Хотел „Вила Парк“, сместен во убавините на Градскиот парк во Струмица е прогласен за „Најуспешен градски хотел“ во Македонија. Ова признание струмичкиот хотел го доби на денешната традиционална манифестација по повод Светскиот ден на туризмот – 27 септември, што Министерството за економија ја организира секоја година.

За „Најуспешен СПА хотел“ е прогласен хотелот „Сириус“ во Струмица, додека во категоријата „Најуспешна туристичка агенција“ е прогласена „Атлантис“ од Струмица.

Признанијата на добитниците им ги врачи министерот за економија, Крешник Бектеши, а беа доделени 50-тина признанија во повеќе категории, меѓу кои и за: Најуспешни хотели за планински туризам, за езерски туризам, Нова туристичка понуда во делот на хотелиерството, Најуспешен ресторан, Најуспешна туристичка манифестација, Најуспешен туристички водич, Најдобар реализиран проект од областа на туризмот и други. /Р.Ѓ./