Денеска е Денот на лицата со Даун синдром. Денеска се одбележува убавината на различностите и инклузијата, затоа што во нивната разновидност всушност се крие најголемата убавина, која се открива преку топлата, весела, нежна и емоционална природа, која го освојува сечие срце.

Анче Туфекчиева, мајка на девојче родено со Даун синдром, борец, но и жена хуманитарец, која несебично се вложува во поддршка на семејствата каде што имаат дете со попреченост, секојдневно се бори и за нив со препреките и стереотипите во општеството. Таа е и основач на Здружението „Вера“ од Струмица - здружение за помош и поддршка на лица со Даун синдром.

„Од 2006 година насекаде во светот се одбележува 21 март, една година подоцна со раѓањето на мојата ќерка Верче се вклучивме и ние во „семејството одбележувачи“ се со една цел: Да испратиме една порака дека овие луѓе се тука меѓу сите нас и дека треба да ги имаат сите права како секој граѓанин. Медицината не е секогаш правилна и праведна кон нас, понекогаш не опишува поцрно и полошо од тоа што сме. Ништо не е случајно, сепак најтешките борби се за најсилните „играчи“. Понекогаш се прашувам дали Верче навистина има еден хромозом повеќе, или ние имаме еден помалку... затоа што таа не знае за омраза и завист... Поради нејзината состојба многу добри луѓе влегоа во нашите животи, а лошите луѓе едноставно ги снема. За таквите нема место во нашите животи“ – вели Туфекчиева.

Според Туфекчиева, среќа голема што Верче ја има моќта да ги препознае луѓето кои вистински ја сакаат и не гледаат попреченост кај неа, но и да ги препознае луѓето на кои им пречи нејзиното присуство.

„Затоа со нејзина помош дознавме дека постои еден поинаков свет, свет без предрасуди... запознавме многу семејства со кои секојдневно заедно ги делиме нашите проблеми и си помагаме едни со други... Денес после скоро 14 години можам слободно да кажам дека Верче е силата во мојот живот, и дека кога би имале можност да бираме пак една со друга би се избрале, затоа што животот без неа не би бил толку вреден за живеење“ – додава Туфекчиева.

Дауновиот синдром влијае, но не го одредува развојот на личноста. Луѓето кои го имаат овој синдром се уникатни, со сопствени таленти, способности, размислувања и интереси. На секои 700 до 900 случаи мајките раѓаат дете со Даун синдром и е застапен кај сите луѓе од било која етничка, расна и социјална популација.

Турската пеачка Gül Özgüner Altın ја сними македонската народна песна „Елена ќерко“, аранжмански направена од младиот басист, струмичанецот Иван Кукиќ. Музиката и видеото со настапот на Иван се снимени во студиото „202“ во Струмица, додека гласовите и видеото со Altın во студио во Турција.

„Соработката за снимање на ова стара македонска песна излезе случајно. Јас и Ѓул сме пријатели на Инстаграм и одвреме-навреме се допишуваме и најчесто зборуваме за музиката. Таа многу ја сака нашата македонска песна и така дојде до идеја да снимиме една македонска песна. И ја предложив „Елено ќерко“, многу и се допадна. Го направив аранжманот, ги снимивме гласовите, го направивме миксот и така излезе и видеото“ – ни кажа Иван Кукиќ.

Иван најави дека следуваат и други традиционални македонски песни од неа, со нејзиниот глас, а кои музички ќе ги дотерува тој во неговото студио во Струмица.

„Далечината не нè спречува да правиме заедно музика... Снимивме и подготвивме видеа во нашите земји, со мојот македонски музичар, пријател Иван Кукиќ, кого го слушам со восхит и уживав многу во правењето музика заедно“ – вели турската пеачка Gül Özgüner Altın.

Со подигање на знамето на Струмичкиот карневал на платото пред Центарот за култура „Антон Панов“, вечерва на симболичен начин и со почитување на сите протоколи за заштита од Ковид-19, почнаа карневалските празнувања. Веднаш потоа во фоајето на Центарот за култура беше отворена и ретроспективна изложба на фотографии од изминатите карневали во Струмица.

Група ентузијасти, припадници на македонската православна црква - Струмичка епархија, граѓани посветени на православието и христијанските вредности, создадоа интернет портал „Тивериопол.мк“, кој ќе ја негува и почитува православната вера.

