Синоќа во Црквата „Свети Петнаесет Тивериополски Свештеномаченици“ во Струмица, отец Димитар Крцев, традиционално на третиот ден од Божиќ, организираше свечена вечера во чест на помогателите на реконструкцијата на новата фасада на Црквата.

По Божествената молитва и свечената вечера на голем број стопанственици, компании и граѓани им беа доделени посебни Благодарници. Вакви Благодарници беа доделени и на празникот Свети Петнаесет на 10-ти и 11-ти декември.

На свеченоста, освен бизнисмени, присуствуваа и претседателот на Советот на општина Струмица, Јосиф Христов, раководителите со медицинскиот персонал на Дневниот центар за прифат, третман и лекување на болести на зависност „Св. Елисавета” и Терапевската Заедница „Покров“ во Струмица, како и хорот „Свети Теофил Струмички“, под раководство на проф. Зоран Мазнејков, на кого им беа доделени исто така Благодарници.

Отец Димитар Крцев изрази голема благодарност до сите кои секојдневно и помагаат на Црквата, без кои, како што рече, нема да изгледа толку Божествена без овие спонзори, но и без верниците, кои со секојдневната посета на Храмот и со секоја запалена свеќа дават свој придонес за Светите Петнаесет.