По завршувањето на седмото издание на „Струмица ОПЕН фестивал 2018“, градоначалникот на општина Струмица, Коста Јаневски, покровител на манифестацијата, денеска преку видео обраќање упати јавна благодарност до организаторите, Здружението „Културен забавен живот“, за професионалноста на институциите кои беа задолжени за безбедноста и чистотата, а најмногу на граѓаните кои беа дел од оваа манифестација.

„Помина уште едно, седмо по ред издание на најмасовната манифестација во нашиот град и општина, но и во цела Македонија, „Струмица ОПЕН фестивал“. Радува тоа што реакциите на граѓаните од нашата и другите општини од нашава земја, но и од странство, како преку непосредните контакти, така и преку социјалните мрежи, се повеќе од позитивни. Од тие реакции, но и од согледувањето на фактичката состојба, може слободно да се заклучи дека годинава го имавме едно од најмасовните и најквалитетните изданија на „Струмица ОПЕН фестивал“ - вели во обраќањето Јаневски.

Тој истакнува дека е направен значаен исчекор и во квалитет и во квантитет, со што истиот бележи евидентна нагорна линија, а сите фестивалски денови поминале без никакви проблеми или нарушување на јавниот ред и мир.

„Поради сето тоа, сакам јавно да им честитам и да им се заблагодарам, како на организаторите од Здружението „Културен забавен живот“, така и на сите институции кои беа задолжени за безбедноста и чистотата, за нивната професионалност и сериозност, а најмногу на граѓаните кои беа дел од седмиот „Струмица ОПЕН фестивал“.

На крајот од своето обраќање градоначалникот Јаневски вели дека интенција на фестивалот е секое наредно издание да биде подобро од претходното, тој како градоначалник и Општина Струмица, ќе вложат максимални напори во севкупната негова поддршка, а за уште поголемо збогатување на содржините кои го разубавуваат животот на граѓаните.