат во акцијата за чистење на отпадот од реонот околу спортскиот комплекс во Струмица, еко акција што ја организира струмичкото СДСМ.

„Целта на оваа акција е сите заедно да исчистиме уште една дива депонија во овој дел од градот и да упатиме порака до сите несовесни граѓани кои што го расфрлаат отпадот на несоодветни места, дека од нас зависи во каква животна средина ќе живееме и каква ќе им ја оставиме на идните генерации“ – вели Даскаловски.

Тој додаде дека оваа акција и учеството на граѓаните во неа ќе биде и придонес во кампањата која што во март годинава ја започнаа Општина Струмица и ЈПКД „Комуналец“, „Еко фронт – Чиста да ни е“, а во која се исчистија поголем дел од дивите депонии во градот и населените места и се разубавија јавните зелени површини.

Зборното место е закажано во 09:00 часот, во недела 22 септември, пред Спортскиот комплекс „Пандев“ во Струмица.