Од 14-ти септември до денеска, Струмица беше домаќин на третата меѓународна размена под име „АгроМлади - Трето издание“.

Група од 35 млади од 7 европски земји, Македонија, Романија, Италија, Данска, Турција, Хрватска и Португалија беа гости на Струмица. Теми на размената кои беа дискутирани беа поврзани со развој на руралните подрачја, земјоделието и како младите да се мотивираат и да започнат свои мали бизниси во областа производство на храна.

Во текот на размената тие имаа можност да споделат искуства, информации и најдобри практики во овие области. Исто така беа имплементирани и студиски посети преку кои младите научија повеќе за производството. Групата ја посети фабриката ЈОКА од Струмица каде научија повеќе за производството на јогурт, МАБИ Трејд каде видоа како се конзервира и обработува пиперката, и беа гости на Бети Рингова во Горно Балдовци каде имаа можност и директно да помогнат при берење на црвена пиперка.

На овој начин тие преку студиски посети дознаа повеќе и искусија практично што значи бизнис, како да станеш земјоделец и добија мотивација за иднината.

Младите имаа можност направат и свој мармалад од јаболка и модри сливи. Мармаладот денеска беше претставен на струмичани, а средствата од продажбата ќе бидат донирани во хуманитарни цели.

Исто така тие како гости на Општина Струмица имаа можност да ги посетат и видат Колешинските и Смоларските водопади, Водоча, Вељуса и Струмичкиот музеј и да научат нешто повеќе за Струмица.

Оваа меѓународна размена е имплементирана од страна на младинската организација КРЕАТОР од Куманово, а финансирана од Националната агенција за европски програми и мобилност преку програмата ЕРАСМУС+.