Денеска во употреба е пуштена Пречистителна станица во село Ново Коњарево, општина Ново Село. Изградбата на Пречистителната станица е дел од Проектот за управување со сливот на река Струмица, финансиран од Швајцарската агенција за развој и соработка, кој го спроведува УНДП во партнерство со Министерството за животна средина и просторно планирање.

„Оваа пречистителна станица значи живот и еколошки чиста средина за сите граѓани од општина Ново Село”, изјави градоначалникот Боро Стојчев.

Амбасадорката на Швајцарија, Сибил Сутер Техада, рече дека освен што оваа Пречиститечна станица ќе помогне да се задржи чистата животна средина во овој регион, исто така ќе им помогне на локалните земјоделци преку наводнување со чиста вода да произведуваат здрави и квалитетни производи.

„Оваа инвестиција ќе послужи како пример за други мали места во земјата. Ние ќе градиме уште една во општина Василево, како дел од големиот Проект за управување со сливот на река Струмица, вреден три милиони евра, чија главна цел е да го подобри управувањето со водите во регионот“ - изјави Луиза Винтон, постојаната претставничка на Програмата за развој на Обединетите нации (УНДП).

Заменик министерот за животна средина, Јани Макрадули вели дека овој проект е важен затоа што е целосно во согласност со директивата на Европската Унија за управување со водите и затоа што покажува дека заштитата на животната средина не е изолиран процес, туку бара интегрален пристап и вклучување на сите засегнати страни.

ФОТОГАЛЕРИЈА