„Нашиот тим е разнолик. Индивидуално нe’ има од различни професии, музиколози, филолози, филозофи, книжевници, преведувачи, теолози. Но, она што ни е заедничко на сите ни е Црквата и православието, а како што покажува и името на нашиот портал, и Струмица. Но, нашето делување секако ќе го прошириме на подрачјето на нашата епархија, значи и Берово и Дојран. Едната идеја беше, нашето црковно живеење да го прошириме и во дигиталниот свет. Тој (црковниот н.з) е толку богат и жив, што вреди, треба и мора да се сподели. Знаете она што како дар го добиваме од Црквата преку нејзините тајни, ние мора и сакаме да го прикажеме и во нашето секојдневно делување во заедницата. Затоа сакавме да создадеме интернет простор во кој, по наш избор ќе се прочита нешто повеќе за богословието, ќе се учиме од поуките, ќе може да ги препрочитуваме беседите на нашиот владика и на нашиот викарен епископ. Одвојуваме простор за културните настани, за уметноста, за најмладите, за здрав живот. Се’ на се еден живописен портал кој ќе плени не само со графичкиот изглед, туку и со содржините кои ќе бидат на распологање на нашите посетители“, велат од тимот на „Тивериопол.мк“.

Тие сакаат преку преку содржините да делуваат и едукативно.

„Знаете забележуваме еден тренд на доследно, да не речеме слепо почитување на обичаи и практики кои изворно не се поврзани со православието. Во еден дел нашата активност ќе биде насочена кон согледување на тие, ајде да речеме недоследности, па преку соодветни форми, дали текст или видео материјал, да поучиме да се види правилното практикување на верата. Жално е формата да не оддалечува од суштината, а со тоа залуден би бил секој подвиг на верниците. Оттука, и храброста, да делуваме едукативно, за да се ослободи верата од стегите на формалностите“.

Веб порталот ќе биде збогатен и со видео содржини. Едноставно, како што велат, ја почувствувавме потребата да се чуе и гласот, да се види и сликата.

„Дали тоа видео ќе биде беседа на нашиот викарен епископ, или ќе биде анимирана евангелска приказна за нашите најмали, или пак ќе биде разговор-интервју. Сепак една визуелно побогата форма. Ете на нашиот YouTube канал кој ќе оди рака под рака со сајтот, се наоѓаат постирани видеа, меѓу кои и за првпат преведени и испеани Божиќни каланди. На тој начин, она што нашата црковна заедница го сработи со најмладите ќе биде на дофат на сите. Па оттаму веруваме дека содржините како такви ќе ги надминат виртуелно-географските граници кои ние сме си ги поставиле“.

Иницијаторите за создавањето на овој веб портал велат дека голема е поддршката што ја добиваат од Струмичката епархија.

„Речиси е невозможно, успехот на нашата замисла да помине без благословот од нашиот викарен епископ Јаков. Тука нашата огромна благодарност за подадената рака и разбирање (во иднина и време за да ги реализираме нашите емисии и интервјуа). И целата логистика што ја добиваме од свештените лица во содржинското уредување на некои рубрики директно поврзани со црквата и православието“.

Тимот на „Тивериопол.мк“ вели дека може досега најдобро го дефинирале дел од коментарите на социјалните мрежи.

„Прочитавме различни коментари на социјалните мрежи, а некои и не дефинираа, онака како што ние без да мислиме сме се позиционирале. Како интернет остров. И токму така. Така го замислуваме нашиот сајт, како остров на кој секој посетител, добронамерник ќе се одмори од пливањето во често немирните води на секојдневието. Ќе земе починка со четивата во кои почива милосрдието, ќе одмори со писанијата во кои одмора радоста, верата, љубовта. А тогаш, секој ќе види колку е важно, потребно и душеспасително црковното живеење. Колку е обично, а не апстрактно и безумно. Зашто ако целта на секој Христијанин е да помага, тогаш „Тивериопол.мк“ е подадена рака на сите на кои во ова време, им треба смисла, им треба радост, им треба љубов, им треба слобода“ – додаваат од www.tiveriopol.mk

„Here I Stand“ е насловот на евровизиската песна со која струмичанецот Васил Гарванлиев ќе ја претставува Македонија на 65-то издание на „Евровизија 2021“ во мај во Ротердам, Холандија.

Автор на музиката и текстот е самиот Васил, додека арнжманот и продукцијата ги направија Давор Јордановски и Борче Кузмановски.

„Со особена чест и љубов ја споделувам овогодинешната песна за Евросонг 2021. Иако песната ги отсликува мене и мојата животна приказна, верувам дека ќе ги допре сите, односно ќе допре до сите нас кои сме поминале низ трнлив пат, сме воделе тешки битки и повторно на крајот сме ја зачувале насмевката“ – напиша Васил на својот Фејсбук профил.

Страница 1 од 11